UHezekhiyeli 12 - iBhayibhili Elingcwele 1978

Umfanekiso wokuthunjwa

¹ Ilizwi leNkosi lafika kimi lathi:

² Ndoda, wena uhlala phakathi kwabantu abahlamukayo abalamehlo okubona, kodwa bengaboni, abalendlebe zokuzwa, kodwa bengezwa;

³ ngoba bangabantu abahlamukayo. Ngakhoke, wena ndoda, lungisa umthwalo womuntu othunjiweyo, usuke emini uhambe phambi kwabo njengomuntu othunjiweyo, usuke endaweni yakho uye kwenye indawo phakathi kwabo. Mhlawumbe bazakuqedisisa lanxa bengabantu abahlamukayo.

⁴ Uzakhupha umthwalo wakho emini phambi kwabo, ube njengomthwalo womuntu othunjiweyo, usuke wena ntambama phambi kwabo, uhambe njengomuntu othunjiweyo.

⁵ Ubhoboze umduli phambi kwabo, utshungubale kiwo.

⁶ Nxa sekuhwalala uthathe umthwalo wakho, uwetshate ehlombe phambi kwabo, uwuthwale ugubuzele ubuso bakho ukuze ungaboni ilizwe. Ngikwenza ube yisixwayiso koIsrayeli.

⁷ Ngasengisenza njengokutshelwa kwami. Ngawukhupha umthwalo wami emini, waba njengomthwalo wothunjiweyo. Kwathi kusihlwa ngabhoboza umduli ngezandla zami, ngatshungubala emnyameni, ngetshete umthwalo wami phambi kwabo.

⁸ Kusasa ilizwi leNkosi lafika kimi lathi:

⁹ Ndoda, kabatshongo kuwe yini abakoIsrayeli, abantu abahlamukayo, ukuthi: Wenzani na?

¹⁰ Ubokuthi kibo: INkosi uNkulunkulu ithi: Lelilizwi lingesikhulu seJerusalema langabo bonke abakoIsrayeli abakilo.

¹¹ Ubatshele ukuba uyisixwayiso kibo; lokho okwenzileyo kuzakwenziwa kibo, bazakuthunjwa.

¹² Isikhulu sabo sizakwetshata umthwalo waso emnyameni, sitshungubale embotsheni sigubuzele ubuso baso, ukuze singaboni ilizwe.

¹³ Kodwa ngizaphosa imbule lami phezu kwaso, ngisibambe ngalo, ngisise eBabiloni elizweni lamaKaladiya; kanti kasiyikulibona, loba sizafela khona.

¹⁴ Ngizabachithachithela emimoyeni yonke wonke amanxusa aso, labasizi baso lazo zonke izimpi zaso, ngibalandele ukubabulala.

¹⁵ Bazakwazi ukuba ngiyiNkosi nxa sengibahlakazele ezizweni zonke, ngabachithachithela emazweni.

¹⁶ Kodwa ngizatshiya abayingcosana baphephe empini lasendlaleni lasesifeni, ukuba bafakaze ngawo wonke amanyala abo phakathi kwezizwe abazahamba kuzo, ukuba zazi ukuba ngiyiNkosi.

¹⁷ Ilizwi leNkosi lafika kimi futhi lathi:

¹⁸ Ndoda, dlana ukudla kwakho ngokuthuthumela, unathe amanzi ngokuqhaqhazela lokwesaba,

¹⁹ uthi ebantwini belizwe: INkosi uNkulunkulu ithi ngabakhileyo eJerusalema abasekhona elizweni lakoIsrayeli: Bazakudla ukudla kwabo besesaba, banathe amanzi beqhaqhazela, ngoba ilizwe labo lizaphundlwa konke elilakho ngenxa yesihluku salabo abahlala kilo.

²⁰ Imizi okuhlalwa kiyo izachithwa, lelizwe libe yinkangala; lizakwazi ukuba ngiyiNkosi.

²¹ Ilizwi leNkosi lafika kimi lathi:

²² Ndoda, sithini lesisaga esitshiwoyo ngelizwe lakoIsrayeli esokuthi: Insuku ziyadlula, lemibono yonke ilize?

²³ Batshele uthi: INkosi uNkulunkulu ithi: Ngizasiqeda lesisaga, kabasayikusisebenzisa koIsrayeli. Uthi kibo: Insuku zisondele, kanye lokugcwaliseka kwemibono yonke.

²⁴ Ngoba kakusayikuba khona umbono wamanga, lokuvumisa okukhohlisayo koIsrayeli.

²⁵ Kodwa mina Nkosi ngizakukhuluma engikuthandayo; engikutshoyo yikho okuzakwenzeka, kungaphuzi lokho engikukhulumayo; ngizakukwenza ensukwini zenu, lina bantu abahlamukayo, kutsho iNkosi uNkulunkulu.

²⁶ Laselifika ilizwi leNkosi lisithi:

²⁷ Ndoda, khangela, abakoIsrayeli bathi: Umbono awubonayo ungowensuku ezikhatshana, lalokho akutshumayelayo kungokwesikhathi esikhatshana.

²⁸ Ngakho wothi kibo: INkosi uNkulunkulu ithi: Kakusayikuphuza lelilodwa emazwini ami, kodwa ilizwi engilikhulumayo lizakwenzeka, kutsho iNkosi uNkulunkulu.