UHezekhiyeli 5 - iBhayibhili Elingcwele 1978

¹ INkosi yathi: Ndoda, thatha umhedla obukhali, uwusebenzise njengempuco yomgeli, uwuhambise ekhanda lakho lesilevini sakho; ubusuthatha izilinganiso zokulinganisa, ulinganise inwele uzahlukanise.

² Ingxenye yesithathu uzayitshisa ngomlilo phakathi komuzi lapho insuku zokuvimbezela seziphelile. Enye ingxenye yesithathu uyithathe, uyiqumaqumele endaweni zonke zomuzi ngomhedla; lenye ingxenye yesithathu uyichithachithe emoyeni, ngizayilandela ngiphethe umhedla.

³ Uzathatha inwele eziyingcosana, uzigoqele ngomphetho wengubo yakho.

⁴ Ubusuthatha ezinye zazo, uziphosele emlilweni zitshe; umlilo uzavela kuzo utshise uIsrayeli.

⁵ INkosi uNkulunkulu ithi: Lumuzi weJerusalema ngiwumisile phakathi kwezizwe, amanye amazwe awuphahlile.

⁶ Uhlamukile imithetho yami lezimiso zami ngokwenza okubi ukwedlula ezinye izizwe lamazwe awuphahlileyo; bayilahlile imithetho yami, kabahambanga ngezimiso zami.

⁷ Ngakhoke iNkosi uNkulunkulu ithi: Njengoba lihlamukile ukwedlula izizwe eziliphahlileyo, lingalondolozi imithetho yami, lingagcini lezimiso zami, lingagcini lezimiso zezizwe eziliphahlileyo,

⁸ ngalokho iNkosi uNkulunkulu ithi: Mina sengizakulwa lani, ngizakulitshaya ukuze izizwe zonke zibone.

⁹ Ngenxa yamanyala enu wonke ngizakwenza kini engingazake ngikwenze lengingasayikukwenza futhi.

¹⁰ Ngakho oyise bazakudla abantwana babo phakathi kwenu, labantwana badle oyise. Ngizakulijezisa, labo abaseleyo ngizabachithachithela emimoyeni yonke.

¹¹ Ngakhoke ngiyazifunga, kutsho iNkosi uNkulunkulu, ngoba lingcolisile impela indlu yami engcwele ngakho konke okuzondekayo langamanyala enu wonke, ngizakulibhubhisa ngingalihawukeli, ngingaliyekeli.

¹² Ingxenye yesithathu yenu izabulawa yisifo, iqedwe yindlala phakathi kwenu; ingxenye yesithathu izabulawa yimikhonto endaweni zonke zenu; lengxenye yesithathu ngiyichithachithele emimoyeni yonke, ngiyilandele ngiphethe umkhonto.

¹³ Kuzaphelake ukuthukuthela kwami, nganelise ukufutheka kwami ngabo, bazakwazi ukuba mina, Nkosi, ngikhulumile ngomona wami lapho sengiphelelise ukufutheka kwami kibo.

¹⁴ Futhi ngizalichitha, ngilenze libe lihlazo phakathi kwezizwe eziliphahlileyo lakubo bonke abadlulayo.

¹⁵ Lizakuba lihlazo lenhlekisa lesixwayiso lento eyesabekayo ezizweni eziliphahlileyo nxa ngilijezisa ngokuthukuthela langokufutheka, ngilitshaya ngokubuhlungu; mina Nkosi ngikhulumile.

¹⁶ Lapha ngilitshoka ngemitshoko ebulalayo yendlala, imitshoko yokubhubhisa, ngizakuyitshokela ukulibhubhisa ngayo, ngizalilethela indlala nginciphise ukudla kwenu kwensuku zonke.

¹⁷ Ngizalithumela indlala lezilo zeganga, zibulale abantwana benu; isifo legazi kudabule phakathi kwenu; ngililethele impi. Mina Nkosi ngikhulumile.