UHezekhiyeli 24 - iBhayibhili Elingcwele 1978

Umfanekiso wembiza ebilayo

¹ Ngomnyaka wesificamunwemunye, ngosuku lwetshumi enyangeni yetshumi, ilizwi leNkosi lafika kimi lathi:

² Ndoda, bhala ibizo lalolusuku, lona lolusuku kanye, ngoba inkosi yaseBabiloni isivimbezele iJerusalema ngalona lolusuku.

³ Utsho umfanekiso ebantwini abahlamukayo uthi: INkosi uNkulunkulu ithi: Beka imbiza eziko, ibeke, uthele lamanzi futhi,

⁴ uqobele inyama kiyo, wonke amaqatha amahle, ithebe lesiphanga, uyigcwalise ngamathambo amahle.

⁵ Thatha okuhle emhlanjini, ukuthelele inkuni ngaphansi kwayo, ukuze imbiza ibile iphuphume, kuze kuvuthwe lamathambo.

⁶ Ngakhoke iNkosi uNkulunkulu ithi: Maye kuwo umuzi ogcwele igazi, kuyo imbiza ethombileyo, ukuthomba kwayo okungelakususwa! Khupha kiyo iqatha ngeqatha, ungakhethi.

⁷ Ngoba igazi umuzi olichithileyo lisekhona kuwo, ulithululele phezu kwedwala, kawulichithelanga phansi ukuligqibela ngomhlabathi.

⁸ Ukuba kuvuswe ukuthukuthela kwami, ukuba kuphindisele, ngichithele phezu kwedwala igazi olichithileyo ukuze lingagqitshelwa.

⁹ Ngakho iNkosi uNkulunkulu ithi: Maye kuwo umuzi ogcwele igazi! Lami ngizabasa umlilo omkhulu.

¹⁰ Faka izigodo, uwuphembe umlilo, uyipheke kuhle inyama, uthulule umhluzi, uyekele amathambo atshe.

¹¹ Ubusuyibeka phezu kwamalahle ingelalutho, ukuba itshise, kutshe ithusi layo, kuncibilike ingcekeza yayo, kuphele lokuthomba kwayo.

¹² Ngizidinise ngeze, ukuthomba kwayo okunengi kakusasuki ngomlilo.

¹³ Ukuthomba kwayo kungamanyala enu angcolileyo. Ngoba bengithanda ukulihlambulula, kodwa kalihlambulukanga ekungcoleni kwenu, kalisayikuhlanjululwa ngize ngikholise ukuthukuthela kwami phezu kwenu.

¹⁴ Mina Nkosi ngikhulumile. Kuzakwenzeka, ngizakukwenza. Kangiyikukuyekela, kangiyikuba lesihawu, kangiyikuphenduka. Ngizakukuthonisisa ngokufanele indlela zakho lezenzo zakho, kutsho iNkosi uNkulunkulu.

Ukufa komkaHezekeli

¹⁵ Ilizwi leNkosi lafika futhi kimi lathi:

¹⁶ Ndoda, sengizakususa othandekayo kuwe ngokuphangisa; kodwa ungalili, ungakhali, ungehlisi inyembezi.

¹⁷ Bubula, ungakhali, ungalileli abafileyo. Thwala iqhiye lakho, ufake amanyathelo enyaweni zakho, ungagubuzeli umlomo wakho, ungadli ukudla kwabalilayo.

¹⁸ Ngakho ngakhuluma labantu ekuseni, kusihlwa umkami wafa. Kwathi kusasa ngenza njengokulaywa kwami.

¹⁹ Abantu bathi kimi: Kawuyikusitshela yini ukuba lezizinto zitshoni kithi ukuba wenze nje na?

²⁰ Ngasengisithi kibo: Ilizwi leNkosi lafika kimi,

²¹ lathi: Tshono kuIsrayeli ukuthi iNkosi uNkulunkulu ithi: Ngizangcolisa indlu yami engcwele, eligugu lamandla enu, ethandekayo emehlweni enu, efiswa ngumoya wenu. Amadodana enu lamadodakazi enu eliwatshiyileyo azakubulawa yimpi.

²² Lizakwenza njengami, kaliyikugubuzela imilomo yenu, lidle ukudla kwabakhalayo.

²³ Lizathwala amaqhiye enu, lifake amanyathelo enu enyaweni zenu, lingalili likhale, kodwa lizaphela amandla ezonweni zenu, libubule omunye komunye.

²⁴ Ngalokho uHezekeli uzakuba yisibonakaliso kini, lizakwenza njengokwenza kwakhe. Lapho sekufika lokhu, lizakwazi ukuba ngiyiNkosi uNkulunkulu.

²⁵ Ndoda, ngizakususa kibo ithempeli labo eliyinqaba yabo, eliyintokozo yabo lodumo lwabo, lelithandekayo emehlweni abo, lelifiswe zinhliziyo zabo, ngisuse amadodana abo lamadodakazi abo.

²⁶ Ngalolosuku kuzafika kuwe ophunyukileyo ukukubikela izindaba.

²⁷ Ngalolosuku umlomo wakho uzavuleka kophunyukileyo, ukhulume laye, ungabe usaba yisimungulu, ube yisibonakaliso ebantwini; bazakwazi ukuba ngiyiNkosi.