UHezekhiyeli 10 - iBhayibhili Elingcwele 1978

Inkazimulo kaNkulunkulu iyasuka ethempelini

¹ Ngasengibona ngasemkhathini owawungaphezu kwamakherubi okunjengelitshe elithiwa yisafire kufana lesihlalo sobukhosi.

² INkosi yasisithi emuntwini ogqoke ilembu elihle: Ngena phakathi kwamavili atshibilika ngaphansi kwamakherubi, ugcwalise izandla zakho ngamalahle avuthayo avela phakathi kwamakherubi, uwachithele phakathi komuzi. Ngambonake engena.

³ Amakherubi ayemi ngaseningizimu kwethempeli ekungeneni kwalowomuntu, lamayezi ayegcwele egumeni elingaphakathi.

⁴ Inkazimulo yeNkosi yasuka emakherubini, yaya ngasemnyango wethempeli; ithempeli lagcwala amayezi, leguma lagcwala ukukhanya kwenkazimulo yeNkosi.

⁵ Umdumo wempiko zamakherubi wezwakala lasegumeni elingaphandle, njengelizwi likaNkulunkulu uSomandla nxa ekhuluma.

⁶ Lapho iNkosi imtshela umuntu ogqoke ilembu elihle isithi: Thatha umlilo phakathi kwamavili atshibilikayo phakathi kwamakherubi; wangena wema phansi kwevili.

⁷ Elinye lamakherubi lelulela isandla salo emlilweni owawuphakathi kwamakherubi, lawuthatha, lawufaka ezandleni zalowomuntu owayembethe ilembu elihle; yena wawuthatha, waphuma.

⁸ Kwabonakala kiwo amakherubi okufana lesandla somuntu kungaphansi kwempiko zawo.

⁹ Ngakhangela ngabona amavili amane eceleni kwamakherubi, ivili elilodwa liphansi kwekherubi ngalinye. Amavili ayecwazimula njengelitshe elithiwa yitopazi.

¹⁰ Amavili womane ayefanana kungathi alivili phakathi kwevili.

¹¹ Ekuhambeni kwawo amakherubi aqonda loba kuluphi lwezinhlangothi zozine, engaphenduki, kodwa aqonda lapho akhangele khona.

¹² Yonke imizimba yawo lemihlana yawo lezandla zawo lempiko zawo lamavili kwakugcwele amehlo indawo zonke.

¹³ Amavili wona ngezwa kuthiwa ngamavili atshibilikayo.

¹⁴ Wonke ayelobuso obune; ubuso bokuqala bungobekherubi, ubuso besibili bungobomuntu, ubuso besithathu bungobesilwane, lobuso besine bungobelinqe.

¹⁵ Amakherubi aphakamake, ayeyizo izidalwa eziphilayo engazibona ngasemfuleni iKebari.

¹⁶ Lapho amakherubi ehamba, lamavili ahamba eceleni kwawo; lalapho amakherubi ephakamisa impiko zawo ukuba aphaphe, amavili kawasukanga kiwo.

¹⁷ Lapho esima, lawo ema; lalapho ephakama, lawo aphakama; ngoba umoya wezidalwa eziphilayo wawukiwo.

¹⁸ Yasisuka inkazimulo yeNkosi ngasemnyango wethempeli, yema ngaphezu kwamakherubi.

¹⁹ Amakherubi aphakamisa impiko zawo, asuka phansi ngiwabona, lamavili ehamba lawo, aze ema ngasesangweni elingasempumalanga kwethempeli; inkazimulo kaNkulunkulu kaIsrayeli yayingaphezu kwawo.

²⁰ Yizo lezi izidalwa eziphilayo engazibona ngaphansi kukaNkulunkulu kaIsrayeli ngasemfuleni iKebari; ngazi ukuthi ngamakherubi.

²¹ Zonke zazilobuso obune, zilempiko ezine, langaphansi kwempiko zazo kwakukhona okufana lezandla zomuntu.

²² Ubuso bazo babunjengalobo engabubona embonweni ngasemfuleni iKebari. Zazihamba zonke ziqonda phambili.