UHezekhiyeli 7 - iBhayibhili Elingcwele 1978

Ukuphela sekufika

¹ Ilizwi leNkosi lafika kimi lathi:

² Ndoda, mina Nkosi uNkulunkulu ngithi elizweni lakoIsrayeli: Ukuphela kuyeza, ukuphela kuyeza emagumbini womane elizwe.

³ Ukuphela sekufikile kini, ngizakwehlisela ukuthukuthela kwami phezu kwenu, ngilithonisise ngezenzo zenu, ngehlisele phezu kwenu amanyala enu.

⁴ Kangiyikuliyekela, kangiyikulihawukela, kodwa ngizalitshaya ngenxa yezindlela zenu lapho amanyala enu esephakathi kwenu. Ng’khona lizakwazi ukuba ngiyiNkosi.

⁵ INkosi uNkulunkulu ithi: Ukuchitheka kulandela ukuchitheka. Nanku, kuyeza.

⁶ Ukuphela sekufikile, ukuphela sekufikile, sekulehlele; nanko, kuyeza.

⁷ Ukuchitheka kwakho sekufikile, wena owakhileyo elizweni; isikhathi sesifikile, losuku lusondele, usuku lokukhala olungesilo usuku lomsindo wokuthokoza phezu kwezintaba.

⁸ Ngizakwehlisela ulaka lwami phezu kwenu, ngiqedele ukuthukuthela kwami kini, ngilithonisise ngokufanele indlela zenu, ngilitshaye ngenxa yawo wonke amanyala enu.

⁹ Kangiyikuliyekela, kangiyikulihawukela, kodwa ngizalitshaya ngenxa yezenzo zenu langamanyala enu asesephakathi kwenu. Ng’khona lizakwazi ukuba ngiyiNkosi etshayayo.

¹⁰ Nanto usuku, nantu luyeza. Ukuchitheka kwenu sekufikile, ububi buyahluma, lokuziqhenya kukhahlele,

¹¹ isihluku sikhule saba yibubi. Kakuyikusala lutho lwabo, lasenothweni yabo, lasezifuyweni zabo, lasebukhosini babo.

¹² Isikhathi sesifikile, losuku lusondele. Umthengi kangathokozi, lothengisayo angazisoli, ngoba ulaka lwehlela phezu kwabo bonke.

¹³ Umthengisi kayikubuya azuze lokho akuthengisileyo besaphila bobabili; ngoba okuthengisiweyo kakuyikubuyiselwa ngenxa yesiphithiphithi; futhi kakuyikuba khona umuntu ozakuphila ngenxa yobubi bakhe.

¹⁴ Selukhalisiwe uphondo, bazilungiselela bonke, kodwa kakho ophumayo ukuya empini, ngoba ukuthukuthela kwami kwehlele phezu kwabo bonke.

¹⁵ Ngaphandle kukhona impi, ngaphakathi kukhona isifo lendlala; osegangeni ubulawa yimpi, lophakathi komuzi abulawe yindlala lesifo.

¹⁶ Uba kukhona ababalekela ezintabeni bazakuba njengamajuba avela esihotsheni; bakhale bonke bekhalela ububi babo.

¹⁷ Zonke izandla zizakuba buthakathaka, lamadolo axege.

¹⁸ Bonke bazagqoka izambatho zokulila, behlelwe yikwesaba, babanjwe zinhloni, baphuce amakhanda.

¹⁹ Bazalahlela isiliva sabo ezindleleni, legolide labo lizakuba njengento engcolileyo. Isiliva sabo legolide labo kakuyikuba lamandla okubakhulula ngosuku lokuthukuthela kweNkosi. Kabayikukudla basuthe; ngoba ububi babo buyisikhubekiso sabo.

²⁰ Babeziqhenya ngobuhle beziceciso zabo abenza ngazo imifanekiso lezithombe ezinengisayo. Ngakhoke ngizazenza zibe yizinto ezingcolileyo kibo.

²¹ Ngizakuzinikela ezandleni zabezizwe bazithumbe, lakwababi bomhlaba zibe yimpango yabo, bazakuzingcolisa.

²² Ngizafihla ubuso bami kibo ukuze bangcolise indawo yami eligugu. Abaphangi bazangena bayingcolise.

²³ Zilungiselele, ngoba ilizwe ligcwele amacala egazi, lomuzi ugcwele isihluku;

²⁴ ngizaletha izizwe ezimbi kakhulu ukuthumba izindlu zabo, ngiqede ukuziqhenya kwabo lamandla abo, kungcoliswe indawo zabo ezingcwele.

²⁵ Lapho usizi selufikile, bazadinga ukuthula, kodwa kakuyikuba khona.

²⁶ Ukuchitheka kuzalandela ukuchitheka, amahungahunga alandele amanye amahungahunga. Bazadinga umbono kumprofethi, kodwa kakusayikuba khona ukuqondisa kompristi leseluleko sabadala.

²⁷ Inkosi izakulila, lezikhulu zigewale ukudana, labantu belizwe bazathuthumela. Ngizakwenza kibo njengokufanele indlela zabo, ngibathonisise njengokufanele izahlulelo zabo; bazakwazi ukuba ngiyiNkosi.