UHezekhiyeli 22 - iBhayibhili Elingcwele 1978

Umuzi wegazi

¹ Ilizwi leNkosi lafika kimi lathi:

² Wena ndoda, uzawuthonisisa, uwuthonisise umuzi ogcwele igazi na? Wazise zonke izenzo zawo ezenyanyekayo.

³ Uzakuthi kuwo: INkosi uNkulunkulu ithi: Maye kumuzi ochitha igazi phakathi kwawo ukuba isikhathi sawo sifike, owenza izithombe ukuzingcolisa.

⁴ Wena ulecala ngegazi olichithileyo, usungcoliswe yizithombe ozenzileyo, ulusondezile eduze usuku lwakho, lesikhathi esimisiweyo seminyaka yakho sifikile. Ngalokho ngikwenzile waba lihlazo ezizweni lenhlekisa emazweni wonke.

⁵ Abaseduze labakhatshana lawe bazakuhleka, wena omubi ogcwele isiphithiphithi.

⁶ Zonke izikhulu zakoIsrayeli ezikuwe zisebenzisa amandla azo ukuchitha igazi.

⁷ Phakathi kwakho abazali benziwa inhlekisa, owezizweni uyacindezela phakathi kwakho, koniwe intandane lomfelwakazi.

⁸ Udelele izinto zami ezingcwele, wangcolisa amaSabatha ami.

⁹ Kukhona kuwe abantu abahlebayo ukuba bachithe igazi, labadlela phezu kwezintaba emathempelini, labawulayo.

¹⁰ Phakathi kwakho abantu bayanqunulisa oyise, bone abesifazana abasemazibukweni.

¹¹ Omunye wenza amanyala lomfazi womakhelwana wakhe, lomunye awule lomalokazana wakhe, omunye angcolise udadewabo, indodakazi kayise.

¹² Phakathi kwakho abantu bazuza imivuzo yokuthengwa ngokuchitha igazi; uyazinothisa ngokuthatha inzuzo lomvuzo kubomakhelwana bakho ngobuqili. Usungikhohliwe, kutsho iNkosi uNkulunkulu.

¹³ Ngalokhoke ngiyaqakeza izandla zami ngenzuzo yakho yenkohliso oyenzileyo, langegazi ebeliphakathi kwakho.

¹⁴ Isibindi sakho sizakuma yini, lezandla zakho ziqine, ensukwini engizaphathana lawe kuzo na? Mina Nkosi ngikhulumile, ngizakukwenza.

¹⁵ Ngizakukuchithachitha phakathi kwezizwe, ngikuhlakazele emazweni, ngiqede ukungcola kwakho konke kuwe.

¹⁶ Uzangcoliswa phakathi kwezizwe, uzakwazi ukuba ngiyiNkosi.

¹⁷ Ilizwi leNkosi lafika kimi lathi:

¹⁸ Ndoda, uIsrayeli wonke usenjengamanyele kimi, wonke ngoluthi lwakhe, unjengamanyele esiliva lethusi lensimbi lomnuso phakathi kwesithando.

¹⁹ Ngakhoke iNkosi uNkulunkulu ithi: Ngoba lonke selinjengamanyele, ngizalibuthelela phakathi kweJerusalema.

²⁰ Njengoba abantu bebuthelela isiliva lethusi lensimbi lomnuso esithandweni somlilo ukuba kufuthwe ngomlilo ukuze kuncibilike, ngokunjaloke ngizalibuthelela ekuthukutheleni kwami lasolakeni lwami, ngilifake phakathi, ngilincibilikise.

²¹ Ngizalibuthelela, ngilifuthe ngomlilo wokuthukuthela kwami, lincibilike phakathi komuzi.

²² Njengesiliva sincibilikiswa esithandweni somlilo, ngokunjalo lizancibilikiswa phakathi kwawo. Lizakwazi ukuba mina Nkosi ngehlisele ulaka lwami phezu kwenu.

²³ Ilizwi leNkosi lafika kimi lathi:

²⁴ Ndoda, tshono kilo iJerusalema uthi: Wena uyilizwe elingahlanjululwanga lelinganethwanga ngosuku lwentukuthelo.

²⁵ Izikhulu eziphakathi kwalo zifana lezilwane ezibhongayo leziphangayo; zibadlile abantu; zathatha inotho lezinto eziligugu; zenza abanengi baba ngabafelwakazi phakathi kwalo.

²⁶ Abapristi balo bawaphule umlayo wami, bangcolisa izinto zami ezingcwele; kabenzanga umahluko phakathi kwezinto ezingcwele lezingangcwele; futhi kabawufundisanga umahluko phakathi kwezinto ezingcolileyo lezingangcolanga, badelile amaSabatha ami; ngangcoliswa phakathi kwabo.

²⁷ Izikhulu eziphakathi kwalo zifana lempisi eziphangayo, ezichitha igazi zibulala abantu, ukuba zizuze umvuzo ngobuqili.

²⁸ Abaprofethi balo bayacomba izenzo zazo ngekalaga, babona imibono yamanga, bavumise amanga, besithi: Nanti ilizwi leNkosi uNkulunkulu; yona iNkosi ingakulumanga.

²⁹ Abantu belizwe bayaqilibezela, baphange abanye, bahluphe abayanga labaswelayo, bacindezele kakhulu abezizweni.

³⁰ Ngadinga umuntu phakathi kwabo ongakha umduli, avimbe esikhaleni phambi kwami, avikele ilizwe ukuba ngingalichithi, kodwa kangifumananga muntu.

³¹ Ngalokho ngehlisele ukuthukuthela kwami phezu kwabo, ngabaqeda ngomlilo wolaka lwami, ngaphindisela indlela yabo kibo, kutsho iNkosi uNkulunkulu.