UHosiya 9 - iBhayibhili Elingcwele 1978

UIsrayeli uzatshaywa ngenxa yokungathembeki kwakhe

¹ Ungajabuli, wena Israyeli, ungathokozi njengabezizwe, ngoba uwulile ngokutshiya uNkulunkulu wakho; uthandile umvuzo wewule ezizeni zonke.

² Isiza lesikhamelo sewayini kakuyikubanika abantu ukudla, lewayini elitsha lizabaphelela.

³ Kabayikuhlala elizweni leNkosi, kodwa abakoEfrayimi bazabuyela eGibithe, badle ukudla okungcolileyo eAsiriya.

⁴ Kabayikuthululela iminikelo yewayini eNkosini, kabayikuyithokozisa ngemihlatshelo yabo. Ukudla kwabo kuzakuba njengokudla kwabalilayo, bonke abakudlayo bazakungcola; ngoba ukudla kwabo kuzakuba ngokwabo kuphela, kakuyikunikelwa ethempelini leNkosi.

⁵ Bazakwenza njani ngosuku lomkhosi omisiweyo, langosuku lwedili leNkosi na?

⁶ Ngoba bazabaleka endaweni yokuchitheka, iGibithe lizakubamukela, iMemfisi libe lingcwaba labo, izinto zabo eziligugu zesiliva zigcwale imbabazane, lameva agcwale emathenteni abo.

⁷ Insuku zokutshaywa sezifikile, lensuku zokuphindisela sezifikile. UIsrayeli uzakukwazi lokhu. Umprofethi uzakuba njengesithutha, lomuntu olomoya abe njengohlanyayo ngenxa yobubi benu obukhulu lenzondo yenu enkulu.

⁸ Ngolaka olukhulu uEfrayimi ucathamele abantu bakaNkulunkulu, umprofethi uyisifu endleleni zabo zonke, lomjibila endlini kaNkulunkulu.

⁹ Bazonakalisile kakhulu njengasensukwini zeGibeya. UNkulunkulu uzakhumbula ububi babo, abatshaye ngenxa yezono zabo.

¹⁰ INkosi ithi: Ngamfumana uIsrayeli njengezithelo zevini egangeni, ngababona okhokho babo njengezithelo zokuqala zomkhiwa. Kodwa bafika eBali‐Peyori, bazinikela kuBali, baba yisinengiso njengento abayithandileyo.

¹¹ Udumo lukaEfrayimi luzaphapha luhambe njengenyoni, kungabikho ukuzala, lokuthatha isisu, lokukhulelwa.

¹² Loba bekhulisa abantwana, ngizakubamuka bona, kungasali loyedwa. Maye kibo lapho ngisuka kibo!

¹³ Njengokubona kwami abantwana bakaEfrayimi bazakuba yimpango; uEfrayimi kakhuphele abantwana bakhe ukubulawa.

¹⁴ Banike, Nkosi! Uzabanikani na? Banike isisu esiphumayo lamabele angelalutho.

¹⁵ INkosi ithi: Bonke ububi babo baqala eGiligali, ngalokho ngabazonda khona. Ngenxa yobubi bezenzo zabo ngizabaxotsha endlini yami. Kangisayikubathanda; bonke ababusi babo bayahlamuka.

¹⁶ AbakoEfrayimi batshayiwe; impande yabo yomile, kabayikuthela izithelo. Loba bezala, ngizabulala abantwana babo abathandekayo.

¹⁷ UNkulunkulu wami uzabalahla, ngoba kabamlalelanga; bazakuba ngabazulayo phakathi kwezizwe.