UHezekhiyeli 38 - iBhayibhili Elingcwele 1978

Ilizwi leNkosi ngoGogi

¹ Ilizwi leNkosi lafika kimi lathi:

² Ndoda, khangela kuGogi, isikhulu saseRoshi leMesheki leTubali, elizweni laseMagogi, utshumayele ngaye,

³ uthi: INkosi uNkulunkulu ithi: Ngimelene lawe, Gogi, sikhulu saseRoshi leMesheki leTubali.

⁴ Ngizakukuphendula, ngifake ingwegwe emihlathini yakho, ngikukhuphe wena lempi yakho yonke, amabhiza labagadi bamabhiza, bonke begqoke izigqoko zensimbi, bephelele, belixuku elikhulu, bonke bephethe amahawu lezihlangu, begweba ngemikhonto.

⁵ AbasePerisiya labaseKushi labasePuti balabo, belezihlangu lezingowane bonke,

⁶ iGomeri lamaxuku alo wonke, iBeti‐Togarima lamaxuku alo elivela endaweni ezikhatshana zasenyakatho, abantu abanengi abakanye lawe.

⁷ Lunga, uhlale ulungile, wena kanye lawo wonke amaxuku abuthene kuwe, ube ngumkhokheli wawo.

⁸ Emva kwensuku ezinengi uzakubuthwa; eminyakeni ezayo uzahlasela ilizwe elathathwa empini, elilabantu ababuthwa ezizweni ezinengi, babekwa ezintabeni zakoIsrayeli ebeziyinkangala isikhathi eside. AbakoIsrayeli abakhutshwa ezizweni bazahlala khona bangethuki, bonke ngoluthi lwabo.

⁹ Uzaqhubeka, uze njengesiphepha, ube njengeyezi elisibekele umhlaba, wena lawo wonke amaxuku akho, abantu abanengi belawe.

¹⁰ INkosi uNkulunkulu ithi: Ngalo losuku kuzafika imicabango engqondweni yakho, wenze amacebo amahi,

¹¹ uthi: Ngizahlasela ilizwe elilemizi engabiyelwanga, ngibulale abantu abahlala ngokuthula bengethuki lutho, bonke behlala emizini engelamiduli, lengelamasango lemigoqo,

¹² ngithathe impango ngiyithumbe, ngihlasele indawo ebezichithekile esezilabantu, ngihlasele abantu ababuthwe ezizweni abazuze inkomo lempahla, abahlala enkabeni yomhlaba.

¹³ ISheba leDedani labathengisi baseTarshishi layo yonke imizi yalo bazakuthi kuwe: Uzile yini ukuthatha impango na? Ubuthanisile izimpi zakho ukuthumba impango, uthathe isiliva legolide, uthathe inkomo lempahla, uthumbe impango enengi na?

¹⁴ Ngalokhoke, ndoda, tshumayela kuGogi uthi: INkosi uNkulunkulu ithi: Ngalolosuku nxa abantu bakoIsrayeli sebehlala bangethuki, uzakuvuka,

¹⁵ uphume endaweni yakini, endaweni ezikhatshana zasenyakatho, wena labantu abanengi kanye lawe, bonke begade amabhiza, belixuku elikhulu lempi elamandla.

¹⁶ Uzahlasela abantu bami bakoIsrayeli njengeyezi lisibekela umhlaba. Ensukwini zokucina ngizakukuqhubeza lelizwe lami ukuze izizwe zingazi, nxa ngibonakalisa ngawe ubungcwele bami phambi kwazo, wena Gogi.

¹⁷ INkosi uNkulunkulu ithi: Ekukhulumeni kwami ngezinceku zami abaprofethi ensukwini zasendulo, abatshumayela futhifuthi ngalezonsuku, kwakungawe engasonga ukumletha ukuhlasela koIsrayeli.

¹⁸ Kodwa ngalolosuku azakufika ngalo uGogi elizweni lakoIsrayeli, ulaka lwami luzakuvutha, kutsho iNkosi uNkulunkulu.

¹⁹ Ngoba ngomona wami langolaka lwami oluvuthayo ngithi: Ngalolosuku kuzakuba khona ukunyikinyeka okukhulu elizweni lakoIsrayeli.

²⁰ Inhlanzi zolwandle, lenyoni zaphezulu, lenyamazana zeganga, lazo zonke izinto ezihahabayo phansi, labo bonke abantu abakhona emhlabeni, kuzathuthumela phambi kwami; intaba zizadilizelwa phansi, kudilike amawa, lemiduli yonke iwele phansi.

²¹ Ngizambizela konke okwesabekayo uGogi, kutsho iNkosi uNkulunkulu. Abantu bakhe bonke bazabulalana.

²² Ngizamjezisa ngesifo langokuchitheka kwegazi, ngehlisele phezu kwakhe lamaxuku akhe labo bonke abantu abalaye izulu lesiqhotho lomlilo lesolufa.

²³ Ngalokho ngizaveza ubukhulu bami lobungcwele bami, ngizibonakalise ezizweni ezinengi; ng’khonake bazakwazi ukuba ngiyiNkosi.