UHezekhiyeli 2 - iBhayibhili Elingcwele 1978

Ukubizwa kukaHezekeli

¹ Lathi kimi: Ndoda, sukuma ume ngenyawo, ngizakhuluma kuwe.

² Lisakhuluma lami kwangena kimi umoya; wangimisa ngenyawo zami; ngalilalela likhuluma,

³ lathi kimi: Ndoda, ngiyakuthuma ebantwini bakoIsrayeli, esizweni esihlamukayo, esingivukelayo. Bona labokhokho babo bonile kimi kuze kube lamuhla.

⁴ Lalesisizukulwana engikuthuma kiso silukhuni, kasizwa lapho usithi kiso: Nanka amazwi eNkosi uNkulunkulu;

⁵ bazakwazi ukuthi kukhona umprofethi phakathi kwabo loba belalela, loba bengalaleli, ngoba bayisizwe esihlamukayo.

⁶ Ndoda, ungabesabi, ungawesabi lamazwi abo, lanxa usemeveni, uhlezi phezu kwabofezela. Ungawesabi amazwi abo, ungabesabi, ngoba bayisizwe esihlamukayo.

⁷ Uzakhuluma amazwi ami kibo, loba besizwa loba bengezwa; ngoba bayisizwe esihlamukayo.

⁸ Kodwa wena ndoda, zwana engikutshoyo kuwe; ungabi ngohlamukayo njengalesisizwe esihlamukayo; vula umlomo wakho, udle engikunika khona.

⁹ Kwathi lapho ngikhangela, ngabona isandla eselulelwe kimi siphethe umqulu wencwadi.

¹⁰ Sawusombulula phambi kwami, wawubhaliwe ngaphakathi langaphandle amazwi okulila lokukhala lokububula.