UHezekhiyeli 29 - iBhayibhili Elingcwele 1978

Ilizwi leNkosi ngeGibithe

¹ Ngomnyaka wetshumi, ngosuku lwetshumi lambili lwenyanga yetshumi, ilizwi leNkosi lafika kimi lathi:

² Ndoda, khangela ngakuFaro inkosi yaseGibithe, utshumayele ngaye langalo lonke iGibithe,

³ ukhulume uthi: INkosi uNkulunkulu ithi: Ngimelene lawe, wena Faro nkosi yaseGibithe, wena ngwenya enkulu elele phakathi kwemifula yayo, ethi: Umfula iNile ungowami, ngawenza.

⁴ Ngizafaka ingwegwe emihlathini yakho, nginamathelise inhlanzi zemifula yakho emaxolweni akho, ngikukhuphe emifuleni yakho, lazo zonke inhlanzi zemifula yakho ezinamathele emaxolweni akho.

⁵ Ngikuphosele enkangala, wena lazo zonke inhlanzi zemifula yakho, liwele egangeni lingabuthwa lingcwatshwe. Ngizakukunikela ube yikudla kwezilo zomhlaba lenyoni zaphezulu.

⁶ Bonke abakhileyo eGibithe bazakwazi ukuba ngiyiNkosi. Ngoba wawuludondolo olunjengomhlanga nje koIsrayeli,

⁷ lapho bekubamba ngesandla, wephuka, wabakhumula iziphanga, lalapho beseyama kuwe, waqamuka, wabawisela phansi.

⁸ Ngakhoke iNkosi uNkulunkulu ithi: Ngizakukulethela impi, ngiqede phakathi kwakho abantu lezinyamazana;

⁹ lelizwe laseGibithe lichitheke libe yinkangala. Ng’khona bazakwazi ukuba ngiyiNkosi. Lokhu uthe: Umfula iNile ungowami, ngiwenzile;

¹⁰ ngalokho ngimelene lawe lomfula wakho; ngizalichitha ilizwe laseGibithe libe yinkangala impela, kusukela eMigidoli ngasenyakatho kuze kube seSiyene ngaseningizimu, kuze kube lasemikhawulweni yaseEtiyopiya.

¹¹ Kakusayikudlula muntu kilo, kakusayikudlula lanyamazana; kaliyikuhlalwa muntu iminyaka engamatshumi amane.

¹² Ngizakulichitha iGibithe ukwedlula amazwe wonke achithekileyo; imizi yalo izachitheka okweminyaka engamatshumi amane phakathi kwemizi echithekileyo. Ngizawachithachitha amaGibithe phakathi kwezizwe, ngiwahlakazele phakathi kwamazwe.

¹³ INkosi uNkulunkulu ithi: Ekupheleni kweminyaka engamatshumi amane ngizabutha amaGibithe ebantwini engiwachithachithe phakathi kwabo.

¹⁴ Ngizababuyisela abantu baseGibithe elizweni lasePatrosi, ilizwe abadabuka kilo; lapho bazakuba ngumbuso ophansi.

¹⁵ Bazakuba ngumbuso ophansi kulayo yonke, bangaphindi baphakanyiswe phezu kwezinye izizwe; ngizabenza babe bancinyane kakhulu ukuba bangabusi ezinye izizwe futhi.

¹⁶ UIsrayeli angeke alithembe iGibithe futhi; lokhu kuzakubakhumbuza abakoIsrayeli izono zabo zokuya eGibithe ukucela usizo. Bazakwazi ukuba ngiyiNkosi uNkulunkulu.

¹⁷ Ngomnyaka wamatshumi amabili lesikhombisa, osukwini lokuqala lwenyanga yokuqala, ilizwi leNkosi lafika kimi lathi:

¹⁸ Ndoda, uNebukadineza inkosi yaseBabiloni walwisa impi yakhe leTire okwesikhathi eside, kwaze kwaphucuka amakhanda wonke, kwafutha amahlombe wonke; kodwa yena lempi yakhe kabazuzanga lutho eTire ngokulwa kwabo isikhathi eside.

¹⁹ Ngalokho iNkosi uNkulunkulu ithi: Ngizanikela ilizwe laseGibithe kuNebukadineza inkosi yaseBabiloni; uzathumba yonke inotho yalo, aliphundle aliphange, ayiholise impi yakhe.

²⁰ Ngimnikile ilizwe laseGibithe libe ngumvuzo womsebenzi wakhe, ngoba ungisebenzele, kutsho iNkosi uNkulunkulu.

²¹ Ngalolosuku ngizakhupha amahlumela amatsha koIsrayeli, ngikunike, wena Hezekeli, amandla okukhuluma phakathi kwabo. Bazakwazi ukuba ngiyiNkosi.