UHosiya 7 - iBhayibhili Elingcwele 1978

¹ Lapho ngifisa ukwelapha uIsrayeli; ukonakala kukaEfrayimi kuyambulwa, lezenzo ezimbi zeSamariya; ngoba bayakhohlisana, bangamasela afohlela ezindlini, labaphangi abaphanga ngaphandle.

² Kabananzi ukuba ngiyakhumbula yonke imisebenzi yabo emibi. Khathesi izenzo zabo zibahanqile, zikhona phambi kwami.

Ububi bukaIsrayeli lokuhlamuka kwakhe

³ INkosi uNkulunkulu ithi: Ngobubi babo bayayikhohlisa inkosi, lababusi ngenkohliso yabo.

⁴ Bayizifebe bonke, banjengeziko elitshisayo, elingakhwezelwa ngumphekizinkwa, kusukela esikhathini sokuxova inhlama kuze kube sekubileni kwayo.

⁵ Ngosuku lwedili lenkosi ababusi bayadakwa liwayini elibukhali, lenkosi izihlanganise lezidakwa.

⁶ Ngenxa yamacebo abo inhliziyo zabo ziyavutha njengeziko; ukufutheka kwabo kudede ubusuku bonke, kodwa ekuseni kubhebhe njengamalangabi.

⁷ Bonke bayatshisa njengeziko, bayabulala ababusi babo. Amakhosi abo wonke asephelile, kakho loyedwa okhuleka kimi.

⁸ INkosi ithi: UEfrayimi uyadinga ubungane bezizwe; unjengesinkwa esingavuthwanga.

⁹ Abezizwe badla amandla akhe, kodwa yena kakwazi lokho. Izimvi seziphumile ekhanda lakhe, kodwa yena kakwazi.

¹⁰ Ukuzigqaja kukaIsrayeli kuyafakaza ngaye, kodwa kababuyeli eNkosini uNkulunkulu wabo, kabamdingi ngakho konke lokhu.

¹¹ UEfrayimi unjengejuba eliyisiphukuphuku elingelangqondo; ucela usizo eGibithe, abuye alucele eAsiriya.

¹² Loba kungaphi lapho baphendukela khona, ngizabathiya ngembule lami, ngibaphosele phansi njengenyoni zaphezulu, ngibatshaye ngenxa yezenzo zabo ezimbi.

¹³ Maye kibo, ngoba basukile kimi! Kabachitheke, ngoba bangihlamukile. Mina bengithanda ukubahlenga, kodwa bona baqamba amanga ngami.

¹⁴ Kabamemezi kimi ngenhliziyo zabo, kodwa bakhala besemibhedeni yabo; lapho bekhalela amabele lewayini, bayazisika, kodwa mina bayangihlamuka.

¹⁵ Loba ngabafundisa ngabaqinisa, kodwa bangenzela amacebo amabi.

¹⁶ Baphendukela kuBali, banjengedandili elixegayo, ababusi babo bazabulawa ngomkhonto ngenxa yokuziphakamisa kwabo. Lokhu kuzakuba yinhlekisa ngabo elizweni laseGibithe.