UHezekhiyeli 23 - iBhayibhili Elingcwele 1978

Odade ababili

¹ Ilizwi leNkosi lafika kimi lathi:

² Ndoda, kwakukhona abesifazana ababili, amadodakazi omfazi munye.

³ Bawula eGibithe, bawula ebutsheni babo, babanjwa amabele abo lamathangazi abo.

⁴ Omdala wayethiwa nguOhola, lomnawakhe wayethiwa nguOholiba. Baba ngabami, bangizalela amadodana lamadodakazi. UOhola uliSamariya, loOholiba uliJerusalema.

⁵ UOhola wawula esesengowami, wakhanuka izithandwa zakhe amaAsiriya,

⁶ amabutho agqoke okuyibubende, lababusi lezinduna zempi, bonke bengamajaha athandekayo, labakwaziyo ukugada amabhiza.

⁷ Wawula labo, ikhethelo labantu baseAsiriya; wazingcolisa ngazo zonke izithombe zabo bonke ayebakhanuka.

⁸ Kakuyekelanga ukuwula kwakhe akwenza kusukela enzukwini zakhe eGibithe, ngoba ebutsheni bakhe amadoda alala laye, abamba amathangazi akhe, akholisa ukukhanuka kwawo kuye.

⁹ Ngalokhoke ngamnikela ezandleni zezithandwa zakhe, ezandleni zamaAsiriya awakhanukayo.

¹⁰ Wona amnqunulisa, abamba amadodana lamadodakazi akhe, ambulala ngomkhonto; waba yisiga phakathi kwabesifazana emva kokuthonisiswa kwakhe.

¹¹ Umnawakhe uOholiba wakubona lokhu, yena wayemubi kulaye ekukhanukeni kwakhe lasekuwuleni kwakhe, okwakusedlula okukadadewabo.

¹² Wakhanuka amaAsiriya, ababusi lezinduna zempi, lamabutho agqoke izigqoko zensimbi, labagadi bamabhiza abagadileyo, bonke bengamajaha abukekayo.

¹³ Ngabona ukuthi ungcolisiwe; bobabili babehamba unyawo lunye.

¹⁴ Kodwa yena wengezelela ekuwuleni kwakhe. Wabona abesilisa befanekisiwe emdulini, izithombe zamaKaladiya zifanekisiwe ngokubomvu,

¹⁵ zibotshwe ngamabhanti ezinkalweni zazo, zilamaqhiye alengayo emakhanda azo, zonke zikhangeleka njengezinduna, kungumfanekiso wamaBabiloni azalelwa eKaladiya.

¹⁶ Lapho ebabona, wabakhanuka, wabathumela izithunywa eKaladiya.

¹⁷ AmaBabiloni afika, alala laye, amngcolisa ngenkanuko zawo; emva kokungcoliswa kwakhe wawatshiya esenengiwe yiwo.

¹⁸ Lapho ewula ngokusobala, echaya ubunqunu bakhe, ngamtshiya senginengwe nguye njengalokhu ngamtshiya udadewabo.

¹⁹ Kodwa wandisa ukuwula kwakhe, wakhumbula insuku zobutsha bakhe ezokuwula kwakhe elizweni laseGibithe,

²⁰ ekhanuka izithandwa zakhe khona, ezilezitho ezifana lezabobabhemi, lenzalo yazo ifana leyamabhiza.

²¹ Ngakho wena Oholiba watshisekela amanyala obutsha bakho lapho amaGibithe ayebamba amathangazi akho lamabele akho.

²² Ngalokhoke, wena Oholiba, iNkosi uNkulunkulu ithi: Khangela, ngizakukuvusela izithandwa zakho owazitshiya usunengwa yizo, ngizilethe kuwe zivela inxa zonke,

²³ amaBabiloni lamaKaladiya wonke, amadoda asePekodi leShowa leKowa, lawo wonke amaAsiriya, amajaha abukekayo, ababusi lezinduna zamabutho, bonke ngoluthi lwabo, izinduna lamabutho, bonke begade amabhiza.

²⁴ Bazakuza kuwe bevela ngasenyakatho belenqola zokulwa lezinqola zokuthwala impahla, lexuku labantu, bakuhanqe indawo zonke belamahawu lezihlangu lengowane; ngizabanika amandla okuthonisisa, bazakukuthonisisa ngezabo indlela zokuthonisa.

