UHezekhiyeli 35 - iBhayibhili Elingcwele 1978

Ilizwi leNkosi ngentaba yaseSeyiri

¹ Ilizwi leNkosi lafika kimi lathi:

² Ndoda, khangela ngasentabeni yaseSeyiri, utshumayele ngayo,

³ uthi kuyo: INkosi uNkulunkulu ithi: Ngimelene lawe, wena ntaba yaseSeyiri, ngizakukuphakamisela isandla sami, ngikuchithe ube yinkangala.

⁴ Ngizachitha imizi yakho, uzakuba yinkangala; uzakwazi ukuba ngiyiNkosi.

⁵ Ngoba waba lenzondo engapheliyo, wanikela abantu bakoIsrayeli ekubulaweni ngesikhathi sokuhlupheka kwabo, ngesikhathi sokutshaywa kwabo kokucina.

⁶ Ngalokho, kutsho uNkulunkulu, ngiyazifunga mina ukuthi ngizakukunikela ekuchithekeni kwegazi, ukuchitheka kwegazi kuthomane lawe; ngoba ulecala lokuchitha igazi, ukuchitheka kwegazi kuzathomana lawe.

⁷ Ngizachitha intaba yaseSeyiri ibe yinkangala, ngiqede kiyo bonke abafikayo labasukayo.

⁸ Ngizagcwalisa intaba zakho ngababuleweyo; ababuleweyo empini bazawela emaqaqeni akho lasezihotsheni zakho lasezindongeni zakho.

⁹ Ngizakukwenza ube yinkangala engelakuphela, kungahlali muntu emizini yakho. Ng’khona uzakwazi ukuba ngiyiNkosi.

¹⁰ Ngoba utshilo wathi: Lezizizwe ezimbili, oJuda loIsrayeli, lamazwe azo kuzakuba ngokwami, sizahlala kukho, lapho iNkosi yayihlala khona;

¹¹ ngalokho ngiyazifunga, kutsho iNkosi uNkulunkulu, ngizakukuphatha ngokufanele ukuzonda kwakho lomona wakho owawenzayo ngenxa yokubazonda kwakho; ngizakwenza ukuba ungazi nxa ngikuthonisisa.

¹² Uzakwazi ukuba mina Nkosi ngizwile ukuthuka kwakho owakutsho ngezintaba zakoIsrayeli usithi: Zichithekile, zinikiwe thina ukuba sizidle.

¹³ Lakhuluma kubi ngami, landisa amazwi enu ngami, ngikuzwile.

¹⁴ INkosi uNkulunkulu ithi: Ukuze umhlaba wonke uthokoze, ngizalichitha.

¹⁵ Njengoba lathokoza ngelizwe lami uIsrayeli ngoba lachitheka, ngizakwenza njalo kuwe, uzachitheka, wena ntaba yaseSeyiri, lalo lonke iEdoma. Ng’khona bazakwazi ukuba ngiyiNkosi.