UHezekhiyeli 37 - iBhayibhili Elingcwele 1978

Isihotsha samathambo omileyo

¹ Isandla seNkosi sasiphezu kwami, sangikhupha ngomoya weNkosi, sangibeka phansi esihotsheni, sasigcwele amathambo.

² Yangizulisa phakathi kwawo, ayemanengi kakhulu esihotsheni, ayomile kakhulu.

³ Yathi kimi: Ndoda, kambe amathambo la angaphila na? Ngaphendula ngathi: Nkosi Nkulunkulu, nguwe owaziyo.

⁴ Yasisithi kimi futhi: Tshumayela kulamathambo, uthi kiwo: Lina mathambo omileyo, zwanini ilizwi leNkosi.

⁵ INkosi uNkulunkulu ithi kulamathambo omileyo: Ngizangenisa umoya kini, liphile.

⁶ Ngizabeka imisipha phezu kwenu, ngihlumise inyama phezu kwenu, ngilifake isigogo, ngilifake umoya, liphile. Lizakwazi ukuba ngiyiNkosi.

⁷ Ngasengitshumayela njengokulaywa kwami. Kwathi ngisatshumayela, kwaba khona umsindo lokukhehlezela. Amathambo abuthana ndawonye, ithambo laba sethanjeni lalo.

⁸ Ngakhangela ngabona imisipha kiwo, lenyama yahluma phezu kwawo, lesigogo sawembesa. Kodwa kwakungelamoya kiwo.

⁹ Yasisithi kimi: Tshumayela emoyeni, tshumayela ndoda, uthi emoyeni: INkosi uNkulunkulu ithi: Woza moya, uvele endaweni zonke, uphefumulele kulaba ababuleweyo ukuba baphile.

¹⁰ Ngasengitshumayela njengokungilaya kwayo; umoya wangena kiwo, aphila, ema ngenyawo zawo, aba lixuku elikhulu kakhulu.

¹¹ Yasisithi kimi: Ndoda, amathambo la anguIsrayeli wonke. Khangela, bathi: Amathambo ethu omile, lethemba lethu lilahlekile, sesiphelile.

¹² Ngakhoke tshumayela uthi kibo: INkosi uNkulunkulu ithi: Ngizavula amaliba enu, ngilivuse emalibeni enu, lina bantu bami, ngilibuyise elizweni lakoIsrayeli.

¹³ Lizakwazi ukuba ngiyiNkosi nxa ngivula amaliba enu, ngilivusa emalibeni enu, bantu bami.

¹⁴ Ngizafaka umoya wami kini, liphile; ngizalibeka kwelenu ilizwe; ng’khona lizakwazi ukuba mina Nkosi ngikhulumile, lokuba ngikwenzile, kutsho iNkosi.

Ilizwi leNkosi ngokuhlanganiswa kwabakoIsrayeli labakoJuda

¹⁵ Ilizwi leNkosi lafika kimi lathi:

¹⁶ Ndoda, thatha intonga, ulobe kiyo uthi: NgekaJuda loIsrayeli ahlangene laye. Uthathe enye intonga, ulobe kiyo uthi: NgekaJosefa, intonga kaEfrayimi, laye wonke uIsrayeli ahlangene laye.

¹⁷ Uzixhume zibe yintonganye esandleni sakho.

¹⁸ Lapho abantu bakini besithi kuwe: Ungasitshela yini ukuba zitshoni lezi na?

¹⁹ uthi kibo: INkosi uNkulunkulu ithi: Sengizakuthatha intonga kaJosefa, esesandleni sikaEfrayimi, lezizwe zonke zakoIsrayeli ezihlangene laye, ngiyixhume entongeni kaJuda, zibe yintonganye esandleni sami.

²⁰ Ziphathe intonga obhala kizo ukuba abantu bazibone,

²¹ uthi kibo: INkosi uNkulunkulu ithi: Ngizathatha abantu bakoIsrayeli ezizweni abaya kizo, ngibabuyise bevela endaweni zonke, ngibalethe elizweni labo;

²² ngizabenza babe yisizwe sinye elizweni phezu kwezintaba zakoIsrayeli, babuswe yinkosinye, bangabe besaba yizizwe ezimbili lemibuso emibili eyehlukeneyo.

²³ Kabasayikuzingcolisa futhi ngezithombe zabo langezinto zabo ezenyanyekayo, langeziphambeko zabo. Kodwa ngizabakhupha kukho konke ukuhlamuka abona ngakho, ngibahlambulule babe ngabantu bami, mina ngibe nguNkulunkulu wabo.

²⁴ Inceku yami uDavida uzakuba yinkosi yabo, babe lomalusi munye. Bazalandela imithetho yami, bananzelele ukugcina izimiso zami.

²⁵ Bazahlala elizweni elalihlala okhokho benu engalinika inceku yami uJakobe; bona kanye labantwana babo labantwana babantwana babo bahlale khona kokuphela. UDavida inceku yami uzakuba yisikhulu sabo kokuphela.

²⁶ Ngizakwenza labo isivumelwano sokuthula, sibe yisivumelwano esingelakuphela. Ngizababusisa ngibandise, ngakhe indlu yami engcwele phakathi kwabo kokuphela.

²⁷ Indawo yami yokuhlala izakuba kibo, ngibe nguNkulunkulu wabo, babe ngabantu bami.

²⁸ Ng’khona izizwe zizakwazi ukuthi mina Nkosi ngenza uIsrayeli abe ngcwele nxa indlu yami engcwele isiphakathi kwabo kokuphela.