UHezekhiyeli 20 - iBhayibhili Elingcwele 1978

Ukuhlamuka kukaIsrayeli uNkulunkulu

¹ Kwathi ngomnyaka wesikhombisa, ngosuku lwetshumi enyangeni yesihlanu, abadala abathile bakoIsrayeli beza ukubuza eNkosini, bahlala phambi kwami.

² Ilizwi leNkosi lafika kimi lathi:

³ Ndoda, khuluma kwabadala bakoIsrayeli, uthi kibo: INkosi uNkulunkulu ithi: Kambe lizile ukubuza kimi na? Ngiyazifunga, kutsho iNkosi uNkulunkulu, kangiyikubuzwa yini.

⁴ Uzabathonisisa, ndoda, uzabathonisisa na? Ngakho batshele amanyala abokhokho babo,

⁵ uthi kibo: INkosi uNkulunkulu ithi: Ngosuku engakhetha ngalo abakoIsrayeli, ngafunga kuyo inzalo kaJakobe, ngazibonakalisa kibo elizweni laseGibithe, ngafunga kibo ngathi: Mina ngiyiNkosi uNkulunkulu wenu.

⁶ Ngalolosuku ngafunga kibo ukuba ngibakhuphe elizweni laseGibithe, ngibese elizweni engabadingela lona, ilizwe eligcwele uchago lenyosi, ilizwe elihle kulawo wonke amazwe.

⁷ Ngathi kibo: Lahlani izinto ezenyanyekayo elizibukayo lina lonke, lingazigcolisi ngezithombe zaseGibithe. NgiyiNkosi uNkulunkulu wenu.

⁸ Kodwa bangihlamuka, kabaze bangilalela. Bonke kabazilahlanga izinto ezenyanyekayo ababezibuka, kabazitshiyanga lezithombe zaseGibithe. Ngasengisithi ngizakwehlisa ukuthukuthela kwami phezu kwabo, ngibaqede ngolaka lwami phakathi kwelizwe laseGibithe.

⁹ Kodwa kangikwenzanga ngenxa yebizo lami ukuba lingangcoliswa phambi kwezizwe ababehlala phakathi kwazo, engaziveza kibo phambi kwazo ukuba ngibakhuphe eGibithe.

¹⁰ Ngakhoke ngabakhupha elizweni laseGibithe, ngabesa enkangala.

¹¹ Ngabanika izimiso zami, ngabatshengisa lemithetho yami, umuntu azaphila ngayo uba eyenza.

¹² Futhi ngabanika amaSabatha ami ukuba abe yisibonakaliso phakathi kwami labo, ukuba bazi ukuthi mina Nkosi ngiyabenza babe ngcwele.

¹³ Kodwa abakoIsrayeli bangihlamuka enkangala, kabahambanga ngezimiso zami, bala imithetho yami, umuntu azaphila ngayo uba eyenza, lamaSabatha ami bawangcolisa kakhulu. Ngasengisithi ngizakwehlisela ukuthukuthela kwami phezu kwabo enkangala, ngibaqede nya.

¹⁴ Kodwa kangikwenzanga ngenxa yebizo lami ukuba lingangcoliswa phambi kwezizwe engabakhupha phambi kwazo.

¹⁵ Futhi ngafunga kibo enkangala ukuba kangiyikubaletha elizweni engangilinike bona, ilizwe eligcwele uchago lenyosi, ilizwe elihle kulawo wonke amazwe,

¹⁶ ngoba bala imithetho yami, kabahambanga ngezimiso zami, bangcolisa amaSabatha ami, ngoba inhliziyo zabo zathanda izithombe zabo.

¹⁷ Kanti ngabahawukela, kangibabhubhisanga ngabaqeda nya enkangala.

¹⁸ Ngatsho kubantwana babo enkangala ngathi: Lingahambi ngezimiso zaboyihlo, lingagcini imithetho yabo, lingazingcolisi ngezithombe zabo.

¹⁹ Mina Nkosi nginguNkulunkulu wenu. Hambani ngezimiso zami, liqaphelise ukugcina imithetho yami,

²⁰ lihloniphe amaSabatha ami ukuba abe yisibonakaliso phakathi kwami lani, ukuba lazi ukuthi ngiyiNkosi uNkulunkulu wenu.

²¹ Kodwa labantwana bangihlamuka, kabaze bahamba ngezimiso zami, kabaqaphelisanga ukugcina imithetho yami, umuntu azaphila ngayo uba eyenza; bawangcolisa amaSabatha ami. Ngasengisithi ngizakwehlisela ukuthukuthela kwami phezu kwabo, ngibaqede ngolaka lwami enkangala.

²² Kodwa ngazinqanda ngenxa yebizo lami, ukuba lingangcoliswa phambi kwezizwe engangibakhuphe phambi kwazo.

²³ Ngafunga kibo futhi enkangala ukuthi ngizabachithachitha phakathi kwezizwe, ngibahlakazele emazweni wonke,

²⁴ ngoba bengayenzanga imithetho yami, bezalile izimiso zami, bangcolisa amaSabatha ami, bathanda ukukhonza izithombe zokhokho babo.

²⁵ Futhi ngabanika izimiso ezazingalunganga lemithetho ababengeke baphile ngayo;

²⁶ ngabayekela ukuba bazingcolise ngeminikelo yabo uqobo, lokuba banikele ngamazibulo abo wonke ngokuwatshisa ngomlilo ukuze ngibesabise. Ngakwenza lokho ukuba bazi ukuba ngiyiNkosi.

