UHezekhiyeli 16 - iBhayibhili Elingcwele 1978

Ukungathembeki kweJerusalema

¹ Ilizwi leNkosi lafika kimi futhi lathi:

² Ndoda, yazisa iJerusalema ngamanyala alo,

³ uthi: INkosi uNkulunkulu ithi kulo iJerusalema: Ngokudabuka ungowaseKanani; uyihlo wayengumAmori lonyoko wayengumHethi.

⁴ Ngosuku owazalwa ngalo inkaba yakho kayiqunywanga, kawugeziswanga langamanzi ukuba uhlambuluke, kawugcotshwanga langetshwayi, kawugoqelwanga ngamalembu.

⁵ Kakho owaba lomusa kuwe ukuba akwenzele lezizinto; kakho lowakuthandayo. Kodwa walahlelwa egangeni, ngoba wawunengeka osukwini owazalwa ngalo.

⁶ Nxa ngidlula ngakubona uqhatsha egazini lakho, ngakhuluma lawe usegazini lakho, ngakutshela ukuba uphile.

⁷ Ngakuhlakulela njengesihlahla esiluhlaza esikhulayo egangeni. Waqina wakhula, waba ngowesifazana opheleleyo, waphuhla, lenwele zakho zakhula; kodwake wawulokhu unqunu.

⁸ Lapho ngidlula kuwe futhi ngakukhangela, ngakubona ususesikhathini sothando; ngendlala ingubo yami phezu kwakho, ngambathisa ubunqunu bakho; ngathembisa ukukuthatha, ngenza isivumelwano lawe, waba ngowami, kutsho iNkosi uNkulunkulu.

⁹ Ngakugezisa ngamanzi, ngasusa igazi kuwe, ngakugcoba ngamafutha.

¹⁰ Ngakugqokisa ilembu elicecisiweyo, ngakufaka amanyathelo, ngakugoqela ngelembu elihle, ngakwambathisa isilika.

¹¹ Ngakucecisa ngezinto ezinhle, ngafaka amasongo engalweni zakho, ngakugqizisa iketane entanyeni.

¹² Ngakufaka isongo emakhaleni, lamadikazi endlebeni zakho, lomqhele omuhle ekhanda lakho.

¹³ Waceciswa ngegolide langesiliva, lezambatho zakho zazingezamalembu amahle, lezesilika, lezelembu elicecisiweyo; wadla impuphu ecolekileyo loluju lamafutha; waba muhle kakhulu, waba yinkosikazi.

¹⁴ Udumo lwakho lwafinyelela ezizweni ngenxa yobuhle bakho, ngoba babuphelele ngezinto ezinhle engangikwambathise zona, kutsho iNkosi uNkulunkulu.

¹⁵ Kodwa wathemba ubuhle bakho, waba liwule ngenxa yodumo lwakho, wawula labo bonke abedlulayo.

¹⁶ Wathatha ezinye izambatho zakho, wacecisa ngazo indawo zokukhonzela, wawulela lapho.

¹⁷ Wathatha futhi iziceco zakho ezinhle zegolide lami lezesiliva sami engakunika zona, wazenzela izithombe zabantu, wawula lazo.

¹⁸ Wathatha izambatho zakho ezicecisiweyo, wazembesa ngazo, wanikela ngamafutha ami langempepha yami kuzo.

¹⁹ Wathatha ukudla engakunika khona, impuphu ecolekileyo lamafutha kanye loluju engangikondla ngakho, wanikela ngakho kuzo, kwaba ngumnikelo olephunga elimnandi, kutsho iNkosi uNkulunkulu.

²⁰ Wathatha amadodana lamadodakazi akho owawungizalele wona, wawanikela kuzo ukuba adliwe. Lokhu kwakuyinto encinyane yini kulokuwula kwakho na?

²¹ Hayi, wabulala abantwana bami, wanikela ngabo ezintombeni, baba ngumnikelo wokutshiswa.

²² Kuwo wonke amanyala akho lakukho konke ukuwula kwakho kawukhumbulanga insuku zobutsha bakho lapho wawunqunu, uqhatsha egazini lakho.

