UHezekhiyeli 36 - iBhayibhili Elingcwele 1978

Ukubuyiswa kukaIsrayeli

¹ Ndoda, tshumayela ngentaba zakoIsrayeli uthi: Lina zintaba zakoIsrayeli, zwanini ilizwi leNkosi.

² INkosi uNkulunkulu ithi: Ngoba izitha zatsho kini zathi: Iya! khathesi intaba zasendulo sezingezethu;

³ ngalokhoke tshumayela uthi: INkosi uNkulunkulu ithi: Ngoba abantu abalihanqileyo balichitha, balichoboza laze lanqotshwa langezinye izizwe, laba yingxoxo lokunyeya okubi kwabantu.

⁴ Ngalokho, lina zintaba zakoIsrayeli, zwanini ilizwi leNkosi uNkulunkulu ezintabeni lasemaqaqeni, lasezindongeni lasezihotsheni, lasemizini echithekileyo langamanxiwa asephenduke impango lenhlekisa yezizwe ezizingelezeleyo.

⁵ INkosi uNkulunkulu ithi: Ngikhuluma ngomona wami otshisayo ngezinye izizwe, ikakhulu ngalo lonke iEdoma, abazithathela ilizwe lami ngokuthokoza langokudelela ukuba libe ngelabo, bahlale kilo.

⁶ Ngalokho tshumayela ngelizwe lakoIsrayeli, utsho ezintabeni lasemaqaqeni, lasezindongeni lasezihotsheni uthi: INkosi uNkulunkulu ithi: Ngikhuluma ngomona wami langolaka lwami, ngoba lithwele ihlazo lezizwe.

⁷ Ngalokhoke iNkosi uNkulunkulu ithi: Ngiyazifunga ukuthi izizwe ezilihanqileyo yizo ezizathwala ihlazo.

⁸ Kodwa, lina zintaba zakoIsrayeli, lizahluma ingatsha zenu, livezele abantu bami uIsrayeli izithelo, ngoba sebezakubuya ekhaya.

⁹ Ngoba mina ngilani, ngizaphendukela ngakini, lizalinywa lihlanyelwe.

¹⁰ Ngizakwandisa abantu phezu kwenu, uIsrayeli wonke, wonke ngoluthi lwakhe; imizi izahlala abantu, kwakhiwe lendawo ezichithekileyo;

¹¹ ngandise phezu kwenu abantu lenyamazana, kuzalane kwande. Ngizakwenza ukuba kwakhiwe kini njengakudala, ngilenzele okuhle kakhulu kulakuqala. Ngalokho, lina zintaba, lizakwazi ukuba ngiyiNkosi.

¹² Ngizahambisa abantu phezu kwenu, yebo abantu bami uIsrayeli. Bazahlala kini, libe zintaba zabo, kalisayikubabulala abantwana babo.

¹³ INkosi uNkulunkulu ithi: Abantu bathi liyilizwe elidla abantu, libulala abantwana besizwe sakini.

¹⁴ Kodwa kalisayikudla abantu, kalisayikubulalela isizwe sakini abantwana baso, kutsho iNkosi uNkulunkulu.

¹⁵ Kangisayikuliyekela lizwe inhlamba yezizwe futhi, kalisayikuthwala ihlazo labantu loba likhubekise isizwe sakini, kutsho iNkosi uNkulunkulu.

¹⁶ Ilizwi leNkosi lafika kimi lathi:

¹⁷ Ndoda, lapho uIsrayeli esahlala elizweni lakhe, walingcolisa ngendlela zakhe langezenzo zakhe, ukuziphatha kwakhe phambi kwami kwakufana lokungcola kowesifazana osemfuleni.

¹⁸ Ngakho ngasengehlisela phezu kwabo ulaka lwami ngenxa yegazi abalichitha elizweni, langenxa yezithombe abalingcolisa ngazo.

¹⁹ Ngabachithachitha phakathi kwezizwe, bahlakazekela emazweni wonke; ngabathonisisa ngokufanele ukuziphatha kwabo lezenzo zabo.

