UHezekhiyeli 30 - iBhayibhili Elingcwele 1978

Ukuchitheka kweGibithe

¹ Ilizwi leNkosi lafika kimi lathi:

² Ndoda, tshumayela uthi: INkosi uNkulunkulu ithi: Maye ngalolosuku!

³ Usuku selusondele, usuku lweNkosi selusondele, luzakuba lusuku olulamayezi, isikhathi sokuchitheka kwezizwe.

⁴ Impi izakwehlela eGibithe, losizi lube khona eEtiyopiya, lapho abanengi bebulawa eGibithe, lenotho yalo ithunjwa, lezisekelo zalo zidilizelwa phansi.

⁵ IEtiyopiya lePuti leLudi lalo lonke iArabiya leLibiya labantu belizwe abahlangene labo bazabulawa kanye labo.

⁶ INkosi ithi: Labo abasekela iGibithe bazakufa, lamandla alo aziphakamisileyo ehliselwe phansi; kusukela eMigidoli ngasenyakatho kuze kube seSiyene ngaseningizimu bazabulawa empini, kutsho iNkosi uNkulunkulu.

⁷ Ilizwe lizachitheka ukwedlula amazwe wonke achithekileyo, lemizi yalo ibe phakathi kwemizi echithekileyo.

⁸ Ng’khona bazakwazi ukuba ngiyiNkosi, lapho sengithungele iGibithe ngomlilo labo bonke abasizi balo sebechithiwe.

⁹ Ngalolosuku izithunywa ezilesiqubu zizasuka kimi ukwesabisa amaEtiyopiya angethuswanga lutho, ehlelwe lusizi ngalolosuku lokuchitheka kwamaGibithe, ngoba usuku luyeza.

¹⁰ INkosi uNkulunkulu ithi: Ngizaqeda inotho yaseGibithe ngesandla sikaNebukadineza inkosi yaseBabiloni.

¹¹ Yena labantu bakhe, abesabeka ukwedlula izizwe zonke, bazakuza ukulichitha ilizwe; bazalihlasela iGibithe ngemikhonto yabo, bagcwalise ilizwe ngezidumbu.

¹² Ngizakwenza umfula iNile utshe, ngithengise ilizwe ebantwini ababi, ngilichithe ilizwe lakho konke okukilo ngezandla zabezizwe; mina Nkosi ngikhulumile.

¹³ INkosi uNkulunkulu ithi: Ngizakuchitha izithombe, ngiqede onkulunkulu bamanga eMemfisi; kungabe kusaba khona isikhulu elizweni laseGibithe, ngilethe ukwesaba eGibithe.

¹⁴ Ngizachitha iPatrosi, ngithungele iZowani ngomlilo, ngijezise iThebesi.

¹⁵ Ngizakwehlisela ulaka lwami phezu kweSini, eliyinqaba yaseGibithe, ngiqede ixuku laseThebesi.

¹⁶ Ngizathungela iGibithe ngomlilo, leSini ibe lobuhlungu obukhulu. Imiduli yeNo izakufohlelwa, lezimpophoma zamanzi zitheleke phakathi kwalo.

¹⁷ Amajaha aseOni lawasePibesethi azabulawa yimpi, labesifazana bathunjwe.

¹⁸ ETahafanesi ukukhanya kuzakuba mnyama, lapho ngiqeda khona ukubusa kweGibithe, lamandla aziphakamisileyo azaphela, lamayezi afike phezu kwalo, kuthunjwe lamadodakazi alo.

¹⁹ Ngokunjalo ngizalithonisisa iGibithe. Ng’khonake bazakwazi ukuba ngiyiNkosi.

²⁰ Ngomnyaka wetshumi lanye, ngosuku lwesikhombisa enyangeni yokuqala, ilizwi leNkosi lafika kimi lathi:

²¹ Ndoda, ngiyephule ingalo kaFaro inkosi yaseGibithe, kayibotshwanga, ukuba ipholiswe yikufakwa uhlaka, ukuze iqinele ukuphatha umkhonto.

²² Ngakhoke iNkosi uNkulunkulu ithi: Ngimelene loFaro inkosi yaseGibithe, ngizakwephula ingalo zakhe, ingalo eqinileyo lengalo eyaphukileyo, ngenze umkhonto uphunyuke esandleni sakhe.

²³ Ngizachithachitha amaGibithe phakathi kwezizwe, ngiwahlakazele emazweni wonke.

²⁴ Ngizaqinisa ingalo zenkosi yaseBabiloni, ngibeke umkhonto wami esandleni sayo; kodwa ngizakwaphula ingalo zikaFaro, abubule phambi kwayo njengomuntu olimele kubi.

²⁵ Ngizaqinisa ingalo zenkosi yaseBabiloni, kodwa ingalo zikaFaro zizakuwa; bazakwazi ukuba ngiyiNkosi. Nxa sengifakile umkhonto wami esandleni senkosi yaseBabiloni, izakuwuphakamisela elizweni laseGibithe;

²⁶ ngizachithachitha amaGibithe phakathi kwezizwe, ngiwahlakazele emazweni wonke. Ng’khona bazakwazi ukuba ngiyiNkosi.