UJakhobe 4 - iBhayibhili Elingcwele 1978

UJakobe uxwayisa ngokulwa phakathi kwabazalwane

¹ Kuvelaphi ukulwa lokuxabana phakathi kwenu na? Kakuveli ezinkanukweni zenu ezilwayo ezithweni zenu na?

² Liyafisa, kodwa kalizuzi lutho; ngakho libulale. Lilomhawu, kalizuzi lutho; ngakho lixabane, lilwe. Kalilalutho ngoba kaliceli.

³ Liyacela, kodwa kalizuzi, ngoba licela kubi, ukuze likuchithele ezinkanukweni zenu.

⁴ Zifebendini, kalazi yini ukuthi ukuthandana lomhlaba kuyibutha kuNkulunkulu na? Ngakhoke lowo othanda ukuba ngumhlobo womhlaba, uzenza abe yisitha sikaNkulunkulu.

⁵ Licabanga ukuthi umbhalo utsho ize na nxa usithi: Umoya awuhlalise kithi ulobukhwele?

⁶ Kodwa uNkulunkulu uyengezelela umusa. Ngakhoke kuthiwa: UNkulunkulu umelana labazigqajayo, kodwa abazithobileyo uyabapha umusa.

⁷ Ngakhoke zehliseleni kuNkulunkulu; lwanini loSathane, ng’khona ezakulibalekela.

⁸ Sondelani kuNkulunkulu, laye uzakusondela kini. Gezani izandla zenu lina zoni, lihlambulule inhliziyo zenu lina abanhliziyombili.

⁹ Danani, lilile, likhale. Ukuhleka kwenu kakuphendulwe ukulila, lokuthokoza kwenu kuphendulwe ukudana.

¹⁰ Zehliseni phambi kweNkosi, izakuliphakamisa.

¹¹ Lingahlebani, bazalwane. Lowo ohleba umzalwane, loba emahlulela umzalwane wakhe, uhleba umlayo, ahlulele umlayo. Kodwa uba usahlulela umlayo, kawusenguye owenza umlayo, kodwa usungumthonisisi wawo.

¹² Munye ongumisimilayo lomthonisisi, nguye olamandla okusilisa lokubhubhisa; ungubani wena owahlulela umakhelwane wakho na?

UJakobe usola abathanda inzuzo labanothileyo

¹³ Minani lina elithi: Lamuhla, loba kusasa, sizakuya emzini othile, sihlale khona umnyaka, sithengiselane, sizuze.

¹⁴ Kanti okwakusasa kalikwazi. Ukuphila kwenu kuyini na? Kunjengenkungu ebonakala okwesikhatshana, ibisinyamalala.

¹⁵ Ngabe lithi: Uba iNkosi ivuma, sizakuphila senze lokhu lalokhuyana.

¹⁶ Kodwa liyazincoma liziqakise; konke ukuzincoma okunje kubi.

¹⁷ Lowo okwaziyo okuhle okufanele akwenze kodwa angakwenzi uyona.