²⁰ Kodwa nxa befika ezizweni lakuyiphi indawo abafika kiyo, bangcolisa ibizo lami elingcwele, abantu baze bathi ngabo: Laba bangabantu beNkosi, kodwa bakhutshiwe elizweni layo.

²¹ Kodwa ngalikhathalela ibizo lami elingcwele abalingcolisayo abakoIsrayeli phakathi kwezizwe abaya kizo.

²² Ngalokho tshono kuIsrayeli uthi: INkosi uNkulunkulu ithi: Kangikwenzi lokhu ngenxa yenu, lina Israyeli, kodwa ngikwenza ngenxa yebizo lami elingcwele elilingcolisileyo phakathi kwezizwe elaya kizo.

²³ Ngizabonakalisa ubungcwele bebizo lami elikhulu elingcoliswe phakathi kwezizwe, elilingcolisileyo lina phakathi kwazo; lezizwe zizakwazi ukuba ngiyiNkosi, kutsho iNkosi uNkulunkulu, nxa sengibonakalisa ubungcwele bebizo lami ngani phambi kwazo.

²⁴ Ngoba ngizalithatha ezizweni, ngilibuthe emazweni wonke, ngililethe elizweni lenu.

²⁵ Ngizalifafaza ngamanzi ahlambulukileyo, lihlambuluke kukho konke ukungcola kwenu, ngilihlambulule lakuzo zonke izithombe zenu.

²⁶ Ngizalinika inhliziyo entsha, ngifake lomoya omutsha phakathi kwenu, ngikhuphe inhliziyo elukhuni kini, ngilinike inhliziyo ebuthakathaka.

²⁷ Ngizafaka umoya wami phakathi kwenu, ngilenze ukuba lihambe ngezimiso zami, lokuba linanzelele ukugcina imithetho yami.

²⁸ Lizahlala elizweni engalinika okhokho benu, libe ngabantu bami, lami ngibe nguNkulunkulu wenu.

²⁹ Ngizalikhulula kukho konke okulingcolisayo. Ngizabiza amabele, ngiwenze abe manengi, ngingalehliseli indlala.

³⁰ Ngizakwenza izithelo zezihlahla lezithelo zeganga zibe zinengi, ukuba lingaphindi futhi lithwale ihlazo lendlala phakathi kwezizwe.

³¹ Lizakhumbula izindlela zenu ezimbi, lezenzo zenu ezingalunganga; lizazizonda ngenxa yezono zenu langenxa yamanyala enu.

³² Kangikwenzi lokhu ngenxa yenu, kutsho iNkosi uNkulunkulu; kakwaziwe yini lokhu. Wobani lenhloni, liyangeke ngendlela zenu, lina Israyeli.

³³ INkosi uNkulunkulu ithi: Mhla ngilihlambulula ebubini benu bonke, ngizakwenza ukuba imizi ihlale abantu, kwakhiwe indawo ezichithekileyo.

³⁴ Ilizwe ebeselichithekile lizalinywa futhi, endaweni yokuba libe yikhangala kubo bonke abedlula khona.

³⁵ Bazakuthi: Lelilizwe ebeseliyinkangala selifana lensimu yaseEdeni; lemizi ebisichithekile isiyinkangala isingamanxiwa, isibiyiwe ihlala abantu.

³⁶ Izizwe ezisele zilizingelezele zizakwazi ukuba mina Nkosi ngizakhile indawo ezingamanxiwa, ngahlanyela kutsha ilizwe ebeseliyinkangala. Mina Nkosi ngikhulumile, ngizakukwenza.

³⁷ INkosi uNkulunkulu ithi: Lalokhu abakoIsrayeli bazangicela ukuba ngibenzele khona, ukuba ngandise abantu babo ngangomhlambi,

³⁸ ngangomhlambi womhlatshelo, ngangomhlambi eJerusalema ngesikhathi semikhosi emisiweyo. Ngokunjaloke imizi echithekileyo izagcwala abantu. Ng’khona bazakwazi ukuba ngiyiNkosi.