UHezekhiyeli 42 - iBhayibhili Elingcwele 1978

¹ Wasengikhuphela egumeni elingaphandle, ngasenyakatho, wangisa ezindlini ezaziqondene legceke lethempeli maqondana lendlu engasenyakatho.

² Ubude bendlu eyayingasenyakatho babuzingalo ezilikhulu, lobubanzi bayo buzingalo ezingamatshumi amahlanu.

³ Endaweni eseleyo eyizingalo ezingamatshumi amabili eyayihlangene lendlu engaphakathi ledundulwini eligandelweyo elegceke elingaphandle, kwakukhona imikhandlo emithathu eyelekeneyo efananayo.

⁴ Ngaphambi kwezindlu kwakukhona indlela, ububanzi bayo buzingalo ezilitshumi, lobude bayo buzingalo ezilikhulu eyayiqonda egumeni elingaphakathi; iminyango yazo yayikhangele ngasenyakatho.

⁵ Izindlu ezingaphezulu zazinciphile kulezindlu ezingaphansi leziphakathi, ngoba imikhandlo yayiziminyanisile.

⁶ Ngoba zonke zazelekene zintathu, zingelansika njengeguma; eziphezulu zinciphile kuleziphakathi lezingaphansi.

⁷ Umduli wangaphandle ubude bawo buzingalo ezingamakhulu amahlanu, wahamba ngaphambi kwezindlu, ulinganisene lazo, ngasendaweni yeguma elingaphandle.

⁸ Izindlu ezazixhumene leguma elingaphandle ubude bazo babuzingalo ezingamatshumi amahlanu; lalezo ezazikhangelene lethempeli ubude bazo buzingalo ezilikhulu.

⁹ Ngaphansi kwalezizindlu kwakukhona umnyango ovelela ngasempumalanga lapho umuntu engena evelela egumeni elingaphandle,

¹⁰ lapho kwakuqalisa khona umduli weguma. Lasendaweni engaseningizimu, ukudlula igceke eliseleyo kanye lendlu, kwakukhona ezinye izindlu,

¹¹ kulendlela phambi kwazo. Lezizindlu zazifanana ngobude langobubanzi langesinye isimo lalezo ezikhangele inyakatho, leminyango yazo yokuphuma leyokungena eyayifana leyezindlu ezingaseningizimu.

¹² Lapho umuntu eqonda ngasempumalanga, lapho kuqalisa indlela khona, kwakulomnyango emdulini wangaphakathi.

¹³ Wasesithi kimi: Izindlu ezingasenyakatho leziqondene lazo ngaseningizimu ziyizindlu ezingcwele, lapho abapristi abeza eNkosini bazadlela khona iminikelo engcwele kakhulu; babeke khona iminikelo engcwele kakhulu, umnikelo wamabele, lomnikelo wesono, lomnikelo wecala, ngoba indawo ingcwele.

¹⁴ Lapho abapristi bengena endaweni engcwele, kabayikuphumela egumeni elingaphandle bengazibekanga lapho izambatho abakhonza ngazo, ngoba lezi zingcwele. Bazagqoka ezinye izambatho bengakasondeli eduze lalokho okungokwabantu.

¹⁵ Kwathi nxa eseqedile ukulinganisa ngaphakathi kwethempeli, wangikhupha ngesango elikhangele impumalanga, walinganisa ithempeli ngakuleyondawo.

¹⁶ Ngomhlanga wokulinganisa walinganisa indawo engasempumalanga, yaba zingalo ezingamakhulu amahlanu.

¹⁷ Wasephenduka elinganisa indawo engasenyakatho, yaba zingalo ezingamakhulu amahlanu.

¹⁸ Wasephenduka elinganisa indawo engaseningizimu, yaba zingalo ezingamakhulu amahlanu.

¹⁹ Wasephenduka elinganisa indawo engasentshonalanga, yaba zingalo ezingamakhulu amahlanu.

²⁰ Walinganisa indawo zozine. Lalilomduli olizingelezeleyo, uzingalo ezingamakhulu amahlanu ubude, lezingalo ezingamakhulu amahlanu ububanzi, ukwahlukanisa okungcwele lokungangcwele.