UJakhobe 3 - iBhayibhili Elingcwele 1978

Izono zolimi

¹ Bazalwane bami, lingabi ngabafundisi abanengi, lazi ukuthi thina esifundisayo sizakwahlulelwa ngokukhulu.

² Ngoba sonke siyakhubeka ngokunengi. Uba umuntu engakhubeki ekukhulumeni kwakhe, lowo ungumuntu opheleleyo, olamandla okubamba lomzimba wonke.

³ Uba sifaka amatomu emilonyeni yamabhiza ukuze asilalele, siqondisa lomzimba wonke wawo.

⁴ Khangelani lemikolo, lanxa imikhulu kangaka, iqhutshwa yimimoya elamandla, iyaqondiswa ngephinyana nje, lapho umtshayeli efuna ukuyiqondisa khona.

⁵ Lunjalo lolimi, luyisitho esincinyane, kanti luzincoma ngezinto ezinkulu. Khangelani umlilo omncinyane uyatshisa ihlathi elikhulu!

⁶ Ulimi lungumlilo, lungumhlaba wobubi. Phakathi kwezitho zethu ulimi yilo olungcolisa umzimba wonke, luthungele ukuphila konke, lona luthungelwa yisihogo.

⁷ Zonke inhlobo zezinyamazana, lezezinyoni, lezezihuquzelayo, lezezidalwa zasolwandle, ziyathanjiswa ngabantu, yebo sezithanjisiwe;

⁸ kodwa kakulamuntu ongathambisa ulimi; luyibubi obungenqotshwe, lugcwele ubuhlungu obubulalayo.

⁹ Ngalo siyabonga iNkosi uBaba, langalo sithuka abantu abenziwe bafana loNkulunkulu.

¹⁰ Emlonyeni munye kuyaphuma ukubonga lenhlamba. Lokhu kakufanelanga, bazalwane bami.

¹¹ Umthombo ungagobhoza yini amanzi amnandi lababayo emgodini munye na?

¹² Bazalwane bami, umkhiwa ungathela izithelo zamaoliva yini, loba ivini lithele izithelo zomkhiwa na? Lamanzi alitshwayi angeke aveze amnandi.

Ukuhlakanipha okuvela phezulu

¹³ Ngubani ohlakaniphileyo loqedisisayo phakathi kwenu na? Katshengise ngokuhamba kwakhe okuhle imisebenzi yakhe ngobumnene langokuhlakanipha.

¹⁴ Kodwa uba lilomhawu obabayo lombango enhliziyweni zenu, lingazincomi, liqambele amanga iqiniso.

¹⁵ Lokhu kakusikho ukuhlakanipha okuvela phezulu, kodwa kungokomhlaba, kungokwenyama lokwabomoya ababi.

¹⁶ Ngoba lapho kukhona umhawu lombango, kukhona futhi isiphithiphithi lezenzo ezimbi.

¹⁷ Kodwa ukuhlakanipha okwaphezulu okokuqala kuhlambulukile, andubana kube lokuthula, kube mnene, kulalele, kugcwale isihawu lezithelo ezinhle; kakulakuthandabuza lokuzenzisa.

¹⁸ Izithelo zokulunga zivela enhlanyelweni yokuthula, ehlanyelwa yilabo abathanda ukuthula.