²³ Emva kwabo bonke ububi bakho — maye, maye kuwe, kutsho iNkosi uNkulunkulu —

²⁴ wazakhela ithala, wazenzela indawo ephakemeyo emidangeni yonke;

²⁵ emahlanganweni endlela zonke wazakhela indawo ephakemeyo, wangcolisa ubuhle bakho uzinikela kibo bonke abadlulayo, usandisa ukuwula kwakho.

²⁶ Wabuya wawula lamaGibithe, omakhelwana bakho ababewula kakhulu, usandisa ukuwula kwakho ukuba ungithukuthelise.

²⁷ Ngakho ngikuphakamisele isandla sami, nginciphisile isabelo sakho, ngakunikela ekuphangeni kwezitha zakho amaFilistiya, abe lenhloni ngokuziphatha kwakho ngokubi.

²⁸ Futhi uwulile lamaAsiriya ngoba ungakholisanga; uwulile lawo, kawaze wakholwa.

²⁹ Wandisa ukuwula kwakho futhi lelizwe labathengi iKaladiya, kodwa langalokhu kawukholwanga.

³⁰ Wakwenza konke lokhu njengewule elingelanhloni, kutsho iNkosi uNkulunkulu.

³¹ Wazakhela ithala emahlanganweni endlela zonke, wenza indawo zakho eziphakemeyo zokukhonzela emidangeni yonke. Kanti kawubanga njengewule ngoba wadelela inkokhelo.

³² Waba ngumfazi oliwule, ongenisa izihambi endaweni yendoda yakhe.

³³ Amadoda anika inkokhelo kuwo wonke amawule. Kodwa wena wanika iziphiwo zakho kuzo zonke izithandwa zakho, uzithenga ukuba zize kuwe zivela endaweni zonke, zilanda ukuwula lawe.

³⁴ Ngalokho wawehlukile kwabanye abesifazana ekuwuleni kwakho; kakho owawunxusa ukuwula lawe; kawunikwanga inkokhelo, kodwa wena wazinika izithandwa zakho. Ngalokhoke wawehlukile.

³⁵ Ngakhoke, wena wule, zwana ilizwi leNkosi.

³⁶ INkosi uNkulunkulu ithi: Njengoba unqunule, kwabonwa ubunqunu bakho lapho uwula lezithandwa zakho, langenxa yazo zonke izithombe zakho, langenxa yegazi labantwana bakho olinike zona,

³⁷ ngizaqoqa zonke izithandwa zakho obuthokoza lazo, lazo zonke obuzithanda, lazo zonke obuzenyanya. Ngizaziqoqa ukuba zilwe lawe zivela endaweni zonke, ngikunqunulise phambi kwazo ukuze zibone bonke ubunqunu bakho.

³⁸ Ngizakukuthonisisa njengabesifazana abafebayo lababulalayo, ngehlisele phezu kwakho igazi elachithwayo ngenxa yokuthukuthela lomona.

³⁹ Ngizakukunikela ezandleni zezithandwa zakho, zizadiliza ithala lakho, zibhidlize indawo zakho eziphakemeyo, zikuhlubule izambatho zakho, zikuthathele iziceco zakho ezinhle, zikutshiye unqunu.

⁴⁰ Zizakukulethela ixuku, zikukhande ngamatshe, zikuqumaqume iziqa ngemihedla yazo.

⁴¹ Zizatshisa izindlu zakho, zikuthonisise phambi kwabesifazana abanengi. Ngizakukhawulisa ukuwula ungabe usanika izithandwa zakho inkokhelo.

⁴² Ngalokho ngiqede ukuthukuthela kwami kuwe, lomona wami uphele kuwe. Ngizadeda, ngingabe ngisathukuthela.

⁴³ Ngoba ungakhumbulanga insuku zobutsha bakho, kodwa ungithukuthelisile ngazo zonke lezizinto, ngizaphindisela izenzo zakho phezu kwakho, kutsho iNkosi uNkulunkulu. Kawuzenzanga lezizinengiso kanye lawo wonke amanye amanyala akho na?

