UHezekhiyeli 9 - iBhayibhili Elingcwele 1978

Ukubulawa kwabalecala

¹ Ngezwa ilizwi elikhulu limemeza lisithi: Sondelani lina elibulala umuzi, lonke liphathe izikhali zenu zokuchitha.

² Kwasekusiza amadoda ayisithupha evela ngasesangweni langaphezulu elikhangele ngasenyakatho, wonke ephethe izikhali zokubulala, ayehamba lomuntu ogqoke ilembu elihle elezinto zokubhala; angena, ema ngasealtareni lethusi.

³ Inkazimulo kaNkulunkulu kaIsrayeli yasuka ngaphezu kwamakherubi lapho yayikhona, yayahlala emnyango wendlu. INkosi yasibiza umuntu owayegqoke ilembu elihle elezinto zokubhala,

⁴ yathi kuye: Dabula phakathi komuzi waseJerusalema, ufake uphawu emabunzini abantu ababubulayo bekhala ngawo wonke amanyala enziwa phakathi kwawo.

⁵ Ngezwa isithi kwabanye: Dabulani phakathi komuzi limlandele, libulale, lingayekeli, lingabi lasihawu,

⁶ libulale liqede amaxhegu, amajaha lezintombi, abantwana abancinyane labesifazana; kodwa lingathinti loyedwa olophawu, liqalise endlini yami engcwele. Baqala ngamadoda amadala ayephambi kwethempeli.

⁷ INkosi yasisithi kibo: Ngcolisani ithempeli, ligcwalise amaguma alo ngezidumbu. Phumanike. Basebephuma, babulala abantu phakathi komuzi.

⁸ Kwathi besababulala, ngasala ngedwa, ngathi mbo ngobuso, ngakhala ngathi: Hawu, Nkosi Nkulunkulu! Uzababulala bonke abaseleyo koIsrayeli ekwehliseleni kwakho ukuthukuthela phezu kweJerusalema na?

⁹ Yathi kimi: Ububi bakoIsrayeli lobakoJuda bukhulu kakhulu, ilizwe ligcwele igazi, lomuzi ugcwele ukungalungi, ngoba bathi: INkosi ilitshiyile ilizwe leli, kayiboni.

¹⁰ Lamike kangiyikubayekela, kangiyikuba lesihawu, kodwa ngizakwehlisela izenzo zabo phezu kwabo.

¹¹ Lowomuntu owayegqoke ilembu elihle elezinto zokubhala wabuya wazabika eNkosini wathi: Ngenzile njengokungilaya kwakho.