UHezekhiyeli 43 - iBhayibhili Elingcwele 1978

Inkazimulo yeNkosi igcwalisa ithempeli

¹ Wasengiletha ngasesangweni, isango elikhangele impumalanga.

² Inkazimulo kaNkulunkulu kaIsrayeli yavelela ngasempumalanga, lomdumo wokuza kwakhe wawunjengowamanzi amanengi, lomhlaba wakhanya ngenkazimulo yakhe.

³ Umbono engawubonayo wawunjengombono engawubona lapho uNkulunkulu esiza ukuchitha iJerusalema, unjengombono engawubona ngasemfuleni iKebari; ngathi mbo ngobuso phansi.

⁴ Nxa inkazimulo yeNkosi ingena ethempelini ngesango elikhangele impumalanga,

⁵ umoya wangiphakamisa, wangiletha egumeni elingaphakathi; lenkazimulo yeNkosi yayigcwele ithempeli.

⁶ Lapho lowomuntu emi phansi kwami, ngezwa omunye ekhuluma lami ethempelini;

⁷ wathi kimi: Ndoda, le yindawo yesihlalo sami sobukhosi lendawo yenyawo zami, lapho ngizahlala khona phakathi kwabantu bakoIsrayeli kokuphela. AbakoIsrayeli kabasayikungcolisa ibizo lami elingcwele, bona lamakhosi abo, ngokuwula kwabo langezidumbu zamakhosi abo,

⁸ ngokumisa umbundu womnyango wabo phansi kowami, lensika zeminyango yabo phansi kwezami, sahlukaniswe ngumduli kuphela. Bangcolisile ibizo lami elingcwele ngamanyala abo abawenzileyo, ngakho ngibaqedile ngolaka lwami.

⁹ Ngakhoke kabalahle izithombe zabo lezidumbu zamakhosi abo khatshana lami, ngizakuhlala phakathi kwabo kokuphela.

Ialtare elisethempelini elitsha

¹⁰ Wenake, ndoda, tshela abakoIsrayeli ngalelithempeli, ngokukhangeleka kwalo langesimo salo, ukuba babe lenhloni ngobubi babo.

¹¹ Uba belenhloni ngakho konke abakwenzileyo, ubatshengise ithempeli, ukuma kwezinto zalo, intuba zalo zokuphuma lezokungena, lesimo salo sonke, ubatshele imithetho yalo yonke lemilayo yalo yonke. Ukubhale konke phambi kwabo ukuze bayigcine bayenze yonke imilayo yalo lemithetho yalo.

¹² Nanku umlayo wethempeli, indawo yonke esengqongeni yentaba izakuba ngcwele kakhulu. Yiwo lowo umlayo wethempeli.

¹³ Nanzi izilinganiso zealtare ngezingalo, ubude bengalo inye buyingalo lesandla; ukuphakama kwesidindi salo kuzakuba yingalo, lobubanzi baso bube yingalo, lomqolo olingana lesandla emphethweni waso. Lobu buzakuba yibude bealtare;

¹⁴ ingalo ezimbili kusukela esidindini phansi kusiya ngaphezu kwelitshe lokuqala, ububanzi buyingalo; kusukela ngaphezu kwelitshe elincinyane kusiya ngaphezu kwelitshe elikhulu kube zingalo ezine, ububanzi buyingalo.

¹⁵ Iziko lealtare libe zingalo ezine ukuphakama; kusukela eziko lealtare kusiya phezulu kulempondo ezine, ubude bazo buyingalo.

¹⁶ Iziko lealtare lizalingana inxa zonke, ubude balo bube zingalo ezilitshumi lambili, lobubanzi bube zingalo ezilitshumi lambili.

¹⁷ Umphetho walo uzalingana inxa zonke, ubude bube zingalo ezilitshumi lane, lobubanzi bube zingalo ezilitshumi lane, ube lomqolo emaceleni awo, ububanzi balo bube yingxenye yengalo, ngaphansi kube yingalo inxa zonke. Izinyathelo zealtare zizakhangela empumalanga.

¹⁸ Wasesithi kimi: Ndoda, iNkosi uNkulunkulu ithi: Nansi imithetho emayelana lokunikela ealtareni. Mhla lisakhelwa ukunikela iminikelo yokutshiselwa kilo lokukhaphazela igazi kilo,

¹⁹ uzanika abapristi abangamaLevi abosendo lukaZadoki, abasondela ukukhonza kimi inkunzi yomnikelo wesono, kutsho iNkosi uNkulunkulu.

²⁰ Uthathe elinye legazi layo, ulifake empondweni zozine zealtare, lasezingonsini zozine zompetho walo, lasemqolweni olizingelezeleyo. Ngokunjaloke uzalihlambulula ialtare, ulenzele ukubuyisana.

²¹ Uthathe inkunzi yomnikelo wesono, uyitshise endaweni elungisiweyo yethempeli ngaphandle kwendawo engcwele.

²² Ngosuku lwesibili uzanikela intondolo engelasici ibe ngumnikelo wesono; lihlambuluke ialtare njengoba lihlanjululwe ngenkunzi.

²³ Nxa usuqedile ukulihlambulula, uzanikela inkunzi engelasici lenqama engelasici ephuma emhlambini.

²⁴ Uzilethe phambi kweNkosi, abapristi bazifafaze ngetshwayi, bazinikele zibe ngumnikelo wokutshiswa eNkosini.

²⁵ Insuku eziyisikhombisa insuku zonke uzanika imbuzi ibe ngumnikelo wesono, unikele lenkunzi lenqama ezivela emhlambini zingelasici.

²⁶ Insuku eziyisikhombisa bazakwenzela ialtare ukubuyisana, balihlambulule, balenze libe ngcwele.

²⁷ Nxa seziphelile lezonsuku, kusukela osukwini lwesificaminwembili abapristi bazanikela phezu kwealtare iminikelo yenu yokutshiswa leminikelo yokuthula; ngizakulamukela, kutsho iNkosi.