⁴⁴ Bonke abasebenzisa izaga bazakutsho lesisaga ngawe bathi: Udiwo lufuze imbiza.

⁴⁵ Wena uyindodakazi eqotho kanyoko owayesenyanya indoda yakhe labantwana bakhe; ungudade oqotho wabodadewenu ababesenyanya amadoda abo labantwana babo. Unyoko wayengumHethi loyihlo wayengumAmori.

⁴⁶ Udadewenu omdala yiSamariya elalihlala lamadodakazi alo ngasenyakatho kwakho; lomnawakho owayehlala ngaseningizimu kwakho yiSodoma lamadodakazi alo.

⁴⁷ Kanti kawukholwanga yikuhamba ngezindlela zabo, layikwenza amanyala abo. Ngesikhatshana nje esincinyane waba mubi kulabo kuzo zonke indlela zakho.

⁴⁸ Ngiyazifunga, kutsho iNkosi uNkulunkulu, udadewenu iSodoma kalenzanga lona lamadodakazi alo njengokwenza kwakho lamadodakazi akho.

⁴⁹ Nanku ukona kukadadewenu iSodoma; lona lamadodakazi alo lalizigqaja, lisutha okunengi, lichelesile, kodwa kalibasizanga abayanga labaswelayo.

⁵⁰ Babezigqaja, besenza amanyala phambi kwami; ngalokho ngabasusa njengalokhu usubonile.

⁵¹ ISamariya kalenzanga ingxenye yezono zakho. Wena wenzile amanyala amanengi ukwedlula lona, wenza odadewenu babonakale belungile ngamanyala akho owenzileyo.

⁵² Lithwale ihlazo lakho lawe ngoba wenzile ukuthonisiswa kwabodadewenu kube lula ngenxa yezono zakho owazenzayo ukwedlula bona; bona balungile kulawe. Ngakho woba lenhloni lawe, uthwale ihlazo lakho, ngoba wenze ukuba odadewenu babonakale belungile.

⁵³ Ngizabuyisa abantu babo, abantu beSodoma lamadodakazi alo, labantu beSamariya lamadodakazi alo, ngibuyise labantu bakho kanye labo.

⁵⁴ Uzakuthwala ihlazo lakho, ube lenhloni ngakho konke okwenzileyo, ukuba ube yinduduzo kibo.

⁵⁵ Odadewenu, iSodoma lamadodakazi alo, bazabuyela esimeni sabo sakuqala, leSamariya lamadodakazi alo babuyele esimeni sabo sakuqala, lawe lamadodakazi akho libuyele esimeni senu sakuqala.

⁵⁶ Udadewenu iSodoma lalingesiso isiga emlonyeni wakho osukwini lokuziphakamisa kwakho,

⁵⁷ kungabonakali ububi bakho na? Khathesike usuphenduke waba njengalo, usuyinto yokuthukwa ngamadodakazi aseEdoma labo bonke abakhelene lalo, lamadodakazi aseFilistiya, abakuhanqileyo labakuzondayo.

⁵⁸ Ufanele ukuthwala umvuzo wobubi bakho lamanyala akho, kutsho iNkosi.

⁵⁹ Yebo, iNkosi uNkulunkulu ithi: Ngizakukuphatha njengokwenza kwakho, wena odelele isifungo, wephula isivumelwano;

⁶⁰ kanti ngizakhumbula isivumelwano sami lawe, esensukwini zobutsha bakho, ngenze lawe isivumelwano esingelakuphela.

⁶¹ Ng’khona uzakhumbula indlela zakho, ube lenhloni lapho sengithatha odadewenu, omdala kanye lomncinyane, ngikunike babe ngamadodakazi akho, kodwa kungabi ngenxa yesivumelwano sami lawe.

⁶² Ngizakwenza isivumelwano sami lawe ukuba wazi ukuthi ngiyiNkosi.

⁶³ Uzakhumbula, uyangeke, ungaphindi ukuvula umlomo wakho futhi ngenxa yehlazo lakho, nxa sengikuthethelela konke lokho okwenzileyo, kutsho iNkosi uNkulunkulu.