UJeremiya 1 - iBhayibhili Elingcwele 1978

Ukubizwa kukaJeremiya

¹ Nansi indaba kaJeremiya, indodana kaHilikiya omunye wabapristi ababeseAnathothi elizweni lakoBenjamini.

² Ilizwi leNkosi lafika kuye ensukwini zikaJosiya indodana kaAmoni, inkosi yakoJuda, ngomnyaka wetshumi lantathu wokubusa kwakhe;

³ lafika futhi ensukwini zikaJehoyakimi indodana kaJosiya, inkosi yakoJuda, kwaze kwaba sekupheleni komnyaka wetshumi lanye kaZedekiya indodana kaJosiya, inkosi yakoJuda, kwaze kwaba sekuthunjweni kweJerusalema enyangeni yesihlanu.

⁴ Ilizwi leNkosi lafika kimi lisithi:

⁵ Ngingakakubumbi esiswini ngakwazi, ungakazalwa ngakwahlukanisa, ngakubeka umprofethi ezizweni.

⁶ Ngasengisithi: Hawu Nkosi Nkulunkulu! Angikwazi ukukhuluma ngoba ngingumntwana nje.

⁷ Kodwa iNkosi yathi kimi: Ungatsho ukuthi: Ngingumntwana nje; ngoba kubo bonke engikuthuma kubo uzakuya, lakho konke engikulaya khona uzakukukhuluma.

⁸ Ungabesabi, ngoba ngilawe ukukuvikela, kutsho iNkosi.

⁹ INkosi yasiselula isandla sayo, yathinta umlomo wami, yathi kimi: Khangela, sengibekile amazwi ami emlonyeni wakho.

¹⁰ Ngiyakubeka lamhla phezu kwezizwe laphezu kwemibuso, ukusiphuna lokudiliza, ukubhubhisa lokuchitha, ukwakha lokuhlanyela.

¹¹ Ilizwi leNkosi lafika kimi lisithi: Jeremiya, ubonani na? Ngathi: Ngibona uswazwi lwe‐alimondi.

¹² INkosi yasisithi kimi: Ubone kuhle, ngoba ngiyalilinda ilizwi lami ukuba ngilenze.

¹³ Ilizwi leNkosi lafika kimi ngokwesibili lisithi: Ubonani na? Ngathi: Ngibona imbiza ebilayo, ifulathele enyakatho.

¹⁴ INkosi yasisithi kimi: Okubi kuzaqubuka enyakatho, kubehlele bonke abakhileyo elizweni.

¹⁵ Ngoba ngiyabiza izizwe zonke zemibuso yasenyakatho, kutsho iNkosi; amakhosi azo azakufika, wonke azakumisa izihlalo zawo zobukhosi emasangweni aseJerusalema, azingelezele imiduli yalo lonke, lemizi yonke yakoJuda.

¹⁶ Ngizabagweba ngenxa yabo bonke ububi babo ngokungihlamuka kwabo. Batshisela abanye onkulunkulu impepha, bakhonza imisebenzi yezandla zabo.

¹⁷ Kodwa wena, mana isibindi, usuke, ukhulume kibo konke engikulaya khona. Ungabesabi, funa ngehlisele phezu kwakho ukwesaba phambi kwabo.

¹⁸ Ngoba ngikwenzile lamhla waba njengomuzi obiyelweyo, lensika yensimbi, lemiduli yethusi, ukumelana lalo lonke ilizwe, wonke amakhosi akoJuda, lezikhulu zalo, labapristi balo, labantu balo.

¹⁹ Bazakulwa lawe, kodwa kabayikukwehlula, ngoba ngilawe ukukuvikela, kutsho iNkosi.