UJakhobe 2 - iBhayibhili Elingcwele 1978

Abazalwane balaywa ukuba bangabandlululi abantu

¹ Bazalwane bami, njengabakholwayo iNkosi yethu uJesu Kristu, iNkosi yenkazimulo, kalingabandlululi abantu.

² Ngoba uba kungena enkonzweni yenu umuntu olamasongo egolide lezambatho ezinhle, kungene longumyanga olezambatho ezimbi,

³ linanzelela kakhulu ogqoke izambatho ezinhle lithi: Hlala lapha kulindawo; beselisithi kongumyanga: Mana lapho wena; loba lithi: Hlala esigcabheni senyawo zami;

⁴ kalibandlululi yini phakathi kwenu? Kalisibo abahluleli abangalunganga na?

⁵ Zwanini, bazalwane bami abathandekayo; uNkulunkulu kabakhethanga yini abayanga emhlabeni ukuba babe ngabanothileyo ngokukholwa lezindlalifa zombuso awuthembisayo kulabo abamthandayo na?

⁶ Kodwa lina libadumazile abayanga. Abanothileyo kabalicindezeli na? Kakusibo abalidonsela emacaleni na?

⁷ Kabalihlambazi ibizo elihle elibizwa ngalo na?

⁸ Lenza kuhle uba ligcina umlayo wobukhosi omayelana lombhalo othi: Wothanda umakhelwane wakho njengalokhu uzithanda wena.

⁹ Kodwa uba libandlulula abantu lenza isono, lomlayo ulilahla njengabaweqayo.

¹⁰ Ngoba ogcina wonke umlayo kodwa akhubeke kokukodwa, ulecala lawo wonke.

¹¹ Ngoba yena owathi: Ungafebi; wathi futhi: Ungabulali. Ubake ungafebi kodwa ubulala, ungoweqa umlayo.

¹² Khulumani, lenze njengokufanele abazakwahlulelwa ngomlayo wenkululeko.

¹³ Ukwahlulela lokho kakulasihawu kulowo ongelasihawu; kodwa olesihawu uzakunqoba ekwahluleleni.

Ukukholwa kufanele kube lezenzo

¹⁴ Bazalwane bami, kusizani uba umuntu esithi ulokukholwa, kodwa engelayo imisebenzi na? Ukukholwa kwakhe kungamsilisa na?

¹⁵ Uba umzalwane loba umzalwanekazi behambaze, beswela ukudla,

¹⁶ omunye wenu athi kibo: Hambani kuhle, lifudumale, lisuthe; kodwa engabaniki lokhu okudingwa ngumzimba, lokho kusizani na?

¹⁷ Kunjaloke lokukholwa, uba kungelamisebenzi, kufile.

¹⁸ Kodwa omunye uzakuthi: Wena ulokukholwa, mina ngilemisebenzi. Ngitshengisa ukukholwa kwakho ngaphandle kwemisebenzi yakho, lami ngemisebenzi yami ngizakukutshengisa ukukholwa kwami.

¹⁹ Wena uyakholwa ukuba uNkulunkulu munye na? Wenza kuhle. Labomoya ababi bayakholwa, njalo bathuthumele.

²⁰ Sithuthandini, uyathanda ukwazi ukuthi ukukholwa okungelamisebenzi kuyize na?

²¹ UAbrahama ubaba kalungisiswanga yini ngemisebenzi ekunikeleni kwakhe indodana yakhe uIsaka phezu kwealtare na?

²² Uyabona ukuthi ukukholwa kwakusebenza kanye lemisebenzi yakhe, lokuthi ukukholwa kwapheleliswa ngemisebenzi,

²³ kwagcwaliseka lombhalo othi: UAbrahama wakholwa uNkulunkulu, kwabalelwa kuye ukuthi kuyikulunga. Wabizwa ngokuthi ngumngane kaNkulunkulu.

²⁴ Liyabona ukuthi umuntu uyalungisiswa ngemisebenzi, kungesikho ngokukholwa kuphela.

²⁵ Ngokunjalo loRahabi iwule kalungisiswanga ngemisebenzi yini ekwamukeleni kwakhe izithunywa aziphumisa ngenye indlela na?

²⁶ Ngoba njengalokhu umzimba ongelamoya ufile, ngokunjalo lokukholwa okungelamisebenzi kufile.