UHezekhiyeli 17 - iBhayibhili Elingcwele 1978

Umfanekiso wokhozi levini

¹ Ilizwi leNkosi lafika kimi lathi:

² Ndoda, tshono umzekeliso, ukhulume ngomfanekiso kuIsrayeli,

³ uthi: INkosi uNkulunkulu ithi: Ukhozi olukhulu olulempiko ezinkulu lensiba ezinde, lensiba ezinengi zemibala eminengi, lwafika eLebanoni, lwathatha isihloko sesihlahla somkusu,

⁴ lwephula insaba zawo eziphezulu, lwazithatha lwazisa elizweni labathengi, lwazibeka emzini wabathengisi.

⁵ Lwaseluthatha inhlanyelo yalelolizwe, lwayihlanyela emhlabathini ovundileyo, lwayibeka ngasemanzini amanengi. Lwayigxumeka njengosaba lomdubu,

⁶ yahluma, yaba livini elinabayo, ingatsha zalo zaqonda phezulu okhozini, impande zalo zagxumeka. Laba livini, lakhupha ingatsha, lahluma amahlamvu.

⁷ Kodwa kwakukhona olunye ukhozi olukhulu, olulempiko ezinkulu lensiba ezinengi. Lelivini lanabisela impande zalo ngakulo, lakhuphela lengatsha zalo ngakulo, ukuba lulithelele amanzi. Lwalisiphuna lapho lalihlanyelwe khona,

⁸ lwalisa emhlabathini omuhle ngasemanzini amanengi ukuba likhuphe ingatsha, lithele isithelo, libe livini elihle.

⁹ Wothi: INkosi uNkulunkulu ithi: Kambe ivini leli lizaphumelela na? Ukhozi kaluyikusiphuna impande zalo, lwaphule ingatsha zalo, ukuba wonke amahlamvu alo amatsha ahlumayo abune na? Kakuyikudinga amandla labantu abanengi ukulisiphuna.

¹⁰ Nxa selisitshuniwe, lizaphumelela na? Kaliyikubuna yini nxa umoya wasempumalanga ulibetha, libunele endaweni elakhula kiyo na?

¹¹ Laselifika ilizwi leNkosi kimi lisithi:

¹² Tshono ebantwini abahlamukayo, uthi: Kalazi yini ukuba lezizinto zitshoni na? Batshele ukuba inkosi yaseBabiloni yafika eJerusalema, yathumba inkosi yalo lezikhulu zalo, yabaletha eBabiloni.

¹³ Yathatha omunye wozalo lwesikhosini, yenza isivumelwano laye, yamfungisa. Yathumba amadoda amakhulu esizwe,

¹⁴ ukuze umbuso uzehlisele phansi, ungaziphakamisi, ukuba ume ngokulondoloza isivumelwano sakhe.

¹⁵ Kodwa lowo wayivukela ngokuthuma izithunywa eGibithe, ukuba bamnike amabhiza lempi enkulu. Uzaphumelela na? Kambe umuntu owenza okunje angaphepha na? Angasaphula isivumelwano aphephe na?

¹⁶ Ngiyazifunga, kutsho iNkosi uNkulunkulu, impela uzafela eBabiloni lapho kuhlala khona inkosi eyambeka ukuba abe yinkosi, asideleleyo isifungo sayo, waphula isivumelwano sayo.

¹⁷ UFaro lempi yakhe enkulu lexuku elikhulu kayikumsiza empini, lapho sekumiswe amadundulu, kwamiswa imiduli yokuvimbezela ukuba kubulawe abanengi.

¹⁸ Ngoba esidelele isifungo, waphula isivumelwano, wazithoba, kodwa wenza zonke lezizinto, kayikuphunyuka.

¹⁹ Ngalokho, iNkosi uNkulunkulu ithi: Ngiyazifunga, impela isifungo sami asidelelayo, lesivumelwano sami asaphulayo, ngizakukwehlisela kuye.

²⁰ Ngizaphosela imbule lami phezu kwakhe, ngimbambe ngalo, ngimuse eBabiloni, ngimthonisise khona ngokungathembeki kwakhe akwenzileyo kimi.

²¹ Wonke amaqhawe empi yakhe azabulawa empini, abaseleyo bachithachithelwe emimoyeni yonke. Lizakwazi ukuthi mina Nkosi ngikhulumile.

²² INkosi uNkulunkulu ithi: Mina uqobo ngizathatha isihlokwana esicolo somkusu omude, ngisigxumeke. Ngizakwaphula ihlumela ogatsheni olusengqongeni, ngilihlanyele phezulu entabeni ende,

²³ ngilihlanyele engqongeni yentaba koIsrayeli, likhuphe ingatsha, lithele izithelo, libe ngumkusu omuhle; inyoni zenhlobo zonke zizalala ngaphansi kwawo, zilale emthunzini wengatsha zawo.

²⁴ Zonke izihlahla zeganga zizakwazi ukuba mina Nkosi ngiyawisa isihlahla eside, ngikhulise isihlahla esifitshane, ngomise isihlahla esiluhlaza, ngihlumise esomileyo. Mina Nkosi ngikhulumile, ngizakukwenza.