UHezekhiyeli 47 - iBhayibhili Elingcwele 1978

Amanzi asethempelini aphilisayo

¹ Wasengibuyisela ngasemnyango wethempeli, ngabona amanzi egobhoza ngaphansi kwedundulu lomnyango wethempeli eqonda empumalanga, ngoba ithempeli lalikhangele impumalanga; amanzi ayegeleza ngakwesokunene ngeningizimu kwealtare.

² Wasengikhupha ngendlela yesango langasenyakatho, wangibhodisa ngaphandle kwesango elingaphandle elikhangele impumalanga. Amanzi ayegeleza ngaseningizimu.

³ Waseqonda empumalanga ephethe intambo esandleni sakhe, waselinganisa ingalo eziyizinkulungwane, wasengidabulisa phakathi kwamanzi, ayefika enqagaleni.

⁴ Waselinganisa futhi ingalo eziyizinkulungwane, wangidabulisa phakathi kwamanzi, akhawula emadolo. Walinganisa futhi ingalo eziyizinkulungwane, wangidabulisa phakathi kwamanzi, afika okhalweni.

⁵ Walinganisa futhi ingalo eziyizinkulungwane, aba ngumfula engahluleka ukuwuchapha, ngoba amanzi ayesephakeme, esilingene ukuntsheza, esengumfula owawungeke wachatshwa.

⁶ Wasesithi kimi: Ndoda, ukubonile lokhu na? Wasengibuyisela emuva enginqumisa ukhumbi lomfula.

⁷ Ekubuyeleni kwami ngabona okhunjini lomfula izihlahla ezinengi kakhulu inxa zonke.

⁸ Wasesithi kimi: Lamanzi agelezela endaweni ezingasempumalanga, aze ehlele eAraba; nxa esengena emanzini emiyo olwandle, azakuba matsha.

⁹ Lapho umfula udlula khona zonke izidalwa eziphilayo ezigcwele umhlaba zizaphila; kuzakuba khona inhlanzi ezinengi kakhulu, ngoba lamanzi eza lapho ukuba amanye enziwe abe mahle; lapho egeleza khona konke kuzakuphila.

¹⁰ Abagoli benhlanzi bazakuma phansi kolwandle, kusukela eEngedi kuze kube seEnegilayimi kuzakuba yindawo yokugola inhlanzi. Inhlanzi zalo zizakuba ngezenhlobo ezinengi njengenhlanzi zoLwandle olukhulu.

¹¹ Kodwa amatete awo lamaxhaphozi awo kawayikuba lamanzi amatsha. Azakuba zindawo zetshwayi.

¹² Enkunjini zombili zomfula kuzakhula zonke inhlobo zezihlahla ezidliwayo. Amahlamvu azo kawayikubuna, lezithelo zazo kaziyikuphutha, zizathela izithelo ezintsha inyanga zonke, ngoba amanzi azo avela endlini engcwele. Izithelo zazo zizakuba ngezokudliwa, lamahlamvu azo abe ngawokwelapha.

Imingcele yelizwe

¹³ INkosi uNkulunkulu ithi: Nansi imingcele elizakwahlukanisa ngayo izizwe zakoIsrayeli ezilitshumi lambili ilizwe libe yilifa lazo. UJosefa uzakuba lezigaba ezimbili.

¹⁴ Lizalahlukanisa ngokulinganayo; ngafunga ukulinika okhokho benu, lelilizwe lizakuba ngelenu.

¹⁵ Nanku umngcele welizwe; ngasenyakatho kusukela oLwandle olukhulu kuyedlula eHethiloni kuze kube sekungeneni eHamathi, kudlulele eZedadi,

¹⁶ leBerotha leSibiriyami, elisemngceleni phakathi kweDamaseko leHamathi, kuze kufike eHazeri‐Hatikoni elisemngceleni weHawurani.

¹⁷ Uzakuba njalo umngcele usukela olwandle usiya eHazari‐Enoni, elingasemngceleni weDamaseko ongasenyakatho, lomngcele weHamathi ngasenyakatho. Lo uzakuba ngumngcele wasenyakatho.

¹⁸ Ngasempumalanga umngcele uzasuka eHazari‐Enoni phakathi kweHawurani leDamaseko, ulandele iJordani phakathi kweGileyadi lelizwe lakoIsrayeli, uze ufike ngasolwandle olungasempumalanga uyefika eTamari. Lo uzakuba ngumngcele wasempumalanga.

¹⁹ Ngaseningizimu uzasuka eTamari uze ufike ngasemanzini aseMeribathi‐Kadeshi, usuke lapho uye ngasemfuleni waseGibithe uyefika oLwandle olukhulu. Lo uzakuba ngumngcele waseningizimu.

²⁰ Ngasentshonalanga, uLwandle olukhulu luzakuba ngumngcele ngasentshonalanga kuze kufike maqondana laseHamathi. Lo uzakuba ngumngcele wasentshonalanga.

²¹ Ngokunjaloke lizalahlukanisa ilizwe ezizweni zakoIsrayeli.

²² Lilabe libe ngelenu lelabezizwe abahlala phakathi kwenu, bezala abantwana phakathi kwenu. Bazakuba njengamadodana azalelwe koIsrayeli. Kanye lani bazakwabelwa ilizwe phakathi kwezizwe zakoIsrayeli.

²³ Lakusiphi isizwe owezizwe ahlala kiso lizakumabela lapho ilizwe lakhe, kutsho iNkosi uNkulunkulu.