UHosiya 13 - iBhayibhili Elingcwele 1978

Ukuchitheka kukaIsrayeli

¹ Kwakuthi lapho uEfrayimi ekhuluma, abantu bathuthumele, wayemkhulu kuye wonke uIsrayeli; kodwa wazehlisela icala ngokukhonza uBali, wafa.

² Khathesi sebesona kakhulu, bazenzela izithombe ezibunjiweyo, izithombe ezenziwe kuhle ngesiliva sabo, zonke ziyimisebenzi yezingcitshi. Bathi: Hlabelani lezi imihlatshelo. Abantu banga izithombe zamathole.

³ Ngalokhoke bazakuba njengenkungu yasekuseni, babe njengamazolo aphela ekuseni, njengomule ophephuka esizeni, njengentuthu ethunqa ngetshimini.

⁴ INkosi ithi: Mina ngiyiNkosi, uNkulunkulu wakho, kusukela ekuhlaleni kwakho eGibithe; kawumazi omunye uNkulunkulu ngaphandle kwami, kakho omunye umsilisi ngaphandle kwami.

⁵ Yimi engakulondoloza enkangala, elizweni lokoma.

⁶ Kodwa nxa usudlile kakhulu, wasutha, lenhliziyo yakho yazikhukhumeza; wasungikhohlwa.

⁷ Ngalokhoke ngizakuba njengesilwane kuwe, njengengwe ngizakukucathamela,

⁸ ngikudumele njengebhere elithathelwe imidlwane yalo, ngidabule isifuba sakho, ngikudlele lapho njengesilwane, ngikudabudabule njengesilo.

⁹ Ngizakukuchitha, Israyeli; ngubani ongakusiza na?

¹⁰ Ingaphi inkosi yakho khathesi ukuba ikusize? Bangaphi ababusi bakho bonke ukuba bakuvikele? labo owathi ngabo: Nginike inkosi lababusi.

¹¹ Ngikunikile amakhosi ekuthukutheleni kwami, ngawasusa ngolaka lwami.

¹² Ububi bukaEfrayimi bulotshiwe ogwalweni, lesono sakhe usibekelwe.

¹³ Umhelo uyamfikela, kodwa unjengomntwana oyisiphukuphuku, othi isikhathi sakhe sesifikile, kodwa kaphumi esiswini.

¹⁴ Ngizabahlawulela emandleni endawo yabafileyo yini? ngibahlenge ekufeni na? Kufa, zingaphi izifo zakho na? Ndawo yabafileyo, kungaphi ukuchitheka kwakho? Isihawu kasisekho kimi.

¹⁵ Loba uIsrayeli ekhahlela phakathi kwemihlanga, kuzafika umoya wasempumalanga, isivunguvungu esivela eNkosini siphuma enkangala; imithombo yakhe izakutsha, kome lamaxhaphozi akhe; sithathe inotho yakhe, izinto zonke eziligugu.

¹⁶ ISamariya lizathwala icala lalo, ngoba lihlamukile uNkulunkulu walo; bazakubulawa yimpi, labantwana babo bachotshozwe, labakhulelweyo babo baqhaqhwe.