UJeremiya 15 - iBhayibhili Elingcwele 1978

Ukuthukuthela kweNkosi ngoJuda

¹ INkosi yasisithi kimi: Loba bekumi phambi kwami oMose loSamuweli, inhliziyo yami yayingeke iphendukele kulababantu. Basuse phambi kwami, bahambe!

² Lapho bekubuza besithi: Sizakuya ngaphi? uzakuthi kibo: INkosi ithi: Abokufa baya ekufeni, abomkhonto baya emkhontweni, abendlala baya endlaleni, labokuthunjwa baya ekuthunjweni.

³ Ngizabamisela inhlobo ezine zababulali, kutsho iNkosi, ngitsho umkhonto wokubulala, izinja zokubabamba, inyoni zaphezulu, lenyamazana zeganga zokubadla lokubabhubhisa.

⁴ Ngizakubenza ukuba babe yinto eyesabekayo kuyo yonke imibuso yomhlaba, ngenxa yalokho okwenziwa eJerusalema nguManase indodana kaHezekiya, inkosi yakoJuda.

⁵ Ngubani ozakukuhawukela, wena Jerusalema, lozakukukhalela na? Ngubani ozaphambukela eceleni ukubuza ngempilo yakho na?

⁶ Wena ungilahlile, kutsho iNkosi, wabuyela emuva; ngalokhoke ngikuphakamisele isandla sami, ngakuchitha; sengikhathele ukubekezela.

⁷ Ngibelile ngesitsha sokwela emizini yelizwe; ngabamuka abantwana, ngababhubhisa abantu bami; ngoba kabaphendukanga endleleni zabo.

⁸ Ngandisile abafelwakazi baba banengi ukwedlula itshebetshebe lolwandle, ngehlisela phezu kwabonina bamajaha umbulali emini; ngenza usizi lokwesaba kwehlela phezu kwabo bengananzeleli.

⁹ Owazala abayisikhombisa usekhathele, waqaleka; watshonelwa lilanga kusesemini; waba lenhloni, wayangeka. Abaseleyo ngizabanikela ezitheni zabo ukuze babulawe, kutsho iNkosi.

Ukusola kukaJeremiya

¹⁰ Maye mina, maye ngomama! ngoba wangizala ngaba ngumuntu wokuphikisana lokuxabana kulo lonke ilizwe. Kangebolekisanga ngalutho, futhi kangebolekanga lutho, kodwa bonke bayangithuka.

¹¹ Nkosi, zonke iziqalekiso zakho kazigcwaliseke uba ngingakukhonzanga ngokupheleleyo, ngingazincengelanga kuwe izitha zami ngesikhathi sokuhlupheka kwazo lesosizi lwazo.

¹² Umuntu angayephula insimbi, insimbi evela enyakatho kanye lethusi na?

¹³ Ngizanikela imfuyo yakho lenotho yakho ibe yimpango engabizi mali, ngenxa yezono zakho zonke ezigcwele kulo lonke ilizwe lakini.

¹⁴ Ngizakukwenza ukuba usebenzele zonke izitha zakho elizweni ongalaziyo, ngoba ekuthukutheleni kwami kuphembeke umlilo ozavutha kuze kube nininini.

¹⁵ Uyazi, wena Nkosi; ngikhumbula, ungihambele, ungiphindiselele kwabangihluphayo. Ngoba ulokubekezela, ungangisusi; yazi ukuthi ngenxa yakho ngithwele ukuthukwa.

¹⁶ Ekufikeni kwamazwi akho ngawadla. Ngathokoza ngamazwi akho, futhi athokozisa inhliziyo yami; ngoba ngabizwa ngebizo lakho, Nkosi, uNkulunkulu wamabandla.

¹⁷ Kangihlalanga emihlanganweni yabazithokozisayo, futhi kangijabulanga; ngahlala ngedwa nje, ngoba isandla sakho sasiphezu kwami, ngoba ungigcwalise ngokuthukuthela.

¹⁸ Kungani ubuhlungu bami bungapheli, lamanxeba ami engapholi, elapheke na? Uzakuba njengesifula esikhohlisayo kimi, lanjengamanzi angathembekanga na?

¹⁹ Ngakhoke kutsho iNkosi, uba ubuya, ngizakukwamukela ungisebenzele. Uba ukhuluma okuhle, ungakhulumi okubi, uzakuba njengomlomo wami. Bazakuza kuwe, kodwa wena kawuyikuya kubo.

²⁰ Ngizakukwenza ukuba ube ngumduli wethusi oqinileyo kulababantu; bazakulwa lawe, kodwa kabayikukwahlula, ngoba ngilawe ukukusiza lokukukhulula, kutsho iNkosi.

²¹ Ngizakukukhulula esandleni sababi, ngikophule ezandleni zabalesihluku.