UHezekhiyeli 3 - iBhayibhili Elingcwele 1978

¹ INkosi yasisithi kimi: Ndoda, dlana okunikwayo, dlana lumqulu, uhambe uyekhuluma koIsrayeli.

² Ngasengivula umlomo wami, yanginika umqulu ukuba ngiwudle.

³ Yathi kimi: Ndoda, dlana lumqulu engikunika wona, ukuba usuthe. Ngasengiwudla, waba mnandi njengoluju emlonyeni wami.

⁴ Yasisithi kimi: Ndoda, hamba uye koIsrayeli, ukhulume amazwi ami kibo.

⁵ Ngoba kangikuthumi ebantwini abakhuluma ulimi lwezizweni lolimi olulukhuni, kodwa ngikuthuma koIsrayeli.

⁶ Kangikuthumi ebantwini abakhulu abakhuluma ulimi lwezizweni lolulukhuni, abalamazwi ongeke uwezwe. Uba bengikuthuma kwabanjalo, bebezakukuzwa.

⁷ Kodwa abakoIsrayeli kabayikukuzwa, ngoba kabathandi ukungizwa mina; bonke balukhuni, kabezwa.

⁸ Kodwa lawe ngizakukwenza ufane labo, ngizakukwenza ube lukhuni njengabo, ngikwenze ukuba ungezwa njengabo.

⁹ Ngizakukwenza ube njengendayimana elukhuni kulensengentshe. Ungabesabi, ungathuthumeli ngabo ngoba bengabahlamukileyo.

¹⁰ Futhi yathi kimi: Ndoda, wonke amazwi ami engiwatshoyo kuwe amukele enhliziyweni yakho, uwezwe ngendlebe zakho.

¹¹ Suka, uye ebantwini bakini abathunjiweyo, ukhulume kibo, loba bezakukuzwa loba bengayikukuzwa, uthi: Nanka amazwi eNkosi uNkulunkulu.

¹² Umoya wasengiphakamisa; kwathi lapho ubukhosi beNkosi busuka endaweni yabo, ngezwa emva kwami umdumo unjengowokunyikinyeka komhlaba.

¹³ Kwakungumdumo wokuthintana kwempiko zezidalwa eziphilayo, lomsindo wamavili ayeseceleni kwazo, okwezwakala njengokunyikinyeka komhlaba.

¹⁴ Umoya wasengiphakamisa, wangisusa; ngahamba ngifutheka emoyeni wami, isandla seNkosi sinzima phezu kwami.

Umprofethi ngumlindi koIsrayeli

¹⁵ Ngafikake kwabathunjiweyo eTelabibi, ababehlala ngasemfuleni iKebari. Ngahlala phakathi kwabo insuku eziyisikhombisa ngithithibele.

¹⁶ Ekucineni kwensuku eziyisikhombisa ilizwi leNkosi lafika kimi,

¹⁷ lathi: Ndoda, ngikwenzile waba ngumlindi wabakoIsrayeli. Lapho usizwa ilizwi elivela kimi, ungixwayisele bona.

¹⁸ Lapho ngisithi komubi: Uzakufa impela; wena uba ungamxwayisi, loba ungakhulumi ukumxwayisa omubi endleleni yakhe embi ukuze aphephe, lowomuntu omubi uzafela ebubini bakhe; kodwa igazi lakhe ngizalibiza kuwe.

¹⁹ Kodwa uba wena umxwayisa omubi, angabuyi ebubini bakhe loba endleleni yakhe embi, uzafela ebubini bakhe; kodwa wena uzakuphepha.

²⁰ Lalapho olungileyo ephambuka ekulungeni kwakhe, enze okubi, ngibeke isikhubekiso phambi kwakhe, uzakufa. Ngoba ungamxwayisanga yena, uzafela ezonweni zakhe kuthi izenzo zakhe ezilungileyo azenzileyo zingakhunjulwa. Kodwa igazi lakhe ngizalibiza kuwe.

²¹ Kodwa lapho umxwayisa olungileyo ukuba angoni, angaze ona, uzaphila, ngoba ezwile ukuxwayisa kwakho; wena uzakuphepha.

Umprofethi waba yisimungulu

²² Isandla seNkosi saba phezu kwami lapho, yathi kimi: Sukuma, uye esigodini, ngizakhuluma kuwe khona.

²³ Ngasengisukuma ngisiya esigodini. Inkazimulo yeNkosi yayimi khona, injengenkazimulo engangiyibonile ngasemfuleni iKebari; ngathi mbo ngobuso.

²⁴ Umoya wangena kimi, wangimisa ngenyawo zami, wakhuluma kimi wathi: Hamba uyezivalela endlini yakho.

²⁵ Wenake, ndoda, uzabotshwa ngamagoda ukuze ungaphumeli ebantwini;

²⁶ ngizakwenza ukuba ulimi lwakho lunamathele olwangeni lomlomo wakho ube yisimungulu, ungabakhuzi, ngoba bayisizwe esihlamukileyo.

²⁷ Kodwa lapho sengikhuluma kuwe, ngizavula umlomo wakho, uzakuthi kibo: Nanka amazwi eNkosi uNkulunkulu. Lowo othanda ukuzwa kezwe; ongathandiyo ukuzwa angezwa; ngoba bayisizwe esihlamukileyo.