UJakhobe 5 - iBhayibhili Elingcwele 1978

¹ Minani lina abanothileyo, khalani, lilile ngenxa yezinhlupheko ezizakulehlela.

² Inotho yenu ibolile, lezambatho zenu zidliwe zinondo.

³ Igolide lenu lesiliva senu kuthombile, lokuthomba kwakho kuzakuba yibufakazi ngakini, kudle inyama yemizimba yenu njengomlilo. Lithi lizibekela inotho yezinsuku zokuphela.

⁴ Khangelani, umvuzo wezisebenzi ezivune amasimu enu elizincitshe wona, uyakhala; lokukhala kwabavuni kufinyelele ezindlebeni zeNkosi yamabandla.

⁵ Libusile emhlabeni, lathokoza; lizinonisele usuku lokuhlatshwa.

⁶ Limlahlile, lambulala olungileyo; yena kaphindiseli.

Mayelana lokubekezela

⁷ Bazalwane, bekezelani ize ifike iNkosi. Khangelani, umlimi uyalindela isithelo somhlabathi esiligugu, asibekezelele, size sizuze izulu elokuqala lelokucina.

⁸ Lanike bekezelani, liqinise inhliziyo zenu, ngoba ukufika kweNkosi sekusondele.

⁹ Lingasolani, bazalwane, ukuze lingathonisiswa; ngoba, khangelani, uMthonisisi useseduze.

¹⁰ Abaprofethi abakhuluma ebizweni leNkosi kababe yisibonelo sokuhlupheka lokubekezelela.

¹¹ Khangelani, babusisiwe ababekezelayo. Lizwile ngokubekezela kukaJobe, libonile ukuba iNkosi yamphatha kanjani ekucineni; ngoba iNkosi ilesihawu lobubele.

Mayelana lokufunga, langokukhuleka, langokusiza abaduhileyo

¹² Kodwa kukho konke, bazalwane bami, lingafungi; lingafungi ngezulu, loba ngomhlaba, loba ngesinye isifungo. Kodwa uyebo wenu kabe nguyebo, loatshi wenu kabe nguatshi, ukuze lingalahlwa.

¹³ Kukhona ohluphekayo phakathi kwenu na? Kakhuleke. Kukhona othokozayo na? Kabonge ngokuhlabela.

¹⁴ Kukhona ogulayo phakathi kwenu na? Kabize abadala bebandla bamkhulekele, bamgcobe ngamafutha ebizweni leNkosi.

¹⁵ Umkhuleko wokukholwa uyamsilisa ogulayo, leNkosi izakumlulamisa; uba enzile isono, uzakuthethelelwa.

¹⁶ Ngakhoke vumani izono zenu omunye komunye, likhulekelane ukuze lisiliswe. Umkhuleko womuntu olungileyo ulamandla kakhulu.

¹⁷ UElija wayengumuntu njengathi nje, wakhuleka ngokuqotho ukuba lingani; kalinanga emhlabeni okweminyaka emithathu lenyanga eziyisithupha;

¹⁸ wabuya wakhuleka; izulu lana, lomhlaba wathela izithelo zawo.

¹⁹ Bazalwane bami, uba omunye kini ephambuka eqinisweni, omunye ambuyise,

²⁰ kazi ukuthi obuyisa isoni ekuduheni kwaso uzakusilisa umphefumulo waso ekufeni, asibekele izono ezinengi.