UHezekhiyeli 14 - iBhayibhili Elingcwele 1978

Abakhonza izithombe bazakutshaywa yiNkosi

¹ Kwasekufika kimi abadala abathile bakoIsrayeli, bahlala phambi kwami.

² Ilizwi leNkosi lafika kimi lathi:

³ Ndoda, lamadoda anikele inhliziyo zawo ezithombeni zawo, athanda ukukhangela izinto ezimbi eziwakhubayo. Ngizavuma ukubuzwa yiwo na?

⁴ Ngakhoke khuluma kuwo uthi: INkosi uNkulunkulu ithi: Bonke abakoIsrayeli abanikela inhliziyo zabo ezithombeni zabo, abathanda ukukhangela izinto ezimbi ezibakhubayo, kodwa beze kumprofethi, mina Nkosi uqobo ngizabaphendula ngenxa yobunengi bezithombe zabo,

⁵ ukuze ngibambe inhliziyo zabakoIsrayeli abehlukene lami ngenxa yezithombe zabo.

⁶ Ngakhoke tshono kuIsrayeli uthi: INkosi uNkulunkulu ithi: Phendukani, lehlukane lezithombe zenu, lidele wonke amanyala enu.

⁷ Ngoba bonke abakoIsrayeli labezizweni abahlala koIsrayeli abazehlukanisa lami, banikela inhliziyo zabo ezithombeni zabo, bethanda ukukhangela izinto ezimbi ezibakhubayo, kodwa beze kumprofethi ukubuza ngami, mina Nkosi uqobo ngizabaphendula.

⁸ Ngizamelana lalabobantu, ngibenze babe yizibonakaliso leziga, ngibakhuphe ebantwini bami; lizakwazi ukuba ngiyiNkosi.

⁹ Uba umprofethi ekhohliseka, akhulume ilizwi, mina Nkosi ngimkhohlisile lowomprofethi; ngizaphakamisela isandla sami, ngimbhubhise phakathi kwabantu bami uIsrayeli.

¹⁰ Bonke bazatshaywa, umprofethi lomuntu obuzayo, bayona bonke,

¹¹ ukuba uIsrayeli angabe esahlukana lami futhi, angabuyi azingcolise ngeziphambeko zabo zonke, kodwa babe ngabantu bami, lami ngibe nguNkulunkulu wabo, kutsho iNkosi uNkulunkulu.

AbaseJerusalema bakufanele ukutshaywa nguNkulunkulu

¹² Ilizwi leNkosi lafika kimi lathi:

¹³ Ndoda, lapho ilizwe lisona kimi ngokwenza okubi, mina ngizaphakamisela isandla sami kulo, nginciphise ukudla kwalo kwensuku zonke, ngilehlisele indlala, ngiqede kulo abantu lezinyamazana.

¹⁴ Loba lamadoda amathathu ebehlala khona, uNowa loDaneli loJobe, abezakuzikhulula wona kuphela ngokulunga kwawo, kutsho iNkosi uNkulunkulu.

¹⁵ Loba ngidlulisa phakathi kwelizwe izilo zeganga, ziliphange, lize libe yinkangala, ukuze kungadluli muntu kilo ngenxa yezilo,

¹⁶ uba lamadoda amathathu abehlala kilo, ngiyazifunga mina, kutsho iNkosi uNkulunkulu, abengayikukhulula amadodana lamadodakazi awo; wona wodwa abezakuzikhulula, kodwa ilizwe libe yinkangala.

¹⁷ Uba ngisehlisela ukulwa kulelolizwe ngithi: Impi kayidabule phakathi kwelizwe, iqede kulo abantu lezinyamazana,

¹⁸ loba lamadoda abehlala khona, ngiyazifunga, kutsho iNkosi uNkulunkulu, abengayikukhulula amadodana lamadodakazi awo, kodwa wona wodwa abezakuzikhulula.

¹⁹ Uba ngithumela isifo kulelolizwe, ngehlisele ukuthukuthela kwami kulo ngokuchitha igazi, ukuba ngiqede kulo abantu lezinyamazana,

²⁰ loba uNowa loDaneli loJobe bebehlala khona, ngiyazifunga, kutsho iNkosi uNkulunkulu, bebengayikukhulula indodana loba indodakazi; kodwa bebezakuzikhulula bona kuphela ngokulunga kwabo.

²¹ INkosi uNkulunkulu ithi: Phoke, kuzakuba njani eJerusalema nxa ngilehlisela lezizehlulelo zami ezine ezibuhlungu, impi, lendlala, lezilo ezimbi, lesifo, ukuba ngiqede kilo abantu lezinyamazana.

²² Abanye bazasala kilo, abasilileyo ukuba bakhutshwe kilo, amadodana lamadodakazi; ubakhangele nxa bephuma besiza kuwe, ubone ukuthi baziphathe kanjani lokuthi benzeni; lokhu kuzakukutshengisa wena ukuthi konke okubi engikwenzileyo eJerusalema kufanele, lakho konke engilehlisele khona.

²³ Kuzakukutshengisa ukuthi kufanele nxa usubonile ukwenza kwabo lalokho abakwenzileyo, ngoba uzakwazi ukuthi kangikwenzanga lokhu kibo ngaphandle kwesizatho, kutsho iNkosi uNkulunkulu.