UHezekhiyeli 19 - iBhayibhili Elingcwele 1978

Isililo ngezikhulu zakoIsrayeli

¹ Khala isililo ngezikhulu zakoIsrayeli,

² uthi: Yeka isilwanekazi esasingunyoko! Salala phakathi kwezilwane, sondla imidlwane yaso.

³ Sakhulisa omunye wemidlwane yaso, waba yisilwane, wafunda ukubamba impango, wadla abantu.

⁴ Izizwe zahlabelana umkhosi ngawo, wawela emgodini wazo, zawukhupha ngezingwegwe, zawusa elizweni laseGibithe.

⁵ Nxa sibona ukuba sahlulekile, lokuba ithemba laso liphelile, sathatha omunye wemidlwane yaso, sawenza waba yisilwane.

⁶ Wahambahamba phakathi kwezilwane, waba yisilwane, wafunda ukubamba impango, wadla abantu.

⁷ Wabhidliza inqaba zabo, wachitha imizi yabo. Ilizwe lamangala labo bonke ababekilo ngenxa yokubhonga kwawo.

⁸ Izizwe zaseziwuhlasela zivela emazweni awuzingelezelayo; zaphosela amambule azo phezu kwawo, wawela emgodini wazo.

⁹ Zawufaka endlwaneni ngezingwegwe, zawusa enkosini yaseBabiloni, zawuvalela enqabeni ukuze ilizwi lawo lingabe lisazwakala futhi phezu kwentaba zakoIsrayeli.

¹⁰ Unyoko wayenjengesihlahla sevini esivinini esigxunyekwe ngasemanzini, esilezithelo lamahlamvu amanengi ngenxa yamanzi amanengi.

¹¹ Isigodo saso esiqinileyo saba yintonga yombusi; isihlahla sasiside siphakeme phakathi kwengatsha eziqatha, sibonakala ngobude baso langobunengi bengatsha zaso.

¹² Kodwa isihlahla sevini sasitshunwa ngokuthukuthela, saphoselwa phansi, lomoya wasempumalanga wasomisa, lezithelo zaso zaphephuka, isigodo saso esiqinileyo soma, umlilo wasitshisa.

¹³ Khathesi sesigxunyekwe enkangala, elizweni elitshisayo lelomileyo.

¹⁴ Umlilo ulumethe esigodweni saso, watshisa ingatsha zaso lezithelo zaso, ukuze kungasali isigodo esiqinileyo sokwenza intonga yombusi. Lesi yisililo esesisetshenziswa.