UHagayi 2 - iBhayibhili Elingcwele 1978

Ubuhle bethempeli elitsha

¹ Ngomnyaka wesibili kaDariyu inkosi, ngosuku lwamatshumi amabili lanye lwenyanga yesikhombisa, ilizwi leNkosi lafika ngoHagayi umprofethi

² lisithi: Tshela uZerubabeli indodana kaSalatiyeli umbusi wakoJuda, loJoshuwa indodana kaJehozadaki umpristi omkhulu, labo bonke abantu abaseleyo,

³ uthi: Ngubani osekhona phakathi kwenu owabona lindlu ebuhleni bayo bakuqala na? Kambe injani khathesi na? Kayisize emehlweni enu na?

⁴ Kodwa qina, wena Zerubabeli, kutsho iNkosi, ume isibindi lawe Joshuwa, ndodana kaJehozadaki, mpristi omkhulu; qinani lani lonke, bantu belizwe. Sebenzani, ngoba mina ngilani, kutsho iNkosi yamabandla,

⁵ njengokuthembisa kwami engakwenza kini ekuphumeni kwenu eGibithe. Umoya wami uhlala phakathi kwenu, lingesabi.

⁶ Ngoba iNkosi yamabandla ithi: Kuseyisikhatshana nje ngibuye nginyikinye futhi iphezulu lomhlaba, ulwandle lomhlabathi owomileyo;

⁷ ngizakunyikinya izizwe zonke ukuze inotho yazo ifike lapha, igcwalise indlu le ngobuhle, kutsho iNkosi yamabandla.

⁸ Isiliva singesami legolide ngelami, kutsho iNkosi yamabandla.

⁹ Ubuhle bokucina balindlu buzakuba bukhulu kulobokuqala, kutsho iNkosi yamabandla; lakulindawo ngizanika ukuthula.

Abantu bakhuzwa ngokungathembeki kwabo

¹⁰ Ngosuku lwamatshumi amabili lane, lwenyanga yesificamunwemunye, emnyakeni wesibili kaDariyu, ilizwi leNkosi lafika kuHagayi umprofethi

¹¹ lisithi: INkosi yamabandla ithi: Ake ubabuze abapristi lumbuzo uthi:

¹² Uba umuntu ethwele inyama engcwele ngengubo yakhe, athinte ngengubo yakhe isinkwa, loba isitshwala, loba iwayini, loba amafutha, loba okunye ukudla, kuzakuba ngcwele na? Abapristi baphendula bathi: Atshi.

¹³ Wasesithi uHagayi: Uba umuntu ongcoliswe yisidumbu ethintana lalezizinto, ziyangcola na? Abapristi bamphendula bathi: Yebo, ziyangcola.

¹⁴ UHagayi wathi: Kunjaloke kimi ngalababantu langalesisizwe, kutsho iNkosi, langezenzo zonke zabo; iminikelo yabo ingcolile.

¹⁵ Ake licabange ngokwenzakayo kusukela ngaphambili kuze kube lamhlanje; kungakabekwa ilitshe phezu kwelinye ethempelini leNkosi,

¹⁶ kwakunjani kini na? Lapho umuntu esiya enqwabeni yezilinganiso ezingamatshumi amabili zamabele, wafumanisa itshumi nje; lalapho esiya emphandeni wewayini ukukha imbiza ezingamatshumi amahlanu, wafumanisa amatshumi amabili nje.

¹⁷ Ngalitshaya kanye layo yonke imisebenzi yenu ngokutshisa langengumane langesiqhotho; kanti kaliphendukelanga kimi, kutsho iNkosi.

¹⁸ Ake licabange kuhle kusukela lamuhla, kusukela kulolusuku lwamatshumi amabili lane, enyangeni yesificamunwemunye, kusukela osukwini lokubekwa kwezisekelo zethempeli; cabangani kuhle.

¹⁹ Inhlanyelo isesesilulwini na? Ivini lomkhiwa lepomegranati leoliva, lokhu kungatheli na? Kusukela lamuhla ngizakulibusisa.

Isithembiso seNkosi kuZerubabeli

²⁰ Ilizwi leNkosi lafika ngokwesibili kuHagayi, ngosuku lwamatshumi amabili lane enyangeni,

²¹ lathi: Tshela uZerubabeli umbusi wakoJuda uthi: Sengizakunyikinya iphezulu lomhlaba,

²² ngigenqule isihlalo sobukhosi semibuso, ngichithe amandla emibuso yezizwe, ngigenqule inqola zokulwa labakhweli bazo; amabhiza labagadi bawo azakuwa, lowo lalowo awe ngomkhonto womfowabo.

²³ Ngalolosuku, kutsho iNkosi yamabandla, ngizakukuthatha, wena Zerubabeli, inceku yami, indodana kaSalatiyeli, ngikwenze ube njengendandatho yodumo; ngoba nguwe engikukhethileyo, kutsho iNkosi yamabandla.