UJeremiya 14 - iBhayibhili Elingcwele 1978

Ilizwi leNkosi mayelana lokubalela kwelanga

¹ Ilizwi leNkosi elafika kuJeremiya mayelana lokubalela kwelanga lathi:

² UJuda uyalila, lemizi yakhe idangele, abantu bakhe bahlezi phansi bayakhala, lokukhala kweJerusalema kuyezwakala.

³ Izikhulu zakhe zithuma inceku zazo ukuba ziyekukha amanzi, zifika emithonjeni, kodwa kazifumani manzi, zibuyele inkonxa zazo zingelalutho, zilenhloni, zidanile, zimbomboza amakhanda.

⁴ Ngenxa yokuba umhlaba womile, ngoba kungekho izulu elizweni, abalimi balenhloni, bambomboza amakhanda abo.

⁵ Lezimpala ziyazala ziwatshiye egangeni amathole azo, ngoba kungelatshani.

⁶ Lobabhemi beganga bayema emadundulwini angelalutho, baphembele umoya njengamakhanka, lamehlo abo afiphale, ngoba kungelatshani.

⁷ Loba izono zethu zisilahla, sebenza, wena Nkosi, ngenxa yebizo lakho; ngoba sihlamukile kanengi, sonile kuwe.

⁸ Wena themba likaIsrayeli, mkhululi wakhe ngesikhathi sokuhlupheka, yini ukuba ube njengowezizweni, ube njengesihambi esiphambukela eceleni ukuhlala okobusuku na?

⁹ Yini ukuba ube njengomuntu odidekileyo, ube njengeqhawe elingasiziyo. Kanti, wena Nkosi, ukhona phakathi kwethu, lathi sibizwa ngebizo lakho; ungasitshiyi.

¹⁰ INkosi ithi ngalababantu: Bayakuthanda ukuzula kanje, kabazinqandanga inyawo zabo. Ngalokho iNkosi kayibamukeli, khathesi izakhumbula ububi babo, ibatshaye ngezono zabo.

¹¹ INkosi yathi kimi: Ungakhulekeli lababantu ukuba baphiwe okuhle.

¹² Loba bezila ukudla, kangiyikuzwa ukukhala kwabo; loba benikela umnikelo wokutshiswa lomnikelo wempuphu, kangiyikuthokoza ngabo; kodwa ngizabaqeda ngempi langendlala langomkhuhlane.

¹³ Ngasengisithi: Hawu, Nkosi Nkulunkulu! Khangela, abaprofethi babatshela bathi: Kaliyikubona impi, kaliyikufikelwa yindlala, kodwa ngizalinika ukuthula kulindawo.

¹⁴ INkosi yathi kimi: Abaprofethi batshumayela amanga ngebizo lami. Kangibathumanga, kangibalayanga, kangikhulumanga kibo; batshumayela kini imibono yamanga, lokuvumisa okuyize, lenkohliso yengqondo zabo.

¹⁵ Ngalokhoke iNkosi ithi mayelana labaprofethi abatshumayela ngebizo lami bona ngingabathumanga, abathi: Impi lendlala kakuyikufika kulelilizwe. Labobaprofethi bazaqedwa ngumkhonto lendlala;

¹⁶ kuthi abantu abatshumayela kibo baphoselwe endleleni zeJerusalema, bebulewe yindlala lempi, kungasekho muntu wokubangcwaba, bona labomkabo, lamadodana abo lamadodakazi abo. Ngoba ngizakwehlisela ububi babo phezu kwabo.

¹⁷ Uzakutsho lelilizwi kibo elokuthi: Amehlo ami kawehlise inyembezi ebusuku lemini zingakhawuli, ngoba abantu bami balimele kakhulu, balinyazwe yikutshaywa okubi.

¹⁸ Uba ngiphumela ngaphandle, kugcwele khona ababulewe empini. Uba ngingena emzini, ngibona khona abantu ababulawa yindlala. Abaprofethi labapristi bahamba besenza umsebenzi wabo, kodwa bengazi ukuthi benzani.

¹⁹ Usumlahlile impela uJuda yini, leZiyone liyakunenga na? Usitshayeleni singabi lakusiliswa na? Salindela ukuthula, kodwa kakuvelanga okuhle. Sahlalela isikhathi sokwelatshwa, kodwa kwavela ukwesaba.

²⁰ Siyakuvuma ukona kwethu, Nkosi, lobubi babokhokho bethu, ngoba sonile kuwe.

²¹ Ungasixotshi, ngenxa yebizo lakho, ungaseyisi isihlalo sobukhosi bakho; sikhumbule, ungasephuli isivumelwano osenze lathi.

²² Kambe bakhona yini phakathi konkulunkulu bamanga bezizwe abanganisa izulu? Kumbe iphezulu lona lingehlisa izihlambo na? Atshi! angithi nguwe kuphela, Nkosi, Nkulunkulu wethu? Thina sithembela kuwe, ngoba nguwe ozenzayo zonke lezizinto.