UHezekhiyeli 8 - iBhayibhili Elingcwele 1978

Ukukhonzwa kwezithombe ethempelini

¹ Kwathi ngomnyaka wesithupha, ngosuku lwesihlanu lwenyanga yesithupha, ngihlezi endlini yami, labadala bakoJuda behlezi lami, isandla seNkosi sehlela phezu kwami.

² Ngabona okwakufana lomuntu; kwakuvutha umlilo kusukela okhalweni kusiya phansi, kucwazimula njengethusi kusukela okhalweni kusiya phezulu.

³ Waseselula okwakungathi yisandla, wangibamba ngenwele. Umoya wangiphakamisela phakathi komhlaba lezulu, wangiletha ngemibono kaNkulunkulu eJerusalema, ngasentubeni yeguma elingaphakathi, elikhangele inyakatho, lapho kwakukhona isihlalo sesithombe somona esibanga umona.

⁴ Inkazimulo kaNkulunkulu kaIsrayeli yayilapho injengokuyibona kwami esihotsheni.

⁵ Wasesithi kimi: Ndoda, ake ukhangele ngasenyakatho. Ngasengikhangela ngasenyakatho, ngabona lesosithombe somona ngasenyakatho kwesango lealtare, ngasentubeni yalo.

⁶ Wasesithi kimi: Ndoda, uyakubona lokho abakwenzayo, amanyala amakhulu enziwa ngabakoIsrayeli lapha, ukungixotshela khatshana lendawo yami engcwele na? Kodwa usezakubona amanyala adlula la.

⁷ Wasengisa emnyango weguma; kwathi lapho ngikhangela, ngabona imbobo emdulini.

⁸ Wasesithi kimi: Ndoda, bhoboza umduli. Ngathi ukuba ngiwubhoboze umduli, ngabona umnyango.

⁹ Wasesithi kimi: Ngena, ubone amanyala angcolileyo abawenzayo lapha.

¹⁰ Ngasengingena, ngabona lapho kudwetshiwe emidulini inxa zonke imifanekiso yazo zonke izinto ezihahabayo, lezilo ezenyanyekayo, lazo zonke izithombe zakoIsrayeli.

¹¹ Kwakumi phambi kwazo abadala bakoIsrayeli abangamatshumi ayisikhombisa bekanye loJazaniya indodana kaShafani. Bonke babephethe indengezi zempepha, zithunqa intuthu yempepha.

¹² Wasesithi kimi: Ndoda, uyakubona lokho abakwenzayo emnyameni abadala bakoIsrayeli ezindlini zabo zemifanekiso na? Ngoba bathi: INkosi kayisiboni; iNkosi ilitshiyile ilizwe layo.

¹³ Wasesithi kimi futhi: Uzabuya ubone amanyala amakhulu ukudlula la abawenzayo.

¹⁴ Wasengisa ngasentubeni yesango langasenyakatho kwendlu yeNkosi; ngabona lapho abesifazana bekhalela unkulunkulu uTamuzi.

¹⁵ Wasesithi kimi: Uyakubona lokhu, wena ndoda na? Ng’khona usuzakubona amanyala amakhulu ukwedlula la.

¹⁶ Wangingenisa egumeni elingaphakathi kwethempeli; ngabona ngasemnyango wethempeli leNkosi phakathi komkoto lealtare abantu abangamatshumi amabili lanhlanu befulathele ithempeli leNkosi, bekhangele ngasempumalanga, bekhonza ilanga eliphumayo.

¹⁷ Wasesithi kimi: Uyakubona lokhu, wena ndoda na? Kuyinto elula koJuda ukwenza amanyala abawenzayo lapha yini, ukuba bagcwalise ilizwe ngokubi, bavuse ulaka lwami na? Khangela, babeka ingatsha empumulweni zabo.

¹⁸ Ngizabasukela ekuthukutheleni kwami. Kangiyikubayekela ngibahawukele; lanxa bekhala kakhulu, kangiyikubezwa.