UHezekhiyeli 13 - iBhayibhili Elingcwele 1978

INkosi izamelana labaprofethi bamanga

¹ Ilizwi leNkosi lafika kimi lathi:

² Ndoda, tshumayela ngabaprofethi bakoIsrayeli, uthi kulabo abatshumayelayo okwengqondo zabo: Zwanini ilizwi leNkosi.

³ INkosi uNkulunkulu ithi: Maye kubaprofethi abayizithutha abalandela owabo umoya, bengabonanga mibono!

⁴ Wena Israyeli, abaprofethi bakho banjengamakhanka asemanxiweni.

⁵ Kabayanga ezikhaleni ukulungisela uIsrayeli umduli odilikileyo ukuze aqine osukwini lokulwa osukwini lweNkosi.

⁶ Bakhohlisile, bavumisa amanga, besithi: Nanka amazwi eNkosi; yona iNkosi ingabathumanga, baqaphele ukuba izagcwalisa ilizwi labo.

⁷ Kakusiwo umbono wenkohliso eliwubonileyo, lina baprofethi na? Ukuvumisa kwenu kakusiwo amanga na? Lithi kuyilizwi leNkosi uqobo, kodwa kungeyisimi engikhulumileyo.

⁸ Ngakhoke iNkosi uNkulunkulu ithi: Ngoba likhulume inkohliso, labona amanga, ngizamelana lani, kutsho iNkosi uNkulunkulu.

⁹ Isandla sami sizamelana labaprofethi ababona imibono yenkohliso, bavumise amanga. Kabayikuba semhlanganweni wabantu bami, loba babhalwe oluhlwini lwakoIsrayeli, kabayikungena elizweni lakoIsrayeli; lizakwazi ukuba ngiyiNkosi uNkulunkulu.

¹⁰ Yebo, ngoba beduhisa abantu bami besithi: Kulungile! Khona kungalunganga; kunjengabantu abakha umduli, lababaprofethi bawucombe ngekalaga engavuthwanga.

¹¹ Tshela labo abawucombayo ngekalaga ukuthi uzakuwa. Kuzakuba khona impophoma zezulu, kukhithike isiqhotho esikhulu, kuvuke isiphepha somoya;

¹² nxa umduli lowo ususiwa, kakuyikutshiwo kuwe ukuthi: Kungaphi lokho ababewucomba ngakho na?

¹³ Ngakhoke, iNkosi uNkulunkulu ithi: Ekuthukutheleni kwami ngizavusa isiphepha somoya, langolaka lwami nginise impophoma zezulu lesiqhotho esikhulu ukuba ngiwudilize.

¹⁴ Ngizadiliza umduli eliwucombe ngekalaga, ngiwuwisele phansi ukuze kwambuleke izisekelo zawo; lekuweni kwawo uzalibulala; lizakwazi ukuba ngiyiNkosi.

¹⁵ Ngokunjaloke ngizakwehlisela emdulini ulaka lwami laphezu kwalabo abawucomba ngekalaga, besengisithi kuwe: Umduli kawusekho, kanye lalabo abawucombileyo,

¹⁶ abangabaprofethi bakoIsrayeli abatshumayeza iJerusalema, ababona imibono besithi kulungile, khona kungalunganga, kutsho iNkosi uNkulunkulu.

¹⁷ Wena ndoda, phendukela kwabesifazana bakini abatshumayela okwengqondo zabo, utshumayele ngabo,

¹⁸ uthi: INkosi uNkulunkulu ithi: Maye kwabesifazana abathungela intebe ezihlakaleni zabo bonke abantu, babenzele lezimbobozo zokufaka emakhanda ukuba babathiye. Lizathiya abantu bami, ukuba lisizakale lina na?

¹⁹ Lingingcolisile phakathi kwabantu bami ngenxa yengcosana nje yebhali langezihletshana zezinkwa, labulala abantu abangafanelanga ukufa, layekela abantu abangafanelanga ukuphila ngamanga enu ebantwini bami abalalela amanga.

²⁰ Ngakho iNkosi uNkulunkulu ithi: Ngimelene lentebe zenu elithiya ngazo abantu; ngizazidabula engalweni zenu, ngiyekele abantu elibathiyileyo njengezinyoni bakhululeke.

²¹ Lezimbombozo zenu lazo ngizazidabula, ngikhulule abantu bami ezandleni zenu, lingabe lisaba lamandla okubathiya futhi; lizakwazi ukuba ngiyiNkosi.

²² Ngoba lidabukisile abalungileyo ngamanga, lanxa ngingabadabukisanga mina, lakhuthaza ababi ukuze bangaphenduki endleleni zabo ezimbi, basile.

²³ Ngakho kalisayikubona imibono yenkohliso, livumise; ngizakhulula abantu bami ezandleni zenu. Lizakwazi ukuba ngiyiNkosi.