UJeremiya 10 - iBhayibhili Elingcwele 1978

Izithombe zingonkulunkulu bamanga; yiNkosi kuphela enguNkulunkulu

¹ Zwanini ilizwi iNkosi elikhuluma kini, lina ndlu kaIsrayeli.

² INkosi ithi: Lingayifundi indlela yabezizwe, lingatshaywa luvalo ngezibonakaliso zaphezulu, ngoba bona abezizweni bayazesaba;

³ izithombe zabezizwe ziyize. Ngoba kuganyulwa isihlahla ehlathini, sibazwe ngehloka lombazi;

⁴ abantu basicecisa ngesiliva langegolide, basibethela ngesando lezipikili ukuze singasuki.

⁵ Izithombe zabo zinjengezinto zokwethusa emasimini, kazikhulumi, futhi ziyathwalwa, ngoba kazihambi; lingazesabi, ngoba kazilamandla okwenza okubi, lokuhle kazilakukwenza.

⁶ Kakho onjengawe, Nkosi, ngoba umkhulu, lebizo lakho likhulu kakhulu.

⁷ Ngubani ongaze wakwesaba, wena Nkosi yezizwe? ngoba ufanele ukwesatshwa. Phakathi kwabahlakaniphileyo bonke bezizwe, lakuyo yonke imibuso yabo, kakho onjengawe.

⁸ Bonke bayizithutha leziphukuphuku; izithombe zesigodo zingabafundisa ulutho na?

⁹ Isiliva esikhandiweyo sivela eTarshishi, legolide livela eOfiri. Ukwenza izithombe kungumsebenzi wesisebenzi lowezandla zomkhandi, zigqokiswe okuluhlaza lokuyibubende; konke kungumsebenzi wezingcitshi.

¹⁰ Kanti iNkosi inguNkulunkulu weqiniso, inguNkulunkulu ophilayo leNkosi engelakuphela. Ekuthukutheleni kwayo umhlaba uyazamazama, lezizwe kazilakukumela ukufutheka kwayo.

¹¹ Tshono kubo uthi: Onkulunkulu abangenzanga iphezulu lomhlaba bazabhubha emhlabeni langaphansi kwezulu.

¹² UNkulunkulu wawenza umhlaba ngamandla akhe, walimisa ilizwe ngokuhlakanipha kwakhe, langokuqedisisa kwakhe walendlala iphezulu.

¹³ Lapho ekhupha ilizwi lakhe, amanzi ayahlokoma phezulu; uyakhupha inkungu emikhawulweni yomhlaba, enze imibane iphazime lapho lisina, akhuphe umoya eziphaleni zakhe.

¹⁴ Bonke abantu bayizithutha, kabalakwazi; wonke umkhandi uyangiswa yizithombe zakhe, ngoba izithombe zakhe ziyinkohliso, kazilamphefumulo.

¹⁵ Ziyize nje, zingumsebenzi wenkohliso; ngesikhathi sokutshaywa kwazo ziyabhubha.

¹⁶ UNkulunkulu kaJakobe kanjengazo, ngoba nguye owadala zonke izinto, isizwe sakoIsrayeli yiso asikhethayo; ubizwa ngokuthi yiNkosi yamabandla.

Ukuchitheka kwelakoJuda

¹⁷ Qoqa impahla yakho, wena ovinjezelweyo.

¹⁸ Ngoba iNkosi ithi: Khangela, ngiyabaphosela ngaphandle abakhileyo elizweni ngalesisikhathi; ngizabacindezela baphele nya.

¹⁹ Maye mina ngenxa yokulimala kwami! Inxeba lami libi. Kodwa ngathi mina: Lokhu kuyinhlupheko yami engifanele ukuyithwala.

²⁰ Ithente lami lidilikile, lezintambo zalo zonke ziqamukile; abantwana bami basukile kimi, kabasekho; kakho ongangimisela ithente lami futhi, longalengisa amaveli alo.

²¹ Abelusi babantu bayiziphukuphuku, kababuzanga eNkosini; ngakho kabaphumelelanga, lemihlambi yabo ihlakazekile.

²² Kulamahungahunga okuthi kukhona ukuzamazama okukhulu okusuka elizweni lasenyakatho, okuzakwenza yonke imizi yakoJuda ibe yinkangala lendawo yamakhanka.

²³ Ngiyazi, Nkosi, ukuthi ukuphila komuntu kakukho emandleni akhe, umuntu kalamandla ukuqondisa ukuhamba kwakhe.

²⁴ Siqondisa, wena Nkosi, kodwa kube ngokufaneleyo, kungabi ngolaka lwakho, funa usenze sibe yinto engesilutho.

²⁵ Yehlisela ulaka lwakho phezu kwezizwe ezingakwaziyo, laphezu kwabantu abangakhuleki ebizweni lakho; ngoba bamdlile uJakobe, bamdlile bamqeda, bawuchitha umuzi wakhe.