UHezekhiyeli 28 - iBhayibhili Elingcwele 1978

Ilizwi leNkosi ngenkosi yaseTire

¹ Ilizwi leNkosi lafika kimi lathi:

² Ndoda tshono kusikhulu saseTire, uthi iNkosi uNkulunkulu ithi: Ngoba inhliziyo yakho iziphakamisile, utshilo ukuthi: Mina ngingunkulunkulu, ngihlezi esihlalweni sabonkulunkulu enzikini zolwandle; kanti ungumuntu nje, kawusunkulunkulu, lanxa uzitshaya ohlakaniphileyo njengonkulunkulu.

³ Impela uhlakaniphile kuloDaneli, kakukho okufihlakeleyo kuwe.

⁴ Ngokuhlakanipha kwakho langokuqedisisa kwakho uzinothisile, wabuthela ezindlini zenotho yakho igolide lesiliva.

⁵ Ngokuhlakanipha kwakho okukhulu ekuthengeni wandisile inotho yakho, lenhliziyo yakho isizigqaja ngenotho yakho.

⁶ Ngalokho iNkosi uNkulunkulu ithi: Ngoba uzitshaya ohlakaniphileyo, njengonkulunkulu,

⁷ ngizakukulethela abezizwe, ngilethe izizwe ezesabekayo kakhulu; zizahwatsha imikhonto yazo, zichithe ubuhle bokuhlakanipha kwakho, zone udumo lwakho.

⁸ Zizakukuphosela phansi egodini, ufe kubi enzikini yolwandle.

⁹ Uzakutsho yini uthi: Ngingunkulunkulu mina, phambi kwalabo abakugwazayo, lanxa wena ungumuntu ungesuye unkulunkulu, ezandleni zalabo abakugwazayo?

¹⁰ Uzakufa njengabangasokanga ngezandla zabezizwe; ngoba sengikhulumile, kutsho iNkosi uNkulunkulu.

Isililo ngenkosi yaseTire

¹¹ Ilizwi leNkosi lafika kimi lathi:

¹² Ndoda, khala isililo ngenkosi yaseTire, uthi kiyo: INkosi uNkulunkulu ithi: Wawuyisiboniso sokupheleleyo, ugcwele ukuhlakanipha, uphelele ngobuhle.

¹³ WawuseEdeni, insimu kaNkulunkulu, ucecile ngawo wonke amatshe amahle, ngitsho ikorneliya letopazi lejaspi lekrisolite leberila leonikse lesafire lerubi le‐emeraldi. Amahlwayi akho ayengawegolide, lamasongo owawuwagqizile ayenzelwe wena ngosuku lokuzalwa kwakho.

¹⁴ Ngakunika ikherubi lokukulinda, usentabeni engcwele kaNkulunkulu; wahamba phakathi kwamatshe avutha umlilo.

¹⁵ Wawuphelele endleleni zakho, kusukela osukwini owadalwa ngalo kwaze kwafunyaniswa ububi kuwe.

¹⁶ Ngenxa yobunengi bokuthenga kwakho wagcwala ulunya, wasusona. Ngakuxotsha njengento engcolileyo entabeni kaNkulunkulu, lekherubi lokukulinda lakukhupha phakathi kwamatshe avutha umlilo.

¹⁷ Inhliziyo yakho yaziphakamisa ngenxa yobuhle bakho; wona ukuhlakanipha kwakho ngenxa yodumo lwakho. Ngakuphosa phansi, ngakuchaya phambi kwamakhosi ukuba akukhangele ngamehlo awo.

¹⁸ Ngobunengi bezono zakho zokukhohlisa kwakho ekuthengiseni ungcolise indawo zakho ezingcwele; ngaphemba umlilo phakathi kwakho, wakutshisa du, ngakutshisa waba ngumlotha emhlabathini ukuba bonke bakubone.

¹⁹ Bonke abakwaziyo phakathi kwabantu bamangala ngawe. Usuchitheke kubi, kawusayikuba khona kuze kube nininini.

Ilizwi leNkosi ngeSidoni

²⁰ Ilizwi leNkosi lafika kimi lathi:

²¹ Ndoda, khangela ngakulo iSidoni, utshumayele ngalo,

²² uthi: INkosi uNkulunkulu ithi: Ngimelene lawe, wena Sidoni, ngizabonakalisa udumo lwami phakathi kwakho. Bazakwazi ukuba ngiyiNkosi lapho sengilithonisisa, ngibonakalise ubungcwele bami kilo.

²³ Ngoba ngizathumela isifo kilo, kuchitheke legazi endleleni zalo; abantu bazakufela phakathi kwalo, bebulawa yimpi elihanqileyo inxa zonke. Ng’khona bazakwazi ukuba ngiyiNkosi.

²⁴ KoIsrayeli kakusayikuba khona ukhula oluhlabayo lameva alimazayo phakathi kwabo bonke omakhelwana babo ababenze inhlekisa. Ng’khona bazakwazi ukuba ngiyiNkosi uNkulunkulu.

²⁵ INkosi uNkulunkulu ithi: Nxa sengibutha uIsrayeli ebantwini abachithachithwe kibo, ngizabonakalisa ubungcwele bami kibo phambi kwezizwe; bazahlala elizweni labo engalinika inceku yami uJakobe.

²⁶ Bazahlala kilo belondolozekile, bakhe imizi, bahlanyele izivini. Bazahlala belondolozekile nxa sengithonisisa bonke omakhelwana babo ababenze inhlekisa. Ng’khona bazakwazi ukuba ngiyiNkosi uNkulunkulu.