²⁷ Ngalokho, ndoda, khuluma labakoIsrayeli, uthi kibo: INkosi uNkulunkulu ithi: Lakulokho futhi okhokho benu bangihlambaza ngokungikhohlisa.

²⁸ Ngoba ngathi sengibalethile elizweni engangifunge ukubanika lona, kwathi lapho bebona intaba eziphakemeyo lezihlahla ezilamahlamvu amanengi, banikela imihlatshelo yabo lapho, kanye leminikelo eyangithukuthelisayo: banikela lapho iminikelo elephunga elihle, leminikelo yokuthululwa.

²⁹ Ngathi kibo: Iyini indawo ephakemeyo yokukhonzela eliya kiyo na? Ngakho ibizo layo lithiwa yiNdawo ephakemeyo yokukhonzela kuze kube lamuhla.

³⁰ Ngalokhoke tshono kwabakoIsrayeli uthi: INkosi uNkulunkulu ithi: Lisazingcolisa njengokhokho benu, lilandele izinto zabo ezenyanyekayo na?

³¹ Lapho linikela iminikelo yenu, linikela abantwana benu ngokubatshisa ngomlilo, liyazingcolisa ngezithombe zenu zonke kuze kube lamhla. Ngizabuzwa yini, Israyeli na? Ngiyazifunga, kutsho iNkosi uNkulunkulu, kangiyikubuzwa yini.

³² Umcabango elilawo kawuyikwenzeka othi: Asifane lezizwe, labantu bamanye amazwe abakhonza isigodo lelitshe.

³³ Ngiyazifunga, kutsho iNkosi uNkulunkulu, impela ngizalibusa ngesandla esilamandla lengalo eqinileyo langolaka lwami;

³⁴ ngilikhuphe phakathi kwezizwe, ngiliqoqe lasemazweni lapho lichithachithelwe khona ngesandla esilamandla langengalo eqinileyo langolaka lwami,

³⁵ ngililethe enkangala yezizwe, ngilithonisise lapho sikhangelene ubuso lobuso.

³⁶ Njengalokhu ngabathonisisa labokhokho benu enkangala yelizwe laseGibithe, ngokunjalo ngizalithonisisa lani, kutsho iNkosi uNkulunkulu.

³⁷ Ngizalidlulisa ngaphansi kwentonga, ngilingenise esivumelwaneni,

³⁸ ngikhuphe phakathi kwenu abahlamukayo labo bonke abonayo kimi, ngibakhuphe elizweni abahlala kilo, kodwa kabayikungena elizweni lakoIsrayeli. Ng’khona lizakwazi ukuba ngiyiNkosi.

³⁹ Linake, Israyeli, kutsho iNkosi uNkulunkulu, hambani lonke liyekhonza izithombe zenu! Kodwa ngithi lizangilalela ekucineni; lizayekela ukungcolisa ibizo lami elingcwele ngeminikelo yenu langezithombe zenu.

⁴⁰ Ngoba entabeni engcwele, entabeni ende yakoIsrayeli, kutsho iNkosi uNkulunkulu, lapho bonke abakoIsrayeli, bonke ngoluthi lwabo, bazangikhonza elizweni; ngizabamukela khona, ngibize khona iminikelo yenu, leziphiwo zenu ezinhle, lakho konke okungcwele kwenu.

⁴¹ Ngizalamukela njengephunga elimnandi nxa ngilikhupha ezizweni, ngiliqoqa emazweni lapho belichithachithelwe khona; ngizabonakalisa ubungcwele bami phakathi kwenu phambi kwezizwe.

⁴² Lizakwazi ukuba ngiyiNkosi lapho sengilibuyise elizweni lakoIsrayeli, ilizwe engafunga ukulinika okhokho benu.

⁴³ Laphoke lizakhumbula indlela zenu lezenzo zenu zonke elazingcolisa ngazo; lizazizonda ngenxa yazo zonke izinto ezimbi elazenzayo.

⁴⁴ Lizakwazi ukuba ngiyiNkosi nxa ngiliphatha ngenxa yebizo lami, ngingaliphathi ngokwendlela zenu ezimbi langokwezenzo zenu ezimbi, lina bakoIsrayeli, kutsho iNkosi uNkulunkulu.

Ilizwi leNkosi ngeningizimu

⁴⁵ Ilizwi leNkosi lafika kimi lathi:

⁴⁶ Ndoda, khangelisa ubuso bakho ngaseningizimu, utshumayele ngeningizimu, utshumayele ngelizwe lamagusu eliseNegebi.

⁴⁷ Uthi kilo igusu laseNegebi: Zwana ilizwi leNkosi. INkosi uNkulunkulu ithi: Ngizaphemba umlilo phakathi kwakho ozatshisa zonke izihlahla eziluhlaza ezikuwe lezihlahla ezomileyo; ilangabi elivuthayo kaliyikucimeka, lizatshisa konke kusukela eningizimu kuze kufike enyakatho.

⁴⁸ Bonke abantu bazabona ukuthi mina Nkosi ngiwuphembile, kawuyikucimeka.

⁴⁹ Ngasengisithi: Hawu, Nkosi Nkulunkulu! sebesithi ngami: Yena kasumqambi wemifanekiso na?