UHosiya 4 - iBhayibhili Elingcwele 1978

¹ Zwanini ilizwi leNkosi, lina bakoIsrayeli, ngoba iNkosi imangalela abakhileyo elizweni. Kakukho ukuthembeka lomusa lokumazi uNkulunkulu elizweni.

² Kukhona ukwaphulwa kwezifungo, lokuqamba amanga, lokubulala, lokweba, lokufeba; baqhubeka ngokwenza okubi, lamacala egazi ayalandelana.

³ Ngakhoke ilizwe liyalila, labo bonke abahlala kilo baphela amandla, kanye lenyamazana zeganga lenyoni zaphezulu, lenhlanzi zolwandle ziyaphela.

⁴ INkosi ithi: Kakungabi khona umuntu owethwesa omunye icala, lomangelela omunye, ngoba mina ngizakukwethwesa icala, wena mpristi.

⁵ Uzakhubeka emini lebusuku, umprofethi uzakhubeka kanye lawe; uyasibulala isizwe sakini.

⁶ Abantu bami bayabhubha ngokuswela ukwazi; ngoba ukwalile ukwazi, lami ngizakukwala, ungabi ngumpristi wami. Lokhu usuwukhohliwe umlayo kaNkulunkulu wakho, lami ngizakhohlwa abantwana bakho.

⁷ Ngokwanda kwabapristi kuyanda lokona kwabo kimi. Udumo lwabo ngizaluphendula lube lihlazo.

⁸ Badla izono zabantu bami, bayizihwaba zobubi babo.

⁹ Abapristi labantu bazaphathwa ngokufananayo, ngizakubatshaya ngenxa yendlela zabo, ngibaphindisele ngenxa yezenzo zabo.

¹⁰ Bazakudla, kodwa bangasuthi; bazawula, kodwa bangandi; ngoba bawulile ngokudela iNkosi.

¹¹ Iwayini elidala lelitsha liyaqeda ukuqedisisa kwabantu bami;

¹² bayacela izeluleko esigodweni, lentonga yabo iyabeluleka. Ngoba umoya wokuwula ubaduhisile, bawulile ngokutshiya uNkulunkulu wabo.

¹³ Benza imihlatshelo engqongeni zentaba, banikela iminikelo phezu kwamaqaqa, ngaphansi kwezihlahla ezinkulu, langaphansi kwemikhaya emhlophe. Langaphansi kwezihlahla ezinkulu lezilamahlamvu ngoba zilemithunzi emihle. Ngakhoke amadodakazi enu ayawula, labalobokazi benu bayafeba.

¹⁴ Kangiyikuwatshaya amadodakazi enu nxa ewula, labalobokazi benu nxa befeba; ngoba lamadoda lawo ahamba lamawule, enze imihlatshelo yawo kanye lezifebe zasethempelini; abantu abangelakuqedisisa bazabhubha.

¹⁵ Loba wena Israyeli uwula, uJuda kangabi lacala. Lingangeni eGiligali, lingayi eBeti‐Aveni, lingafungi lithi: Sifunga iNkosi.

¹⁶ UIsrayeli ulenkani njengethokazi elihlanyayo; iNkosi izakubelusela edlelweni elibanzi njengamawundlu na?

¹⁷ UEfrayimi uzihlanganisile lezithombe

¹⁸ lexuku lezidakwa, bazinikela ekuwuleni, bethanda ihlazo ukwedlula udumo lwabo.

¹⁹ Umoya uzabakhukhula, ubagoqele ngempiko zawo, ama‐altare abo azabalethela ihlazo kuphela.