UHezekhiyeli 34 - iBhayibhili Elingcwele 1978

Ilizwi leNkosi ngabelusi bakoIsrayeli

¹ Ilizwi leNkosi lafika kimi lathi:

² Ndoda, tshumayela ngabelusi bakoIsrayeli, utshumayele uthi kibo: INkosi uNkulunkulu ithi: Maye kini, belusi bakoIsrayeli elizondlayo lina! Abelusi kabafanele ukwelusa izimvu na?

³ Liyadla amahwahwa, lizigqokise ngoboya, lihlabe ezinonileyo, kodwa lingazelusi izimvu.

⁴ Kaliziqinisanga ezibuthakathaka, kalizelaphanga ezigulayo, lezaphukileyo kalizibophanga, kalizibuyisanga eziduhileyo, lezilahlekileyo kalizidinganga, lizibusile ngamandla langolunya.

⁵ Ngakho zichithekile ngoba bekungelamalusi, zaba yikudla kwazo zonke izilo zeganga.

⁶ Izimvu zami zachitheka, zazulazula kuzo zonke intaba, lakiwo wonke amaqaqa aphakemeyo; izimvu zami zachitheka endaweni zonke zomhlaba, kungekho loyedwa ozilandelayo azidinge.

⁷ Ngalokhoke, lina belusi, zwanini ilizwi leNkosi.

⁸ INkosi uNkulunkulu ithi: Ngiyazifunga mina, ngoba izimvu zami seziyimpango, seziyikudla kwazo zonke izilo zeganga, ngoba kungelamalusi, langoba abelusi bami bengazidinganga izimvu zami, kodwa bezondlile bona, bengazelusanga izimvu zami,

⁹ ngakho, lina belusi, zwanini ilizwi leNkosi.

¹⁰ INkosi uNkulunkulu ithi: Ngimelene labelusi, ngizafuna izimvu zami kibo, ngibayekelise ukwelusa izimvu zami, bangaphindi ukuzondla bona. Ngizakhupha izimvu zami emilonyeni yabo ukuze zingabi yikudla kwabo.

¹¹ INkosi uNkulunkulu ithi: Mina uqobo lwami ngizazilandela izimvu zami, ngizidinge.

¹² Njengomalusi edinga umhlambi wakhe lapho ezinye izimvu zakhe sezichithekile, ngokunjaloke ngizadinga izimvu zami, ngizikhuphe kuzo zonke indawo lapho ezihlakazekele khona ngosuku lwamayezi lomnyama omkhulu.

¹³ Ngizazikhupha phakathi kwabantu, ngizibuthe emazweni, ngizibuyisele elizweni lazo, ngizidlise entabeni zakoIsrayeli, lasemithonjeni, lakuzo zonke indawo zelizwe okwakhiwe kizo.

¹⁴ Ngizazidlisa edlelweni elihle, ledlelo lazo lizakuba sezingqongeni zentaba zakoIsrayeli. Zizalala phansi elizweni eliledlelo elihle, zidle emadlelweni amahle ezintabeni zakoIsrayeli.

¹⁵ Mina uqobo ngizakuba ngumalusi wezimvu zami, ngizilalise phansi, kutsho iNkosi uNkulunkulu.

¹⁶ Ngizadinga ezilahlekileyo, ngibuyise eziduhileyo, ngibophe ezaphukileyo, ngiqinise ezibuthakathaka; lezinonileyo leziqinileyo ngizazilondoloza, ngizidlise ngokulunga.

¹⁷ Linake, mhlambi wami, kutsho iNkosi uNkulunkulu, ngizakwahlulela phakathi kwemvu lemvu, laphakathi kwenqama lentondolo.

¹⁸ Kakwanelanga yini ukuba lidle edlelweni elihle, lize linyathele ngenyawo ledlelo lenu eliseleyo, lokuba linathe amanzi ahlambulukileyo lize lingcolise lamanye ngenyawo zenu na?

¹⁹ Izimvu zami zimele zidle lokhu okunyathelwe ngenyawo zenu, zinathe okungcoliswe ngenyawo zenu na?

²⁰ Ngakho iNkosi uNkulunkulu ithi kuzo: Mina uqobo lwami ngizakwahlulela phakathi kwezimvu ezinonileyo lezicakileyo.

²¹ Ngoba liyasunduza ngemihlubulo langamalunda, lihlabe ezibuthakathaka ngempondo zenu, zize zihlakazekele khatshana,

²² ngizakuzisa izimvu zami, kazisayikuba yimpango; ngizakwahlulela phakathi kwemvu lemvu.

²³ Ngizazimisela umalusi abe munye, inceku yami uDavida, yena uzakuzelusa. Uzakuzidlisa abe ngumalusi wazo.

²⁴ Mina Nkosi ngizakuba nguNkulunkulu wazo, lenceku yami uDavida ibe yisikhulu phakathi kwazo. Mina Nkosi ngikhulumile.

²⁵ Ngizakwenza lazo isivumelwano sokuthula, ngixotshe izilo zeganga elizweni, ukuze zilondolozeke enkangala, zilale ehlathini.

²⁶ Ngizazenza zibe yisibusiso zona lezindawo ezihanqe intaba yami, ngithumele izulu ngesikhathi salo, izulu elihle.

²⁷ Izihlahla zeganga zizathela izithelo zazo, lomhlaba uveze inala, zilondolozeke elizweni lazo. Zizakwazi ukuba ngiyiNkosi nxa sengaphule ijogwe lazo, ngazikhulula kulabo abazithumbileyo.

²⁸ Kazisayikuba yimpango yezizwe, kazisayikudliwa yizilo zelizwe; zizalondolozeka, zingesatshiswa muntu.

²⁹ Ngizazinika amasimu avundileyo ukuze zingabe zisaqedwa yindlala elizweni, zingabe zisaba lihlazo lezizwe.

³⁰ Zizakwazi ukuba mina Nkosi, uNkulunkulu wazo, ngilazo, lokuba bona abantu bakoIsrayeli bangabantu bami, kutsho iNkosi uNkulunkulu.

³¹ Lina, bantu bami, liyizimvu zami, izimvu engizelusayo, mina nginguNkulunkulu wenu, kutsho iNkosi uNkulunkulu.