UHezekhiyeli 1 - iBhayibhili Elingcwele 1978

Umprofethi ubona isihlalo sobukhosi sikaNkulunkulu

¹ Kwathi ngomnyaka wamatshumi amathathu, ngosuku lwesihlanu lwenyanga yesine, lapho ngangiphakathi kwabathunjiweyo ngasemfuleni iKebari, lavuleka iphezulu, ngabona imibono kaNkulunkulu.

² Ngosuku lwesihlanu enyangeni, ngomnyaka wesihlanu wokuthunjwa kwenkosi uJehoyakini,

³ ilizwi leNkosi lafika kimi uHezekeli umpristi, indodana kaBuzi, elizweni lamaKaladiya ngasemfuleni iKebari. Isandla seNkosi saba phezu kwami lapho.

⁴ Kwathi lapho ngikhangela, ngabona umoya wesivunguzane ovela enyakatho, leyezi elikhulu elicwazimulayo, lomlilo ovuthayo njalonjalo, phakathi komlilo kwakukhona okungathi lithusi elikhazimulayo.

⁵ Phakathi kwalo kwavela umfanekiso wezidalwa ezine eziphilayo. Izimo zazo zazinje, zazifana labantu,

⁶ kodwa yileso laleso silobuso obune lempiko ezine.

⁷ Imilenze yazo yayiqondile, lamangqina azo ayefanana lawenkonyane, ecwazimula njengethusi elilolongiweyo.

⁸ Zazilezandla zomuntu ngaphansi kwempiko zazo enhlangothini zazo ezine. Izidalwa zozine zazilobuso lempiko.

⁹ Impiko zazo zazithintana, zazingaphenduki ekuhambeni kwazo. Kwaba yileso laleso sahamba saqonda phambili.

¹⁰ Izimo zobuso bazo zazinje; zozine zazilobuso bomuntu ngaphambili, zilobuso besilwane ngakwesokunene, zilobuso benkabi ngakwesokhohlo, zilobuso belinqe ngemuva.

¹¹ Babunjaloke ubuso bazo. Impiko zazo zazivulekile ngaphezulu. Kuyileso laleso isidalwa silempiko ezine, ezimbili zazithintana lezezinye izidalwa, lezimbili zigubuzele umzimba wazo.

¹² Zaqonda zonke phambili, zaya lapho umoya uzisa khona, zingaphenduki ekuhambeni kwazo.

¹³ Phakathi kwezidalwa eziphilayo kwakukhona okunjengamalahle omlilo ovuthayo, kunjengezibane ezihambahamba phakathi kwazo. Umlilo wawukhazimula, lasemlilweni kwakuphuma umbane.

¹⁴ Izidalwa eziphilayo zazigijima zisiya le lale, njengokuphazima kombane.

¹⁵ Ngisakhangele izidalwa eziphilayo ngabona amavili ngaphansi, ivili elilodwa liseceleni kwaleso laleso isidalwa.

¹⁶ Amavili ayecwazimula njengelitshe elihle elithiwa yitopazi, wonke ayefanana; izimo zawo lokusebenza kwawo kwakufana levili eliphakathi kwevili.

¹⁷ Ekuhambeni kwawo aqonda loba kuluphi lwezinhlangothi zawo zozine, engaphenduki.

¹⁸ Amavili womane ayelemiphetho lezipoko, imiphetho yawo yayigcwele amehlo.

¹⁹ Lapho izidalwa eziphilayo zihamba, lamavili ahamba eceleni kwazo; lalapho izidalwa eziphilayo zisuka emhlabathini, lamavili aphakama.

²⁰ Lapho umoya wawuthanda ukuya khona, zaya khona lazo, lamavili aphakama, ngoba umoya wezidalwa eziphilayo wawusemavilini.

²¹ Ekuhambeni kwazo lawo ahamba; ekumeni kwazo lawo ema; ekuphakameni kwazo emhlabeni aphakama lamavili kanye lazo; ngoba umoya wezidalwa eziphilayo wawusemavilini.

²² Ngaphezu kwamakhanda ezidalwa eziphilayo kwakukhona okunjengomkhathi kucwazimula njengelitshe elihle elithiwa yikristali, kwendlaliwe ngaphezu kwamakhanda azo.

²³ Ngaphansi komkhathi impiko zazo zazinatshululiwe zithintana, yileso laleso isidalwa silempiko ezimbili ezembese umzimba waso.

²⁴ Lapho ziphapha, ngezwa umsindo wempiko zazo unjengomdumo wamanzi amanengi, unjengomdumo kaSomandla, unjengokuxokozela kwexuku. Lapho zisima zehlisa impiko zazo,

²⁵ kodwa kwakuzwakala ilizwi livela emkhathini ongaphezu kwamakhanda azo lalapho sezimi zehlise impiko zazo.

²⁶ Ngaphezu komkhathi owawuphezu kwamakhanda azo kwakukhona okunjengelitshe elithiwa yisafire, kunjengesihlalo sobukhosi; ngaphezu kwakho konke kukhona okuhlezi esihlalweni sobukhosi okufanana lomuntu.

²⁷ Ngabona okunjengethusi okukhanya njengomlilo eziko; kusukela okhalweni lwakhe kusiya phezulu, kusukela okhalweni lwakhe kusiya phansi ngabona okunjengomlilo okuvutha indawo zonke.

²⁸ Ukukhanya lokho okuvuthayo kwakunjengomchilo‐wamakhosikazi emayezini lapho izulu lisina; kunjengokubonakala kobukhosi beNkosi. Lapho ngibona lokho, ngathi mbo ngobuso phansi, ngezwa ilizwi likhuluma lami.