²⁵ Ngizakwenzela umona ukuba bakuphathe ngolaka. Bazaquma impumulo yakho lendlebe zakho, labaseleyo emzini wakho babulawe. Bazathumba amadodana lamadodakazi akho, labaseleyo emzini wakho batshiswe ngomlilo.

²⁶ Bazakukukhumula lawe izigqoko zakho, bathathe iziceco zakho ezinhle.

²⁷ Ngokunjalo ngizaqeda amanyala akho lokuwula kwakho owasuka lakho eGibithe, ukuze ungabe usakhanuka amaGibithe futhi, uwakhumbule.

²⁸ INkosi uNkulunkulu ithi: Ngizakukunikela ezandleni zalabo obazondayo, ezandleni zalabo owabatshiya usunengiwe yibo.

²⁹ Bazakukuzonda, bakuphathe kubi, bakuthathele zonke izithelo zomsebenzi wakho, usale unqunu uze, lokuwula kwakho kuvele obala.

³⁰ Amanyala akho lokuwula kwakho kukwehlisele lokho, ngoba uwulile lezizwe, wazingcolisa ngezithombe zazo.

³¹ Ulandele indlela kadadewenu; ngalokho ngizakukunika inkezo yakhe yokujeziswa.

³² INkosi uNkulunkulu ithi: Uzanatha inkezo kadadewenu ezikileyo lebanzi; uzahlekwa ube yinhlekisa, ngoba igcwele okunengi;

³³ uzadakwa ube losizi. Inkezo kadadewenu iSamariya iyinkezo yokwesaba lokuchitheka.

³⁴ Uzakuyinatha uyibhije, uyiphahlaze ibe yizicucu, udabule amabele akho. Sengikhulumile, kutsho iNkosi uNkulunkulu.

³⁵ Ngalokho iNkosi uNkulunkulu ithi: Ngoba ungikhohliwe, wangilahla nyovane, thwala umvuzo wamanyala akho lokuwula kwakho.

³⁶ INkosi yathi kimi: Ndoda, uzathonisisa uOhola loOholiba na? Batsheleke izenzo zabo ezingamanyala.

³⁷ Ngoba bafebile, lezandla zabo zigcwele igazi. Bafebile lezithombe zabo, banikela kuzo lamadodana abangizalele wona abe yikudla kwazo.

³⁸ Futhi benze lokho kimi, bangcolisa indlu yami engcwele, bona lamaSabatha ami.

³⁹ Ngoba ekubulaleni abantwana babo ukuba babe ngumhlatshelo wezithombe zabo, bangena endlini yami engcwele bayingcolise. Yikho lokho abakwenza endlini yami.

⁴⁰ Babiza abantu ukuba beze bevela khatshana, okwathunyelwa kibo isithunywa, labo beza. Wabagezela, wacomba amehlo akho, wagqiza iziceco zakho.

⁴¹ Wahlala ethaleni elihle eliletafula phambi kwalo, owabeka kulo impepha yami lamafutha ami.

⁴² Wawumkhulu umsindo wexuku elithokozayo; kanye labantukazana kwakukhona labaseSheba ababevela enkangala, befake amasongo ezandleni zabesifazana lemiqhele emihle emakhanda abo.

⁴³ Ngasengisithi: Yeka lo owesifazana osejwayele ukufeba! Sebezakufeba laye, bafebe laye yena lo.

⁴⁴ Ngoba baye kuye njengoba kuyiwa ewuleni. Ngokunjalo baya kuOhola lakuOholiba ukwenza amanyala.

⁴⁵ Kodwa abantu abalungileyo bazabathonisisa, babagwebe ngesigwebo esifanele isifebekazi, langesigwebo esifanele abesifazana abachitha igazi; ngoba beyizifebekazi, lezandla zabo zigcwele igazi.

⁴⁶ INkosi uNkulunkulu ithi: Baletheleni ixuku, libenze into eyesabekayo lempango.

⁴⁷ Ixuku lizabakhanda ngamatshe, libaqedisele ngemikhonto yalo, lizabulala amadodana lamadodakazi abo, litshise lezindlu zabo.

⁴⁸ Ngokunjalo ngizaqeda amanyala elizweni ukuze bonke abesifazana baxwayiseke, bangenzi amanyala njengani.

⁴⁹ Amanyala enu azaphindiselwa phezu kwenu, lithwale umvuzo wokuwula kwenu okubi. Lizakwazi ukuba ngiyiNkosi uNkulunkulu.