UHosiya 11 - iBhayibhili Elingcwele 1978

UNkulunkulu uthanda abantu bakhe abaduhileyo

¹ UIsrayeli esengumntwana ngamthanda, ngayibiza indodana yami ukuba iphume eGibithe.

² Kwathi ngibabiza, kwaba ng’khona besuka kimi; baqhubeka ukuhlabela oBali lokutshisela izithombe impepha.

³ Kanti kwakuyimi engacathulisa uEfrayimi, ngabaphatha abantu bami ezingalweni zami, kodwa kabazanga ukuba ngibelaphile.

⁴ Ngabadonsa ngamagoda omusa langezintambo zothando, ngenza kibo njengomuntu ophakamisela umntwana emlonyeni ukumanga, ngakhothama kibo, ngabanika ukudla.

⁵ Bazabuyela eGibithe, leAsiriya lizakuba yinkosi yabo, ngoba balile ukubuya kimi.

⁶ Impi izatheleka emizini yabo, yaphule lemigoqo yamasango ayo, ibadle ezinqabeni zabo.

⁷ Abantu bami baqonde ukuhlehla kimi, lanxa bekhuleka kunkulunkulu wabo ophakemeyo, kodwa kayikubasiza.

⁸ Ngizakukulahla kanjani, Efrayimi? Ngizakukunikela kanjani, Israyeli? Ngizakukwenza kanjani ube njengeAdima? Ngizakukuphatha kanjani njengeZeboyimi na? Inhliziyo iyala phakathi kwami, lesihawu sami siyaqubuka.

⁹ Kangiyikwenza njengokuthukuthela kwami okukhulu. Kangiyikuphinda ngimchithe uEfrayimi; ngoba mina nginguNkulunkulu, kangisuye umuntu, ngingoNgcwele ophakathi kwenu, kangiyikuza ukuchitha.

¹⁰ Bazayilandela iNkosi ezabhonga njengesilwane; yebo, izabhonga, lamadodana ayo azavela entshonalanga ngokuphangisa.

¹¹ Azavela eGibithe ngokuphangisa njengenyoni, lanjengamajuba evela elizweni laseAsiriya; ngizababuyisela emizini yabo, kutsho iNkosi.

¹² INkosi ithi: UEfrayimi ungizingelezele ngamanga, loIsrayeli ungiphahlile ngenkohliso; loJuda uyangihlamuka, mina othembekileyo loNgcwele.