UHezekhiyeli 45 - iBhayibhili Elingcwele 1978

Ukwahlukaniswa kwelizwe; isabelo seNkosi

¹ Ekwahlukaniseni kwenu ilizwe ngenkatho ukuba zonke izizwe zinikwe isabelo, lizakwahlukanisela iNkosi ingxenye yelizwe ibe yindawo engcwele, ubude bayo bube zingalo ezizinkulungwane ezingamatshumi amabili lanhlanu, lobubanzi bayo bube zingalo ezizinkulungwane ezingamatshumi amabili. Yonke izakuba ngcwele.

² Kulokhu indawo eyizingalo ezingamakhulu amahlanu ubude, lamakhulu amahlanu ububanzi, izakuba yindawo yendlu engcwele, ibe legceke eliyibhodayo elizingalo ezingamatshumi amahlanu.

³ Endaweni engcwele lizalinganisa isigaba, ubude baso bube zingalo ezizinkulungwane ezingamatshumi amabili lanhlanu, lobubanzi baso bube zingalo ezizinkulungwane ezilitshumi, okuzakuba khona indlu engcwele, indawo engcwele kakhulu.

⁴ Sibe yingxenye engcwele yelizwe, sizakuba ngesabapristi abakhonzayo endlini engcwele, abasondela ukukhonza iNkosi, sizakuba yindawo yezindlu zabo lendawo engcwele yendlu engcwele.

⁵ Esinye isigaba ubude baso buzingalo ezizinkulungwane ezingamatshumi amabili lanhlanu, lobubanzi baso bube zingalo ezizinkulungwane ezilitshumi, sizakuba ngesamaLevi akhonzayo ethempelini, sibe ngesemizi yawo ahlala kiyo.

⁶ Lizanika umuzi indawo phansi kwelizwe lendlu engcwele, ubude bayo bube zingalo ezizinkulungwane ezingamatshumi amabili lanhlanu, lobubanzi bayo bube zingalo ezizinkulungwane ezinhlanu, izakuba ngeyakhe wonke uIsrayeli.

⁷ Indawo esemaceleni womabili endawo engcwele lawendawo yomuzi izakuba ngeyesikhulu, lendawo eseduze lendawo engcwele leseduze lomuzi, esuka entshonalanga eqonda entshonalanga, lesuka empumalanga eqonda empumalanga, ubukhulu bayo bulingana lesinye sezigaba phakathi kwentshonalanga lempumalanga yemingcele yelizwe.

⁸ Izakuba yindawo yesikhulu koIsrayeli. Izikhulu zami kaziyikubacindezela abantu bami, kodwa zizavumela abakoIsrayeli balisebenzise ilizwe libe ngelezizwe zabo.

⁹ INkosi uNkulunkulu ithi: Kwanele, lina zikhulu zakoIsrayeli! Lahlani isihluku lokucindezela, lenze ukwahlulela lokulunga, likhawule ukuxotsha abantu bami, kutsho iNkosi uNkulunkulu.

¹⁰ Lizakuba lezilinganiso ezilungileyo, ihefa eliqondileyo letanka eliqondileyo.

¹¹ Ihefa letanka kuzakuba yizilinganiso ezifananayo, itanka libe yingxenye yetshumi yehomeri, lehefa libe yingxenye yetshumi yehomeri; ihomeri libe yisilinganiso esikhulu.

¹² Ishekeli lizakuba ngamagera angamatshumi amabili; amashekeli amahlanu abe ngamashekeli amahlanu, lamashekeli alitshumi abe ngamashekeli alitshumi, lemina yenu ibe ngamashekeli angamatshumi amahlanu.

Mayelana leminikelo lemikhosi

¹³ Nanku umnikelo abantu abazakuwunikela; ingxenye yesithupha yehefa evela kuwo wonke amahomeri amabele, lengxenye yesithupha yehefa evela kuwo wonke amahomeri ebhali,

¹⁴ lamafutha amisiweyo ingxenye yetshumi yetanka kuwo wonke amakori — ikori lilinye, lifana lehomeri, lilamatanka alitshumi —

¹⁵ imvu eyodwa emhlambini wezimvu ezingamakhulu amabili, emizini yakoIsrayeli. Nanku umnikelo weminikelo yempuphu, leminikelo yokutshiswa, leminikelo yokuthula yokubenzela ukubuyisana, kutsho iNkosi uNkulunkulu.

¹⁶ Bonke abantu belizwe bazanika isikhulu sakoIsrayeli lumnikelo.

¹⁷ Kuzakuba ngumsebenzi wesikhulu ukunika iminikelo yokutshiswa leminikelo yempuphu leminikelo yokuthululwa emikhosini, ngesikhathi sokuthwasa kwenyanga, langamaSabatha, lakuyo yonke imikhosi emisiweyo yakoIsrayeli. Sizanikela umnikelo wesono lomnikelo wempuphu lomnikelo wokutshiswa lomnikelo wokuthula ukubenzela ukubuyisana labakoIsrayeli.

¹⁸ INkosi uNkulunkulu ithi: Ngenyanga yokuqala, ngosuku lokuqala lwenyanga, uzathatha inkabi encinyane engelasici, uhlambulule indlu engcwele.

¹⁹ Umpristi uzathatha elinye igazi lomnikelo wesono, alicombe emgubazini wethempeli lasezingonsini zealtare lasezinsikeni zamasango eguma langaphakathi.

²⁰ Uzakwenza okufananayo ngosuku lwesikhombisa lwenyanga ngenxa yomuntu owonileyo ngokuphosisa langokungazi, ukuze ulenzele ithempeli ukubuyisana.

²¹ Ngenyanga yokuqala, ngosuku lwetshumi lane lwenyanga, lizakuba lomkhosi wePhasika, lidle isinkwa esingelamvubelo okwensuku eziyisikhombisa.

²² Ngalolosuku isikhulu sizazidingela kanye labo bonke abantu belizwe inkunzi ibe ngumnikelo wesono.

²³ Ngensuku eziyisikhombisa zomkhosi sizanika iNkosi inkunzi eziyisikhombisa lenqama eziyisikhombisa ezingelasici zibe ngumnikelo wokutshiswa kuzo zonke insuku eziyisikhombisa, lentondolo insuku zonke ibe ngumnikelo wesono.

²⁴ Sizanika kube ngumnikelo wempuphu ihefa libe linye ngaleyo laleyonkunzi, lehefa libe linye ngaleyo laleyonqama, lehini yamafutha kulelo lalelohefa.

²⁵ Ngenyanga yesikhombisa, ngosuku lwetshumi lanhlanu lwenyanga, lasensukwini eziyisikhombisa zomkhosi uzanika okufananayo ngomnikelo wesono lomnikelo wokutshiswa lomnikelo wempuphu lamafutha.