UHezekhiyeli 44 - iBhayibhili Elingcwele 1978

Inkonzo yethempeli elitsha

¹ Waseng buyisela ngasesangweni elingaphandle lendlu engcwele, elikhangele empumalanga, lalivaliwe.

² Wathi kimi: Isango leli lizahlala livaliwe, kaliyikuvulwa, kakuyikungena muntu ngalo; ngoba iNkosi uNkulunkulu kaIsrayeli ingene ngalo, ngakho lizakuhlala livaliwe.

³ Yisikhulu sodwa esingahlala kilo sidle isinkwa phambi kweNkosi. Sizangena ngendlela yendlu esekungeneni kwesango, siphume ngayo futhi.

⁴ Wasengihambisa ngendlela yangasesangweni elingasenyakatho, wangiletha ngaphambi kwethempeli. Ngakhangela ngabona inkazimulo yeNkosi igcwalise ithempeli leNkosi, ngathi mbo ngobuso.

⁵ INkosi yathi kimi: Ndoda, qaphelisa kuhle ubone ngamehlo akho uzwe ngendlebe zakho konke engizakukutshela khona mayelana lemithetho yethempeli leNkosi lemilayo yalo yonke. Uqaphelise kuhle labo abangavunyelwa ukungena ethempelini lalabo abazatshiywa phandle kwendlu engcwele.

⁶ Utsho kibo abakoIsrayeli abahlamukayo ukuthi iNkosi uNkulunkulu ithi: Wena Israyeli, kawaphele wonke amanyala akho,

⁷ okungenisa abezizwe labangasokanga enhliziyweni lasenyameni endlini yami engcwele liyingcolisa, lapho linikela kimi ukudla kwami, amahwahwa legazi. Futhi lisaphulile isivumelwano sami ngamanyala enu wonke.

⁸ Kalilondolozanga izinto zami ezingcwele, kodwa limisile abezizwe ukwenza umsebenzi wami endlini yami engcwele.

⁹ Ngalokho iNkosi uNkulunkulu ithi: Kakulamuntu wezizwe ongasokanga enhliziyweni lenyameni kubo bonke abezizwe abaphakathi kwabakoIsrayeli ozangena endlini yami engcwele.

¹⁰ Kodwa amaLevi asuka kimi, aya khatshana, eduhela ezithombeni zawo ekuduheni kukaIsrayeli, azathwala ukutshwaywa kwawo.

¹¹ Azakuba yizikhonzi endlini yami engcwele, alinde amasango ethempeli, asebenze ethempelini, ahlabe umnikelo wokutshiswa lomhlatshelo wabantu, akhangele abantu ukuba abasebenzele.

¹² Ngoba abasebenzela phambi kwezithombe zabo, aba yisikhubekiso sobubi kuIsrayeli, ngakho ngifungile mayelana labo ukuba azathwala ukutshaywa kwawo, kutsho iNkosi uNkulunkulu.

¹³ Kawayikusondela kimi ukuba angikhonze njengompristi, angasondeli ezintweni zami ezingcwele lezintweni ezingcwele kakhulu, kodwa azathwala ihlazo lawo ngenxa yamanyala awenzayo.

¹⁴ Kanti ngizawamisa ukulondoloza ithempeli, lokwenza umsebenzi walo lakho konke okufanele ukwenziwa kilo.

¹⁵ Kodwa abapristi abangamaLevi, amadodana kaZadoki, abalondoloza indlu yami engcwele ekuduheni kwabakoIsrayeli, bazakusondela kimi ukukhonza, beme phambi kwami ukunginika amahwahwa legazi, kutsho iNkosi uNkulunkulu.

¹⁶ Bazangena endlini yami engcwele basondele etafuleni lami ukungikhonza, bangisebenzele.

¹⁷ Nxa bengena ngamasango eguma elingaphakathi, bazagqoka izambatho ezenziwe ngelembu elihle, bangagqoki lutho olwenziwe ngoboya lapho bekhonza emasangweni eguma elingaphakathi, laphakathi ethempelini.

¹⁸ Bathwale amaqhiye enziwe ngelembu elihle emakhanda abo, bagqoke amabulukwe enziwe ngelembu elihle; kabayikuzibopha ngalutho oluginqisayo.

¹⁹ Nxa sebephumela egumeni elingaphandle besiya ebantwini, bazakhumula izambatho abebezigqoke ekukhonzeni kwabo, bazibeke ezindlini ezingcwele, bagqoke ezinye izigqoko funa bathelele abantu ubungcwele ngezambatho zabo.

²⁰ Kabayikuphuca amakhanda abo, kabayikuyekela inwele zabo zikhule zibe zinde, kodwa bazaquma inwele zamakhanda abo.

²¹ Kakulampristi ozakunatha iwayini lapho ezangena egumeni elingaphakathi.

²² Kabayikuthatha umfelwakazi loba owesifazana owehlukene lendoda, kodwa bazathatha intombi kuphela eyosendo lwakoIsrayeli, loba umfelwakazi ongumfelwakazi wompristi.

²³ Bazafundisa abantu bami umahluko phakathi kokungcwele lokungangcwele, babatshengise ukwahlukanisa phakathi kokungcolileyo lokuhlambulukileyo.

²⁴ Lapha kukhona ukuphikisana bazakwahlulela, bahlulele ngokufanele izahlulelo zami. Bazagcina imilayo yami lezimiso zami kiyo yonke imikhosi yami emisiweyo, bagcine amaSabatha ami abe ngcwele.

²⁵ Kabayikuzingcolisa ngokusondela emuntwini ofileyo. Kodwa ngaboyise langabonina, ngendodana langendodakazi, ngomfowabo langabodadewabo abangendanga bangazingcolisa.

²⁶ Emva kokungcola kwabo bazakubala insuku eziyisikhombisa besebehlambuluka.

²⁷ Mhla bengenayo endaweni engcwele, egumeni elingaphakathi, ukukhonza endaweni engcwele, bazanikela umnikelo wabo wesono, kutsho iNkosi uNkulunkulu.

²⁸ Kabayikuba lelifa, mina ngiyilifa labo; kaliyikubanika isabelo selizwe koIsrayeli; mina ngiyisabelo sabo.

²⁹ Bazakudla umnikelo wempuphu lomnikelo wesono lomnikelo wecala, konke okwahlukaniselwe iNkosi koIsrayeli kuzakuba ngokwabo.

³⁰ Okokuqala kwezithelo zenu zonke zokuqala, lokweminikelo yenu yonke yenhlobo zonke kuzakuba ngokwabaprist; linike futhi abapristi okokuqala kwempuphu yenu egayekileyo, ukuze isibusiso sehlele endlini yenu.

³¹ Abapristi kabayikudla inyoni kumbe inyamazana ezifeleyo loba ebanjwe ngenye.