UHezekhiyeli 11 - iBhayibhili Elingcwele 1978

AbaseJerusalema bazathonisiswa

¹ Umoya wangiphakamisa, wangisa ngasesangweni lendlu yeNkosi elingasempumalanga, elikhangele ngasempumalanga. Emnyango wesango kwakukhona amadoda angamatshumi amabili lanhlanu; phakathi kwawo ngabona uJazaniya indodana kaAzuri, loPelatiya indodana kaBenaya, izikhulu zabantu.

² INkosi yathi kimi: Ndoda, yiwo la amadoda enza amacebo amabi, anika izelukeko ezimbi kulumuzi,

³ athi: Isikhathi kasikafiki sokuba kwakhiwe izindlu; lumuzi uyimbiza, thina siyinyama.

⁴ Ngakhoke tshumayela ngawo, tshumayela wena ndoda.

⁵ Umoya weNkosi wehlela kimi, iNkosi yangitshela ukuba ngithi: INkosi ithi: Litsho njalo, lina bakoIsrayeli, ngoba ngiyakwazi okusengqondweni zenu.

⁶ Libulele abantu abanengi kulumuzi, lagcwalisa indlela zawo ngezidumbu.

⁷ Ngakhoke iNkosi uNkulunkulu ithi: Izidumbu zabakini elizibeke phakathi kwawo yizo eziyinyama, lumuzi uyimbiza; kodwa lina lizakhutshwa phakathi kwawo.

⁸ Liwesabile umkhonto, ngizalilethela wona, kutsho iNkosi uNkulunkulu.

⁹ Ngizalikhupha phakathi kwalumuzi, ngilinikele ezandleni zabezizwe, ngilithonisise.

¹⁰ Lizabulawa yimpi, ngilithonisise emikhawuleni yakoIsrayeli; lizakwazi ukuba ngiyiNkosi.

¹¹ Lumuzi kawuyikuba yimbiza yenu, lani kaliyikuba yinyama phakathi kwayo. Ngizalithonisisa emikhawulweni yakoIsrayeli.

¹² Lizakwazi ukuba ngiyiNkosi. Ngoba kalihambanga ngezimiso zami, lemithetho yami kaliyenzanga, kodwa lenze imithetho yezizwe ezilihanqileyo.

¹³ Kwathi lokhu ngisatshumayela, uPelatiya indodana kaBenaya wafa. Ngasengisithi mbo ngobuso phansi, ngamemeza ngelizwi elikhulu ngathi: Hawu, Nkosi uNkulunkulu! Uzabaqeda abaseleyo koIsrayeli na?

INkosi ithembisa ukubuyisa abathunjiweyo

¹⁴ Ilizwi leNkosi lafika kimi lathi:

¹⁵ Ndoda, abafowenu, yebo abafowenu abayizihlobo zakho, wonke uIsrayeli, yibo abatshelwe ngabakhileyo eJerusalema ukuthi: Selikhatshana leNkosi. Ilizwe selinikwe thina ukuba libe yilifa lethu.

¹⁶ Ngakho iNkosi uNkulunkulu ithi: Loba ngibese khatshana phakathi kwezizwe, ngabachithachithela emazweni, kanti ngibe yindlu engcwele kibo okwesikhatshana emazweni engabachithachithela kiwo.

¹⁷ Ngakhoke tshono uthi iNkosi uNkulunkulu ithi: Ngizabaqoqa ezizweni, ngibabuthe emazweni engibachithachithele kiwo, ngibanike ilizwe lakoIsrayeli.

¹⁸ Lapho befika kulo, bazasusa lapho konke okunengisayo kwalo, lawo wonke amanyala alo.

¹⁹ Ngizabanika inhliziyonye, ngifake umoya omutsha phakathi kwabo, ngikhuphe inhliziyo elukhuni kibo, ngibanike inhliziyo ebuthakathaka,

²⁰ ukuba bahambe ngezimiso zami, bagcine imithetho yami bayilalele; bazakuba ngabantu bami, lami ngibe nguNkulunkulu wabo.

²¹ Kodwa labo abanhliziyo zabo zithanda okunengisayo kwabo lamanyala abo, ngizaphindisela izenzo zabo phezu kwabo, kutsho iNkosi uNkulunkulu.

²² Amakherubi asephakamisa impiko zawo, amavili asuka lawo; inkazimulo kaNkulunkulu kaIsrayeli yayingaphezu kwawo.

²³ Inkazimulo yeNkosi yasuka phakathi komuzi, yema phezu kwentaba engasempumalanga komuzi.

²⁴ Umoya wangiphakamisa, wangisa kwabathunjiweyo eKaladiya. Konke lokhu kwafika ngombono owawuthunywe ngumoya kaNkulunkulu; kwathi umbono engangiwubonile wasusuka kimi.

²⁵ Ngasengibatshela abathunjiweyo zonke izinto iNkosi eyayingitshengise zona.