UHezekhiyeli 26 - iBhayibhili Elingcwele 1978

Ilizwi leNkosi ngeTire

¹ Kwathi ngomnyaka wetshumi lanye, osukwini lokuqala lwenyanga yokuqala, ilizwi leNkosi lafika kimi lathi:

² Ndoda, iTire litshilo ngeJerusalema ukuthi: Iya! isango lezizwe selidilikile, langivulekela, sengizakunotha lokhu selichithekile.

³ Ngalokhoke iNkosi uNkulunkulu ithi: Ngimelene lawe, wena Tire, ngizakulethela izizwe ezinengi njengolwandle luletha amavinqo alo.

⁴ Zizadiliza imiduli yaseTire, zibhidlizele phansi inqaba zalo. Ngizakhukhula umhlabathi walo, ngilenze libe lidwala elingelalutho.

⁵ Lizakuba yindawo yokuchayela amambule phakathi kolwandle, ngoba ngikhulumile, kutsho iNkosi uNkulunkulu. Lizakuba yimpango yezizwe,

⁶ lamadodakazi alo phakathi kwelizwe azabulawa ngomkhonto. Ng’khonake bazakwazi ukuba ngiyiNkosi.

⁷ INkosi uNkulunkulu ithi: Ngizaletha eTire uNebukadineza inkosi yaseBabiloni, ivela enyakatho, eyinkosi yamakhosi, elamabhiza lenqola zokulwa, labagadi bamabhiza, lexuku elikhulu lamabutho.

⁸ Yena uzabulala amadodakazi akho phakathi kwelizwe ngempi, akumisele umduli wokuvimbezela, akwakhele idundulu, akuphakamisele izihlangu ezinengi.

⁹ Uzaqondisa izigodo zakhe zokudiliza emidulini yakho, adilizele phansi inqaba zakho ngamahloka akhe.

¹⁰ Ngenxa yobunengi bamabhiza akhe uthuli lwawo luzakukusibekela, lemiduli yakho izanyikinywa ngumsindo wabagadi bamabhiza lowezinqola zokulwa, nxa engena emasangweni akho njengomuntu ofohlela emzini.

¹¹ Uzanyathela indlela zakho ngamasondo amabhiza akhe, abulale abantu bakho ngomkhonto, lensika zakho eziqinileyo ziwele phansi.

¹² Bazaphanga inotho yakho, bathathe impahla yakho ethengiswayo, badilizele phansi imiduli yakho, babhidlize izindlu zakho ezinhle, baphosele emanzini amatshe akho, lezigodo zakho lomhlabathi wakho.

¹³ Ngizaqeda ukuhlatshelwa kwengoma zakho, lokukhala kwamachacho akho kakusayikuzwakala futhi.

¹⁴ Ngizakukwenza ube lidwala elingelalutho, indawo yokuchaya amambule, ungaphindi wakhiwe futhi; ngoba mina Nkosi ngikhulumile, kutsho iNkosi uNkulunkulu.

¹⁵ INkosi uNkulunkulu ithi kulo iTire: Kawayikuthuthumela yini amazwe angasolwandle ngomdumo wokuwa kwakho, lapho abagwaziweyo bebubula labafayo besifa phakathi kwakho na?

¹⁶ Ng’khonake zonke izikhulu zangasolwandle zizakwehla ezihlalweni zazo zobukhosi, zikhumule izingubo zazo, zikhuphe izambatho zazo ezicecisiweyo; zigcwale ukuthuthumela, zihlale phansi zithuthumele isikhathi sonke, zimangale zonke.

¹⁷ Zizakukulilela zithi: Yeka ukunyamalala kwakho ngasolwandle, wena muzi odumileyo, owawulamandla olwandle, wena labakhileyo kuwe, owenza ukuba wesatshwe yilo lonke ilizwe.

¹⁸ Khathesi izihlenge ziyathuthumela osukwini lokuwa kwakho, yebo, izihlenge ezisolwandle ziyamangala ngokuphela kwakho.

¹⁹ INkosi uNkulunkulu ithi: Lapho ngikwenza ube ngumuzi ochithekileyo ongaselabantu, nxa ngiletha ulwandle phezu kwakho lamanzi amanengi akusibekele,

²⁰ ng’khona ngizakukuphosela phansi kanye lalabo abehlela egodini, ebantwini basendulo, ngikwenze uhlale elizweni elingaphansi, emanxiweni asendulo, kanye lalabo abehlela egodini, ukuze kungahlali muntu kuwe, ungabi landawo elizweni labaphilayo.

²¹ Ngizakukuchitha ngendlela eyesabekayo, ungabi khona futhi; lanxa udingwa, ungafunyaniswa futhi, kutsho iNkosi uNkulunkulu.