UHezekhiyeli 32 - iBhayibhili Elingcwele 1978

UFaro ufanana lengwenya

¹ Ngomnyaka wetshumi lambili, ngosuku lokuqala enyangeni yetshumi lambili, ilizwi leNkosi lafika kimi lathi:

² Ndoda, khala isililo ngoFaro inkosi yaseGibithe, uthi kuye: Wena uzifanise lesilwane phakathi kwezizwe, kodwa wena ufana lengwenya emanzini omfula iNile; uvuthela amanzi ngamakhala akho, uvube amanzi ngenyawo zakho, ungcolise imifula.

³ INkosi uNkulunkulu ithi: Ngizaphosela imbule lami phezu kwakho ekubuthaneni kwezizwe ezinengi, ngikukhuphe ngembule lami,

⁴ ngikuphosele emhlabathini, ngikuphose endaweni eligceke, ngihlalise phezu kwakho zonke inyoni zaphezulu, zonke izilo zeganga zizitike ngawe.

⁵ Ngizalahla inyama yakho ezintabeni, ngigcwalise izihotsha ngempethu zesidumbu sakho.

⁶ Ilizwe lizagcwala igazi lakho eligelezayo, lize lifike ezintabeni, lezifudlana zonke zigcwale lona.

⁷ Lapho sengikuchitha, ngizasibekela iphezulu, ngenze inkanyezi zalo zibe mnyama, ngisibekele ilanga ngeyezi, lenyanga ingabe isakhanya.

⁸ Konke ukukhanya kwaphezulu ngikwenze kube mnyama kuwe, ngehlisele umnyama elizweni lakho, kutsho iNkosi uNkulunkulu.

⁹ Ngizakhathaza inhliziyo zabantu abanengi nxa ngikuthumba phakathi kwezizwe, ngikusa emazweni ongawaziyo.

¹⁰ Ngizakwenza abantu abanengi bamangale ngawe, lamakhosi abo athuthumele ngenxa yakho nxa ngigweba umkhonto wami phambi kwabo; bazathuthumela isikhathi sonke, bonke babe lovalo ngokuphila kwabo mhla wosuku lokuwa kwakho.

¹¹ Ngoba iNkosi uNkulunkulu ithi: Umkhonto wenkosi yaseBabiloni uzakukwehlela.

¹² Ngizabulala ixuku lakho ngemikhonto yamaqhawe asabeka kuzo zonke izizwe. Azakuqeda ukuziphakamisa kweGibithe, kubhubhe lalo lonke ixuku lalo.

¹³ Ngizabulala inyamazana zonke emanzini amanengi, kungabi khona lonyawo lomuntu oluwadungayo futhi, kungabi khona lesondo lenyamazana eliwavubayo.

¹⁴ Besengisenza amanzi alo azike, lemifula yalo igeleze njengamafutha, kutsho iNkosi uNkulunkulu.

¹⁵ Lapho ngichitha ilizwe laseGibithe, lalapho ilizwe liphundlwa konke okukilo, lalapho ngitshaya bonke abahlala kilo, bazakwazike ukuba ngiyiNkosi.

¹⁶ Lokhu kuyisililo esizahlatshelwa; abesifazana bezizwe bazakusihlabela; bazakusihlabela ngeGibithe langalo lonke ixuku lalo, kutsho iNkosi uNkulunkulu.

¹⁷ Ngomnyaka wetshumi lambili, ngosuku lwetshumi lanhlanu lwenyanga yokuqala, ilizwi leNkosi lafika kimi lathi:

¹⁸ Ndoda, khalela abantu bonke baseGibithe, ubehlisele elizweni elingaphansi komhlaba kulabo abehlela egodini, bona labesifazana bezizwe ezilodumo.

¹⁹ Uthi kibo: Ledlula bani ngobuhle na? Yehlani, lilaliswe labangasokanga.

²⁰ Labo abahamba labo, kanye labo bonke abantu babo, bazakufa kanye lalabo ababulawa ngomkhonto.

²¹ Izikhulu ezilamandla zizakhuluma ngabo labasizi babo, zisendaweni zabafileyo zithi: Sebehlile, balele abangasokanga bebulewe empini.

²² IAsiriya likhona lapho kanye lexuku lalo lonke, lamaliba alo elihanqile inxa zonke, bonke babulawe empini.

²³ Amaliba abo enziwe ekutshoneni kwegodi, lexuku lalo lihanqe iliba lalo, bonke bebulewe empini, bona ababesesatshwa elizweni labaphilayo.

²⁴ Likhona lapho iElamu lexuku lalo lonke lihanqe iliba lalo, bonke bebulewe empini, behlela elizweni elingaphansi komhlaba bengasokanga, bona ababesesatshwa elizweni labaphilayo, bathwele ihlazo labo kanye labo abehlela egodini.

²⁵ Balenzela indawo yokulala phakathi kwabafileyo kanye lexuku lalo lonke, amaliba abo elihanqile, bonke bengasokanga, bebulewe empini. Ukwesabeka kwabo kwakugcwele elizweni labaphilayo, bathwala ihlazo labo kanye labo abehlela egodini, babekwa phakathi kwabafileyo.

²⁶ IMesheki leTubali zikhona lapho kanye lamaxuku azo wonke, lamaliba awo ezihanqile, bonke bengasokanga, bebulewe empini, ngoba babesesatshwa elizweni labaphilayo.

²⁷ Kabayikulala lamaqhawe afa kudala ehlela endaweni yabafileyo lezikhali zawo, aqanyeliswa imikhonto yawo, lamathambo awo endlalelwa ngezihlangu zawo; ukwesabeka kwamaqhawe kwakuselizweni labaphilayo.

²⁸ Lawe Faro uzabulawa, ulaliswe phakathi kwabangasokanga, labo ababuleweyo empini.

²⁹ IEdoma likhona lapho, kanye lamakhosi lezikhulu zalo, loba babelamandla balaliswe kanye lalabo ababuleweyo empini, belele labangasokanga labehlela phansi egodini.

³⁰ Izikhulu zasenyakatho zikhona lapho, zonke ngoluthi lwazo, labo bonke abaseSidoni, abehlele phansi kanye labafileyo belenhloni ngenxa yokwesabeka konke abakwenza ngamandla abo; balele bangasokanga kanye labo ababuleweyo empini, bethwele ihlazo labo lalabo abehlela egodini.

³¹ Lapho uFaro ebabona, uzaziduduza ngenxa yamaxuku akhe wonke, uFaro lempi yakhe yonke, bebulewe empini, kutsho iNkosi uNkulunkulu.

³² Ngoba yena owagcwalisa ukwesabeka kwakhe elizweni labaphilayo uzabekwa phakathi kwabangasokanga kanye lalabo ababuleweyo empini, uFaro lexuku lakhe lonke, kutsho iNkosi uNkulunkulu.