UJakhobe 1 - iBhayibhili Elingcwele 1978

Isibingelelo

¹ Mina Jakobe, inceku kaNkulunkulu leyeNkosi uJesu Kristu, ngiyabingelela kuzo izizwe ezilitshumi lambili ezihlakazekileyo.

Ukulaya ngezilingo

² Bazalwane bami, nxa lisehlelwa yizilingo ngezilingo, kalibokuthi kuyikuthokoza kodwa,

³ ngoba liyazi ukuthi ukuhlolwa kokukholwa kwenu kuveza ukubekezela;

⁴ ukubekezela kakube lomsebenzi opheleleyo, ukuze libe ngabapheleleyo, lingasweli lutho.

⁵ Uba kukhona kini oswele ukuhlakanipha, kacele kuNkulunkulu ophanayo kibo bonke abantu angabasoli, uzakukunikwa.

⁶ Kodwa kacele ngokukholwa engathandabuzi ngalutho; ngoba othandabuzayo unjengevinqo lolwandle eliqhutshwa, lizuliswe ngumoya.

⁷ Umuntu onjalo kangatsho ukuthi uzakuzuza ulutho eNkosini;

⁸ yena unhliziyombili, uyaphenduphenduka endleleni zakhe zonke.

⁹ Umzalwane ongumyanga kazincome ngokuphakanyiswa kwakhe,

¹⁰ lonothileyo azincome ngokuthotshiswa kwakhe, ngoba njengamaluba otshani uzakudlula.

¹¹ Ngoba ilanga liphuma litshisa, libunise utshani, amaluba abo awohloke, lobuhle babo bunyamalale; ngokunjalo isinothi sizakudlula emisebenzini yaso.

¹² Ubusisiwe umuntu obekezelayo ekulingweni; ngoba lapho esehloliwe uzakwamukeliswa umqhele wokuphila othenjiswe nguNkulunkulu kwabamthandayo.

¹³ Umuntu olingwayo kangatsho ukuthi: Ngiyalingwa nguNkulunkulu. Ngoba uNkulunkulu angelingwe ngokubi, laye uqobo kalingi muntu.

¹⁴ Kodwa ilowo lalowo uyalingwa lapho eyengwa ngezakhe izinkanuko, ehugwa;

¹⁵ kuthi lapho inkanuko isiyomule, ibelethe isono; lesono lapho sesikhulile, sizala ukufa.

¹⁶ Lingakhohliswa, bazalwane bami abathandekayo.

¹⁷ Iziphiwo zonke ezinhle leziphiwo zonke ezipheleleyo zivela phezulu, zehla kuYise wezinkanyezi okungekho kuye ukuphenduka njengemithunzi ephendukayo.

¹⁸ Ngokuthanda kwakhe wasizala ngelizwi leqiniso, ukuba sibe ngamazibulo ezidalwa zakhe.

Ukulaya ngokukholwa okulezenzo

¹⁹ Yazini lokhu, bazalwane bami abathandekayo. Kakube yilowo lalowo aphangise ukuzwa, aphuze ukukhuluma, aphuze ukuthukuthela,

²⁰ ngoba ukuthukuthela komuntu kakwenzi ukulunga kukaNkulunkulu.

²¹ Ngakhoke lahlani amanyala wonke lokwanda kakhulu kokubi, lamukele ngomoya wobumnene ilizwi elihlanyelweyo, elilamandla okusilisa imiphefumulo yenu.

²² Wobani ngabenzi belizwi, lingabi ngabalizwayo kuphela, lizikhohlisa.

²³ Ngoba uba umuntu engolizwayo ilizwi engesuye olenzayo, ufana lomuntu obuka ubuso bakhe esibukweni;

²⁴ ngoba uyazibuka, asuke, abesekhohlwa masinyane ukuthi ube ngonjani.

²⁵ Kodwa lowo okhangelisisa emlayweni opheleleyo, umlayo okhululayo, abambelele kuwo, engesuye ozwayo nje akhohlwe kodwa engowenzayo asebenze, uzakuba ngobusisiweyo ekwenzeni kwakhe.

²⁶ Uba umuntu esithi uyakholwa, engalunqandi ulimi lwakhe kodwa akhohlise inhliziyo yakhe, ukukholwa kwalowomuntu kuyize.

²⁷ Ukukholwa okuhlambulukileyo okungangcolanga phambi kukaNkulunkulu uBaba yilokhu, ukuhambela izintandane labafelwakazi ekuhluphekeni kwabo, lokuzilondoloza kokungcolisayo emhlabeni.