UHezekhiyeli 46 - iBhayibhili Elingcwele 1978

¹ INkosi uNkulunkulu ithi: Isango leguma elingaphakathi elikhangele impumalanga, lizavalwa insuku eziyisithupha okusetshenzwa ngazo. Kodwa ngosuku lweSabatha lizavulwa lasekuthwaseni kwenyanga.

² Isikhulu sizangena endlini esekungeneni kwesango sivela ngaphandle, sime ensikeni yesango. Abapristi banikele umnikelo waso wokutshiswa leminikelo yaso yokuthula, sona sizakhonza sisedundulwini lesango. Besesiphumake, kodwa isango kaliyikuvalwa kuze kube kusihlwa.

³ Abantu belizwe bazakhonza ekungeneni kwesango phambi kweNkosi mhla weSabatha, lamhla wokuthwasa kwenyanga.

⁴ Umnikelo wokutshiswa isikhulu esizawunikela eNkosini ngeSabatha uzakuba ngamawundlu ayisithupha angelasici, lenqama engelasici.

⁵ Umnikelo wempuphu onikelwa lenqama uzakuba lihefa, lomnikelo wempuphu onikelwa lamawundlu uzakuya ngamandla aso kanye lehini yamafutha kulelo lalelohefa.

⁶ Mhla wokuthwasa kwenyanga sizanikela inkabi encinyane engelasici lamawundlu ayisithupha lenqama engelasici.

⁷ Okomnikelo wempuphu sizakunika ihefa kanye lenkunzi, lehefa kanye lenqama, okukanye lamawundlu kuzakuya ngamandla aso kanye lehini lamafutha kulelo lalelohefa.

⁸ Lapho isikhulu singena, sizangena endlini esekungeneni kwesango, siphume ngayona leyondlela.

⁹ Lapho abantu belizwe besiza phambi kweNkosi ngesikhathi semikhosi emisiweyo, lowo ongena ngesango elingasenyakatho ukukhonza uzakuphuma ngesango elingaseningizimu, lalowo ongena ngesango elingaseningizimu uzakuphuma ngesango elingasenyakatho, kakho ozakuphuma ngesango angena ngalo, kodwa uzahamba aqonde phambili.

¹⁰ Nxa bengena, lesikhulu sizangena kanye labo, lalapho bephuma, sizaphuma kanye labo.

¹¹ Ngesikhathi semikhosi langezikhathi ezimisiweyo umnikelo wempuphu onikelwa lenkunzi encinyane uzakuba lihefa, lonikelwa lenqama ube lihefa, lonikelwa lamawundlu uzakuya ngamandla omuntu kanye lehini lamafutha kulelo lalelohefa.

¹² Nxa isikhulu sinika umnikelo wesihle eNkosini, kungaba ngumnikelo wokutshiswa loba umnikelo wokuthula, sizavulelwa isango elikhangele empumalanga; sizanikela umnikelo waso wokutshiswa loba umnikelo wokuthula njengokwenza kwaso ngosuku lweSabatha. Siphumeke, nxa sesiphumile lizakuvalwa isango.

¹³ Sizanika iwundlu elingelasici elilomnyaka owodwa, libe ngumnikelo wokutshiswa eNkosini insuku zonke, silinike ekuseni.

¹⁴ Sinike lomnikelo wempuphu kanye lalo insuku zonke ekuseni, lengxenye yesithupha yehefa lengxenye yesithathu yehini lamafutha okuthambisa impuphu, kube ngumnikelo wempuphu eNkosini. Yiwo lo umlayo womnikelo wokutshiswa kokuphela.

¹⁵ Ngokunjalo kuzanikwa iwundlu lomnikelo wokutshiswa insuku zonke.

¹⁶ INkosi uNkulunkulu ithi: Uba isikhulu sinika enye indodana yaso isiphiwo empahleni yaso, sizakuba ngokwamadodana aso, ngoba kuyimpahla yabo.

¹⁷ Kodwa uba sinika enye inceku yaso isiphiwo empahleni yaso, sizakuba ngokwayo ize ikhululwe. Besesisiba ngesesikhulu; ngamadodana aso kuphela angalondoloza isiphiwo esivela empahleni yaso.

¹⁸ Isikhulu kasiyikuthatha ulutho empahleni zabantu; kasiyikubaxotsha empahleni zabo. Sizakunika amadodana aso impahla ngempahla yaso, ukuba kungabi khona omunye wabantu bami owamukwa impahla yakhe.

¹⁹ Wasengikhupha ngentuba eyayingasesangweni elingasenyakatho eqonda ngasezindlini zendawo engcwele eyahlukaniselwa abapristi. Lapho ekhomba indawo esekucineni ngasentshonalanga kwazo.

²⁰ Wathi kimi: Yiyo le indawo lapho abapristi bazaphekela khona umnikelo wecala lomnikelo wesono, lalapho bazakuphekela khona umnikelo wempuphu ukuba bangayikhupheli egumeni elingaphandle, bathelele abantu ubungcwele.

²¹ Wasengikhuphela egumeni elingaphandle, wangisa engonsini ezine zeguma; lakuleyo laleyo ingonsi yeguma kwakukhona elinye iguma.

²² Ezingonsini zozine zeguma kwakulamaguma amancinyane, ubude bawo buzingalo ezingamatshumi amane, lobubanzi bawo buzingalo ezingamatshumi amathathu; ayelingana womane.

²³ Ngaphakathi kuzingelezele lelo laleloguma, kwakulomzila wezitina, kulamaziko ngaphansi komzila indawo zonke.

²⁴ Wasesithi kimi: Le yimikulu lapho abakhonzayo ethempelini bazaphekela imihlatshelo yabantu khona.